Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvi.Capittel.

1. Uan der wooninge ende haren deckselen, 15. van berderen, 26. rijchelen, 31. ende voorhanghen.

A.1

DE ^a wooninghe saltu maken van thien tapijten wt ^b† witter getweernder zijden, ⁺ van gheler zijden, van scharlaken, ende rosijnroot: Cherubim saltu daer aen maken konstelick.

a Exod. 36.a.8

b† an. wit lijnen getwernt van blauwer zijden etce.

+ De wooninge, hutte, oft tabernakel.

2

De lengde eens tapijts, sal acht ende twintich ellen zijn, de breydde vier ellen, ende sullen alle thiene ghelijck zijn.

3

Ende sullen telcken vijue te samen gheuoecht zijn, een aen het ander.

4

Ende salt ^c† stricklitskens maken van gheler zijden, aen eens yegelicken tapijtshoeck, daer sy sullen te samen gheuoecht zijn, dat telcken twee ende twee, aen haren hoecken, te samen gheuatet worden.

c† Ofte strickoorkens.

5

Vijftich stricklitskens aen eenen yeghelicken tapijte, dat een aen het ander te samen vate.

6

Ende salt vijftich gulden ^d† hechtselen maken, daermen de tapijten mede te samen hechte, een aen het ander, op dat het een wooninge worde.

d† an. haecxkens

7

^e Du salt oock een decksel wt geyten hayr maken, ⁺ tot eender hutten ouer de wooninghe van elf tapijten.

e Exod. 36.b.19

+ Een decksel van 11. tapijten.

8

De lengde eens tapijts, sal dertich ellen zijn, de breydde vier ellen: ende sullen alle elue ghelijck groot zijn.

9

Vijue saltu aen malcanderen voeghen, ende sesse oock aen malcanderen, dat du het seste tapijt tweeuoudich makest voor aen der hutten.

B.10

Ende du salt aen eenen yeghelicken tapijte vijftich ^f† stricklitskens maken aen haren hoecken, dat sy aen malcanderen by den eynden geuoecht worden.

f† and. strickoorkens

11

Ende salt vijftich ^g† copere hechtsels maken, ende de hechtselen in de stricklitskens knoopen, dat de hutte te samen geuoecht, ende [een hutte] worde.

g† and. eerine

12

Nu, dat^h† daerouer is, aen den tapijten der hutten, saltu de helft laten ouerhangen, achter aen der hutten.

h† an. ouerlengde

13

Op beyden zijden eener ellen lanck, dat het ^i† ouerige zy op der hutten zijden, ende op beyden zijden haer bedecke.

i† anders, datter ouerschiet

14

Ouer dit decksel saltu een decksel maken van roodtachtighen ramsvellen: daer toe ouer haer een decksel van dasseuellen.

15

^k Du salt oock berderen maken tot der wooninghe van vueren houte die staen sullen. ⁺

k Exod. 36.c.20.

+ Berder.

16

Thien ellen lanck sal een bert zijn, ende anderhalue elle breedt.

17

Twee ^l† tappen sal een bert hebben, dat een aen het ander moghe gheset worden: also saltu alle berderen der wooninghe maken.

l† and. schroeuen

18

Twintich sullen harer staen teghent Suyden,

19

Die sullen veertich silueren voeten beneden hebben, telcken twee voeten onder eenen yeghelicken berde, aen synen tween tappen.

C.20

Also op der anderen zijden, teghent Noorden, sullen oock twintich berderen staen.

21

Ende veertich silueren voeten, telcken twee voeten onder eenen yeghelicken berde.

22

Nu, achter aen der wooninghe, teghent Westen, saltu ses berderen maken.

23

Daer toe twee berderen achter aen de twee hoecken der wooninghe.

24

Dat een yeghelick dier beyden, hen met synen hoeckberde van beneden op, te samen voeghe, ende bouen aen den hoofde, ghelijck te samen kome met eenen ringhe.

25

Dat daer acht berderen zijn, met haren silueren voeten, dier sullen sesthien zijn, telcken twee onder eenen berde.

26

Ende salt rijchels maken van vueren houte, vijue tot den berderen op eener zijden der wooninge, ⁺

+ Rijghelen

27

Ende vijue tot den berderen op der anderen zijden der wooninghe, ende vijue tot den berderen, achter aen de wooninghe teghent Westen.

28

Ende ^m† salt de rijchelen midden aen den berderen henen door stooten, ende alles te samen vaten, vanden eenen hoeck totten anderen.

m† and. de middelste rijgel sal inwendich door de berderen gaen, ende rijgelen van eenen eynde aen het ander.

29

Ende salt de breydde met goude ouertrecken, ende hare ringhen van goude maken, datmen de rijchelen daerin steke: ende de rijchels saltu met goude ouertrecken.

D.30

ⁿ Ende also saltu dan de wooninghe oprichten, na der wijse, als du gesien hebst op den berghe.

n Exod. 25.e.40

31

Ende saltu eenen voorhanck maken van ^o† geler zijden, ⁺ scharlaken ende rosijnroot, ende witter ghetweernder zijden, ende salt Cherubim daeraen maken konstelick.

o† and. blauwe

+ Voorhanck inden Tabernakel.

32

Ende salten hanghen aen vier pilaren van vueren houte, die met goude ouertoghen zijn, ende gulden knoopen, ende vier silueren voeten hebben.

33

Ende salt den voorhanck met haken aenhaken, ende de Arcke des Getuygenisse, ⁺ binnen inden voorhanck setten, dat hy v een onderscheydt zy, tusschen den Heyligen, ende den Alderheylichsten.

+ Twee delen of vloeren der hutten.

34

Ende salt den ^p† Genadenstoel setten op de Arcke des Ghetuygenissen, ⁺ in den Alderheylichsten.

p† anders, Ghenadendecksel.

+ Tafel.

35

De tafel settet buyten den voorhanck, ⁺ ende den luchter tegen de tafel ouer, tegent Suyden der wooninge, dat de tafel sta teghent Noorden.

+ Laken.

36

Ende salt een ^q† laken maken in de deure der hutten, ghesticket van gheler zijden, rosijnroot, scharlaken, ende witter ghetweernder zijden.

q† anders, doeck

37

Ende salt den seluen laken, vijf pilaren maken van vueren houte, met goude ouertogen, met gulden knoopen, ende salt hem vijf ^r† eerine voeten gieten.

r† anders, coperen oft metalen