Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv.Capittel.

1. Moses met den mannen singhen den Heere eenen lofsangk, 20. sulckes doet oock Mir Iam met den vrouwen, 22. komen door de woestijne Sur tot Mara, daer murmureren sy ouer de bittere wateren, 25. de Heere leert het soet maken, ende vermaentse ter gehoorsaemheyt.

A.1

DOe ^a sangk Mose ende de kinderen Israels dit liedt den Heere, ⁺ ende spraken: ^b Ick wil den Heere singhen, want hy heeft een heerlicke daet ghedaen: peert ende waghenen heeft hy ^c ghestortet in de Zee.

a Sapien. 10.c.20

+ Mose ende alle Israeliten dancken God.

b Exod. 15.c.21.

c Ofte, te bodem geworpen

2

^d De Heere is mijn sterckte ende lofsangk, ende is mijn ^* salicheyt: dat is mijn God, ick wil hem prijsen: hy is mijns vaders God, ick wil hem verheffen.

d Psalm. 118.b.14. Iesai. 12.a.2

* ofte, hulpe

3

De Heere is de rechte krijchsman, Heere is synen naem.

4

De waghens Pharao, ende zijn macht, werp hy in de Zee, zijn ^e† wtghelesen hooftlieden versoncken inder ^f† Schelfzee.

e† and. wtuerkorene

f† anders, Rietzee

5

De diepte heeftse bedeckt, sy vielen te gronde als de steenen.

6

Heere dyne rechterhant doet groot wonder, Heere dyne rechterhant heeft de vyanden ^g† te morsele geslaghen.

g† Anders, verbroken

7

Ende met dyner grooter heerlickheyt, hebstu

[fol. 24v]

dyne wederpartie, ghestortet: want doe du dyne grimmicheyt wtlietest, verteerde syse als stoppelen.

8

Door dijn blasen ^h† deden hen de wateren op, ende de vloeden stonden op hoopen, de diepten wentelden van malcanderen, midden inder Zee.

h† anders, viel het water tesamen, de vloeden voeren op eenen hoop, de diepten ronnen te samen midden etcet.

9

De vyant dacht: Ick wil hen naiaghen, ende haer grijpen, ende den roof wtdeylen, ende mynen moet aen hen koelen: ick wil mijn sweert wttrecken, ende mijn hant salse verderuen.

B.10

Doe lietstu dynen wint blasen, ende de Zee bedectese, ende soncken onder, als loot in machtighe wateren.

11

Heere, wie is dy ghelijck onder den Goden? wie is dy ghelijck, die ^i† so machtich, heylich, verschrickelick, loeflick ende wonderdadich zy?

i† anders, heerlich inder heylicheyt,

12

Doe du dijn rechter handt wttrockest, so verslontse de Aerde.

13

Du hebst geleydet door dyne barmherticheyt dijn volck, dat du verlost hebst, ende hebtse gheuoert door dyne sterckte tot dyner heyliger wooninghe.

14

Doe dat de volcken hoorden, beefden sy, angst quam den Philisteen aen.

15

Doe verschrickten de vorsten Edom, beuen quam den gheweldighen Moab aen, ^k alle inwoonders Canaan werden vertzaecht.

k Iosua. 2.a.9. ende 5.a.1.Deut. 28.b.10.

16

Laet ouer haer vallen verschricken ende vreese, door dynen grooten arm, dat sy ^l† verstijuen als de steenen, tot dat dijn volck, Heere, henendoorkome, tot dat dijn volck henendoorkome, dat du verworuen hebst.

l† anders, stille swijghen

17

Brengtse inne, ende plantse op den berghe dijns erfdeels, dien du Heere dy ter wooninghe ghemaeckt hebst, tot dynen heylichdom Heere, dat dyne handt bereydet heeft.

18

De Heere sal Koninck zijn ymmer ende eewichlick.

19

Want Pharao tooch henen in de Zee, met peerden ende waghenen, ende ruyteren: ende de Heere liet de Zee weder ouer haer vallen: daerenteghen de kinderen Israel ginghen drooghe midden door de Zee.

C.20

Ende MirIam de Prophetinne Aarons suster, ⁺ nam een tamborijn in haer hant, ende alle vrouwen volchden haer na buyten, met tamborijnen aen reyen.

+ De vrouwen singen ooc lofsanghen.

21

Ende MirIam ^m sangk hen voor: ⁿ Laet ons den Heere singhen, want hy heeft een heerlicke daet gedaen, man ende peert heeft hy in de Zee ghestortet.

m Hebr. andtwoordde hen, namelick Mose ende den mannen.

n Exod. 15.a.1.

22

^o Mose liet de kinderen Israel trecken vander Schelfzee henen, ⁺ tot der woestijne Sur, ende sy wandelden drye daghen in de woestijne, ⁺ datsy gheen water en vonden.

o Num. 33.a.8.

+ Sur.

+ Bitter water te Mara

23

Doe quamen sy tot Mara: doch sy en konden van het water Mara niet drincken, want het was seer bitter: daer wt hietmen die plaetse Mara.

24

^p Doe murmureerde het volck teghen Mose, ende sprack: Wat sullen wy drincken?

p Mara heet bitter, ende beduydt lijden ende aenuechtinghe, welcker door het cruyce Christi in het gelooue oock soete worden. Mat. 11. Mijn ioc is soete Hier gaet alreede op sulcke heerlicke ende wonderlicke verlossinge, het murmureren aen.

25

Hy riep tot den Heere: ^q ende de Heere wees hem eenen boom, dien leyde hy int water, doe wert het soete: aldaer maecte hy hen een wet, ende een recht, ende ^r† beproefdese.

q Iudith. 5.b.15. Syrach. 38.a.5. 2.Reg. 4.e.41.

r† anders, temteerdese

26

Ende sprack: ^s Ist dat du wilt der stemmen des Heeren dynes Gods ghehoorsaem zijn, ende doen wat recht is voor hem, ende ter ooren vaten syne gheboden, ende houden alle syne wetten, so wil ick der kranckheden gheene op dy legghen, die ick op Egypten gheleyt hebbe: want ick ben de Heere dijn ^t† heylmeester.

s Deut. 28.f.59.

t† anders, Medicijn.

27

^u Ende sy quamen in Elim, daer waren twaelf waterfonteynen, ende tseuentich palmboomen, ende legherden aldaer aent water.

u Num. 33.a.9.