Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvij.Capittel.

1. Uan den brantoffer ende syner toebehoorte, 9. van den voorhoue der wooninge, 20. van der olie ende lampen.

A.1

ENde salt eenen ^a Altaer maken van vueren houte ⁺ vijf ellen lanck ende breedt, dat hy gelijck viercantich zy, ende drye ellen hooch.

a Exod. 38.a.1. Hesek. 43.b.13

+ De brandoffer altaer met syner ghereedtschappe.

2

^b Hoornen saltu aen zijn vier hoecken maken, ^c† ende salten met ^d coper ouertrecken.

b Dat is, opgherichtede kleyne pilaren bouen met knopkens of bloemen.

c† anders, die sullen wt hem gaen, ende etc.

d Oft, eerin

3

Maect oock asch potten, schoeffelen, beckens, crauwelen, kolepannen: alle zijn ghereetschappe saltu van metael maken.

4

Du salt oock een metalen ^e traliewerck maken, als een nette, ende vier metalen ringen aen zijn vier hoecken.

e Ofte, schrenckwerck

5

Du saltse van beneden op, om den Altaer henen maken, dat het traliewerck reycke tot midden aenden Altaer.

6

Ende salt oock handtboomen maken tot den Altaer, van vueren houte met ^f† coper ouertogen.

f† anders, eerin

7

Ende salt de hantboomen inde ringen steken, dat de handtboomen zijn aen beyden zijden des Altaers, daermen hem mede draghen kan.

[fol. 28v]

8

Ende salten also van berderen maken, ⁺ dat hy inwendich hol zy, als dy op den berghe ghewesen is.

+ Den hof met syne ommehanghen.

9

Du salt oock der wooninghe eenen ^g hof maken, eenen omhanck van witter ghetweernders ^h† zijden: op eender zijden, hondert ellen lanck teghent Suyden.

g Oft, voorplane

h† and. lijnewaet

B.10

Ende twintich pilaernen, op twintich eerinnen voeten, ende hare knoopen met haren reepen van siluer.

11

Also oock tegent Noorden, sal zijn eenen omhanck, hondert ellen lanck, twintich pilaren op twintich ^* eerin voeten, ende haer knoopen met haren reepen van siluer.

* ofte, coper

12

Nu, teghent Westen, sal de breydde des hofs hebben eenen ommehanck, vijftich ellen lanck, thien pilaren op thien voeten.

13

Ende tegent Oosten sal de breydde des hofs hebben, vijftich ellen.

14

Also dat den omhanck hebbe op eener zijden, vijfthien ellen, daer toe drye pilaren op dryen voeten.

15

Ende noch eenmael vijfthien ellen, op der anderen zijden, daer toe drye pilaren op dry voeten.

16

Nu, in der poorte des hofs, sal een laken zijn, twintich ellen breedt, ghesticket van ^i‡ gheler zijden, scharlaken, rosijnroodt, ende witter ghetweernder ^k† zijden: daer toe vier pilaren op haren vier voeten.

i‡ anders, blauwe

k† anders lijnen

17

Alle pilaren rontom den hof, sullen silueren reepen ende silueren knoopen, ende eerine voeten hebben.

18

Ende de lengde des hofs, sal hondert ellen zijn, de breydde vijftich ellen, ⁺ de hoochde vijf ellen, van witter ghetweernder zijden, ende syne voeten sullen eerine zijn.

+ Olye ter Lampen.

19

Oock alle het ^l‡ ghereetschap der wooninghe tot allerley ampt, ende alle syne naghelen, ende alle naghelen des hofs, sullen eerine zijn.

l‡ anders, vaten

C.20

^m Ghebiet den kinderen Israel, dat sy tot dy brengen de aller reynste louterste olie, van olyboomen ghestooten om te lichten, diemen alletijt in de lampen giete.

m Leuit. 24.a.2

21

In der hutten des ^n‡ bescheydts, buyten den voorhanghe, die voor der Ghetuyghenisse hanghet: ende Aaron ende syne sonen, sullense toerichten, beyde des morghens ende des auondts voor den Heere: dat sal v een eewige wijse zijn, op uwe nacomelinghen, onder den kinderen Israel.

n‡ anders, stiftes Luth. Het Hebreisch woordt Moed, hebben wy niet anders weten noch willen verduytschen, Het sal doch so vele heeten, als een ghewisse plaetse ofte stede, als een Parochykercke ofte Stift, daer henen het volck Israel komen, ende Godes woort hooren souden: op dat sy niet na harer eygen aendacht henen ende weder liepen, op de bergen, in de dalen, ende aen andere plaetsen Gode te offeren.