Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxi. Capittel.

1. Wat werckmeesters den tabernakel maken sullen, 13. van houdinghe des Sabbaths, 18. ende gheuinghe der steenen tafelen.

A.1

ENde de Heere sprack met Mose: ende seyde:

2

^a Siet, ick hebbe by namen gheroepen Bezaleel den sone Vri, des soons Hur, van den stamme Iuda, ⁺

a Exod. 35.d.30. 1.Para. 2.c.20

+ Bezaleel.

3

^b Ende hebbe hem veruullet met den gheest Gods, met wysheyt ende verstant ende bekentenisse.

b 1.Reg. 7.b.14.

4

Ende met alderley werck, konstlicken te arbeyden, van goude, siluer, ^c† coper.

c† anders, eerin.

5

Konstlicken steenen te snijden ende in te setten, ende konstlicken te timmeren van houte, te maken allerley werck.

6

Ende hebbe hem toeghedaen Ahalias, ⁺ Ahisamachs sone, van den stamme Dan: ende hebbe allerley wijsen, de wijsheyt int herte ghegheuen, dat sy maken sullen, alles wat ick dy gheboden hebbe.

+ Ahalias.

7

^d De hutte des ^e‡ bescheyts, de Arcke des getuyghenisses, den Ghenadenstoel daerop, ende alle het ghereetschap der hutten.

d Exod. 25. 26. 27. 28. 30.

e‡ and. stifs

8

De tafel ende haer vaten, den fijnen luchter, ende alle zijn ghereetschap, den Reuckaltaer.

9

Den brantoffers altaer, met alle zijn ghereetschap, het hantuat met synen voete.

B.10

De ampts kleederen, ende de heylige kleederen des priesters Aaron, ende de kleederen syner sonen totten priesterdom.

11

De salfoly, ende het reuckwerck van specerije totten heylichdomme: alles wat ick dy geboden hebbe, sullen sy maken.

12

Ende de Heere sprack tot Mose, ende seyde:

13

Segghet den kinderen Israel, ende spreeckt: ^f Houdt mynen Sabbath: ⁺ want dieselue is een teecken, tusschen my ende v, op uwe nakomelinghen, dat ghy wetet, dat ick de Heere ben, die v heyliget.

f Exod. 20.a.8 Hesek. 20.b.12

+ Sabbath.

14

Daerom so houdet mynen Sabbath, want hy sal heylich zijn: ^g wie hem ontheylicht, die sal des doots steruen: want wie een ^h† arbeyt daer in doet, diens ziele sal wtgeroeyt worden van synen volcke.

g Num. 15.d.30.35

h† anders, werck

15

Ses daghen salmen arbeyden: maer aen den seuenden dach is de Sabbath, ⁱ de heylige ruste des Heeren: wie een arbeyt doet aen den Sabbath dach, die sal des doots steruen.

i Gene. 2.a.2.

16

Daerom sullen de kinderen Israels den Sabbath houden, dat sy hem oock by haren nakomelinghen houden, ten eeuwighen verbonde.

17

Hy is een eeuwich teecken, tusschen my ende den kinderen Israel: ^k want in ses dagen maecte de Heere Hemel ende Aerde, ende aen den seuenden daghe rustede hy, ende verquickte hem.

k Gene. 1.d.31. ende 2.a.2. Exod. 20.b.11.

18

^l Ende doe de Heere wtgesproken hadde met Mose, ⁺ op den berch Sinai, gaf hy hem twee tafelen des Ghetuyghenissen, die waren steenen, ende gheschreuen met den vingher Gods.

l Exod. 24.b.12 ende 32.b.15. Deut. 5.c.22. ende 9.b.10

+ Twee tafelen Mose.