Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxv. Capittel.

1. Hier worden sommighe settingen vertelt, 4 ende voornemelick wat tot den tabernakel behoort, bestemt: 20. het volc brengt meer dan vele, 29. konstlicke wercmeesters worden bestelt.

A.1

ENde Mose versamelde de gantsche menichte der kinderen Israel, ⁺ ende sprack tot hen: Dat isset, dat de Heere geboden heeft, dat ghy doen sult.

+ Sabbath te heylighen.

2

^a Ses daghen sult ghy arbeyden, den seuenden dach daerenteghen, sult ghy heylich houden, een Sabbath der ruste des Heeren: wie daer inne arbeyt, die sal steruen.

a Exod. 20.a.9. ende 23.b.12. ende 31.b.14 ende 34.c.21 Leuit. 23.a.3

3

Ghy sult geen vyer aensteken, aen den Sabbath dach, in alle uwen wooninghen.

4

^* Ende Mose sprack tot der gantsche menichte der kinderen Israel: Dat isset, dat de Heere geboden heeft:

* Wat God daer bouen van den 25. cap. aen tot op het 32. Mose beuolen heeft, vander wooninghe ende alle harer gereede te maken, dat wijst hy in desen capit. den volcke aen etc.

5

Gheuet onder v heefoffer den Heere, ^b also, dat het heefoffer des Heeren, een yeghelick willichlick brenghe, goudt, siluer, ^c koper.

b Exod. 25.a.2.

c Ofte. eerin, oft metael.

6

^d† Gele zijden, scharlaken, rosijnroot, witte zijden ende geyten hayr.

d† anders, blauwe

7

Rootachtige ramsuellen, dassenuellen, ende vueren hout,

8

Oly ter lampen, ende specerije ter saluen, ende tot goeden reuckwercken,

9

Onich ende ingeuatede steenen, ten lijfrocke ende ten borstlappe.

B.10

Ende wie onder v verstandich is, die kome ende make, wat de Heere gheboden heeft:

11

Naemlicken de wooninge met haerder hutten, ende deckselen, ringen, berderen, rijchelen, pilaren, ende voeten.

12

De Arcke met haren hantboomen, den ^e† Genadenstoel ende voorhanck.

e† and. genadendecksel

13

Den disch met synen hantboomen, ende allen zijn ghereetschap, ende de schoubrooden.

14

Den luchter te luchten, ende zijn gereetschap, ende syne lampen, ende oly ten lichte.

15

Den Reuckaltaer met synen hantboomen, de salue ende specerije ten reuckwercke, het laken voor de deure der wooninghe.

16

Den brantoffers Altaer met synen metalen ^f traliewercke, hantboomen ende alle syne ^g ghereetschap: ^h† het hantuat met synen voete.

f schrenckwerck

g Ofte, vaten

h† and. waschuat

17

Den omhanck des voorhofs met synen pilaren ende voeten, ende het laken der poorte aen den voorhoue.

18

De naghels der wooninge ende des voorhofs met haren zeelen.

19

De kleederen des ampts ten dienste in den Heylighen, de heylighe kleederen Aaron des Priesters, met den kleederen syner soons, ten priesterdomme.

C.20

Doe ginck de gantsche menichte der kinderen Israel, wt van Mose.

21

Ende alle die het gheerne ende ghewillichlick gauen, quamen, ende brachten het heefoffer den Heere, ten wercke der hutten des bescheyts, ende tot alle synen diensten, ende totten heylighen kleederen.

22

So brachten nu beyde mans ende vrouwen, die het willichlick deden, ^i† gespen, oorringen, ringen ende spanselen, ^k† ende allerley gulden ghetuych: daertoe brocht een yeghelick goudt ter ^l beweginghe den Heere.

i† and. hechtsels oft armspansels

k† anders, welck getuych alles gulden was.

l dese twee woorden, heuen ende bewegen, moeten wy leeren gebruycken ende verstaen: want een offer oft gaue tot Godes dienst, heet daerom een heue ofte heefoffer, om dat men het den Heere stracx in de hoochde hief, doch beweginge heet, datmen herwaerts ende ginswaerts tooch in vier eynden, tegent Oosten, Westen, Zuyden, ende Noorden.

23

Ende wie daer hadde gele zijden, scharlaken, rosijnroot, witte zijden, geytenhayr, rootachtige ramsuellen, ende dassenuellen, die brochte het.

24

Ende wie siluer ende metael hief, die brocht het ter heeuinghe den Heere: ende wie vueren hout hadde, die brachte het tot alderley werck des Godsdiensts.

25

Ende welcker verstandige vrouwen waren, die wrochten met haren handen, ende brochten haer werck van gheler zijden, scharlaken rosijnroot, witter zijden.

26

Ende welcker vrouwen sulcke arbeyden konden, ende willich daertoe waren, die wrochten geyten hayr.

27

De Vorsten nu, brochten onich ende ingheuatede steenen, ten lijfrocke ende ten borstlappe,

28

Ende specerije ende olye tot den lichten, ende ter salue, ende tot goeden reuckwercke.

29

Also brochten de kinderen Israels vrijwillich, beyde, mans ende vrouwen tot allerley werck, dat de Heere gheboden hadde door Mose, datmen het maken soude.

D.30

Ende Mose sprack tot den kinderen Israel: ^{+ m} Siet, de Heere heeft bynamen gheroepen Bezaleel den sone Vri, des soons Hur, van den stamme Iuda,

+ Bezaleel.

m Exod. 31.a.2.

31

Ende heeft hem veruult met den geest Gods, dat hy wijs, verstandich, ende gheschickt zy tot allerley werck:

32

Konstlicken te arbeyden, van goude siluer ende ⁿ metael.

n Ofte, eerin oft koper.

33

Edele steenen te snijden, ende in te setten, hout te timmeren, te maken allerley konstlick arbeyt.

34

Ende heeft hem onderwijsinghe in zijn herte ghegheuen, ⁺ met tsamen Ahaliab, den sone Ahisamach van den stamme Dan.

+ Ahaliab.

35

Hy heeft hare herten met wijsheyt veruult, te maken allerley werck, te snijden, wercken, ende te sticken, met gheler zijden, scharlaken, rosijnroot, ende witter zijden: ende met weuen, dat sy maken allerley werck, ende konstlick arbeydt vinden.