Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv.Capittel.

1. De Heere heet hem maken van ghewilligen offeren een Heylichdom, 10. lade, kiste, oft Arcke, 17. ghenadenstoel, 18. twee Cherubim, 23. tafel, 35. ende luchter met haren toebehoorten.

1

ENde de Heere sprac met Mose, ende seyde:

2

Segt den kinderen Israel, ⁺ dat sy my een heefoffer gheuen: ende nemet desseluen ^a van yegelicken mensche, die het willichlic geeft.

+ Heefoffer.

a oft, yedermanne Exod. 35.a.5

3

Dat is nu het heefoffer dat ghy van hen nemen sult, gout, siluer, ^b† metalen.

b† anders, eerin

4

^c† Ghele zijde, scharlaken, rosijnroot, witte zijde, geyten hayr.

c† anders, blauwe

5

Rootachtige ramsvellen, dassenvellen, vueren hout:

6

Olie totter lampen, specerije ter saluen, ende goeden reuckwercke:

7

Onichsteen, ende gheuatede steenen, ten lijfrock ende ten borstlap.

8

Ende sy sullen my een Heylichdom maken, dat ick onder hen woone.

9

Als ick dy een ^d voorbeelt der wooninge, ende alles synes ghereetschaps wijsen sal, so sult ghy het maken.

d Mose betuycht hier dat zijn regiment soude ophouden, ende het recht endelick wesen, maer slechts een voorbeelt ende voorspel zijn des rijcx Christi, ende sonder allen twijfel heeft Christus hieruan met den tween iongeren tot Emaus gesproken. Luc. 24

B.10

Maect een ^e† kiste van vueren houte: twee ellen ende een half sal de lengde zijn, anderhalue elle de breyde, ende anderhalue elle de hoochde.

e† Anders, lade ofte arcke

11

Ende saltse met louteren goude ouertrecken, binnen ende buyten, ende maect bouen rontom eenen gulden crans.

12

Ende giet vier gulden ringen, ende maecktse aen hare vier hoecken also, dat twee ringen zijn, op eener zijden, ende twee op der anderen zijden.

13

Ende maect ^f hantboomen van vueren houte, ende ouertrectse met goude.

f Ofte, stanghe

14

Ende steectse in de ringhen aen de zijden der kisten, datmense daermede draghe.

15

Ende sullen in de ringhen blijuen, ende niet wtghetoghen worden.

16

Ende salt in de kiste, het Ghetuygenisse legghen, dat ick dy gheuen sal.

17

Du salt oock eenen ^g† Ghenadenstoel maken, ⁺ van louteren goude, twee ellen ende een half sal syne lengde zijn, ende anderhalf elle zijn breydde.

g† and. Genadendecksel

+ Genadenstoel.

18

^h Ende salt twee Cherubim maken van dichten goude, ⁺ tot beyden eynden des Genadenstoels.

h 1.Reg. 6.c.13

+ Cherubim.

19

Dat een Cherub zy aen desen eynde, de ander aen den anderen eynde: ende also twee Cherubim zijn, aen des Ghenadenstoels eynden.

C.20

Ende de Cherubim sullen hare vlueghelen wtbreyden, bouen oueral, dat sy met haren vluegelen den Genadenstoel bedecken, ende eens yegelicken ^i† aenschijn tegen den anderen sta, ende hare aenschijnen sullen op den Ghenadenstoel sien.

i† anders, andtlaet

21

Ende salt den Ghenadenstoel bouen op der kiste setten, ende in de kiste het Ghetuygenisse legghen, dat ick dy gheuen sal.

22

^k Van dier plaetse wil ick dy ^l betuygen, ende met dy spreken, namelicken, vanden Genadenstoel tusschen den twee Cherubim, die op der kisten der Ghetuyghenisse is, alles wat ick dy gebieden wil, aen de kinderen Israel.

k Num. 7.i.89. Roma 3.c.17 Hebr. 4.b.16

l Dat is, daer by, als by eenen ghewissen teecken ende getuygenisse wil ick dy weten laten, dat ick daer tegenwoordich ben, dat ick daerseluest spreken sal etcet.

23

^m Du salt oock eenen ^n† disch maken van vueren houte: twee ellen sal zijn lengde zijn, ende een elle zijn breydde, ende anderhalf elle zijn hoochde.

m Exod. 37.b.10.

n† anders, een tafel

24

Ende salten ouertrecken met louteren goude, ende eenen gulden crans rontomme maken.

25

Ende eenen lijst rontomme, eener hant breedt hooch, ende eenen gulden crans om den lijst rontom.

26

Ende salt vier gulden ringhen daer aen maken, aen de vier hoecken, aen synen vier voeten.

27

Hardt onder de lijsten sullen de ringen zijn, dat men hantboomen daerin steke, ende den disch drage.

28

Ende salt de hantboomen van vueren houte maken, ende haer met goude ouertrecken, dat den disch daer mede ghedraghen worde.

29

Du salt oock syne schotelen, ^o† bekeren, kannen, schalen, wt louteren goude maken, datmen daermede wt ende in giete.

o† anders, lepelen, halue rieten, met den welcken men reynighet, ende in de welcke ghegoten wert, wt etce. maken

D.30

^p Ende salt op den disch alle tijt schauwe brooden legghen voor my.

p Leuit. 24.a.5

31

^q Du salt oock eenen luchter van louteren dichten goude maken: ^{+ +} daer aen sal de schacht met rieten, ^r‡ koppen, knoopen, ende bloemen zijn.

q Exod. 37.b.17 Num. 8.a.2

+ Schouwbroot.

+ Luchter.

r‡ and. schalen of bekeren

32

Ses rieten sullen wt den luchter tot den zijden wtgaen, wt yeghelicker zijden drye rieten.

[fol. 28r]

33

Een yegelick riet, sal drye opene schalen, knoopen, ende bloemen hebben: dat sullen zijn de ses rieten wt den luchter.

34

Nu de schacht aen den luchter, sal vyer opene schalen met knoopen ende bloemen hebben.

35

Ende telcken eenen knoop onder twee rieten, ⁺welcker ses wt den ^s† luchter gaen.

+ Seueu lampen

s† and. candelaer

36

Want beyde hare knoopen ende rieten, sullen wt hem gaen, altemael een dicht louter gout.

37

Ende salt seuen lampen maken daer bouen op, dat sy teghen malcanderen luchten.

38

Ende lichtscheeren, ende demphoornen, van louteren goude.

39

Wt een ^t centner louters goudes saltu dat maken, met alle desen gereetschappe.

t Centener is dertich pondt gouts.

40

^u Ende siet toe, dat du het makest na haren ^x beelde, dat du op den berghe ghesien hebst.

u Heb. 8.a.5 Exod. 26.d.30. Act. 7.e.44

x Hy verhalet het hier ten anderen mael, dat hy daer bouen in desen ca. seyt: Het sullen al te mael ijdel voorbeelde ende figuren zijn met Mose: op dat het tweemael gheseyt, ymmers gewislic geloouet worde.