Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Het xi. Capittel.

1. De Heere heet de Israeliten, gulden ende silueren kleynodien ontleenen vanden Egyptenaren, 4. dien verkondicht Mose nu de leste plaghe, 9. Pharao blijft verstocket.

A.1

ENde de Heere sprack tot Mose: Ick wil noch een plaghe ouer Pharao ende Egypten laten komen, daer na sal hy v verlaten van hier: ende en sal niet alleene alles verlaten, maer v oock van hier drijuen.

2

^a So segt nu voor den volcke, dat een yegelick van synen ^b† naesten, ende een yeghelicke van harer ^c† naesten, silueren ende gulden cleynodien eyssche:

a Exod. 3.c.22. ende 12.d.35.

b† anders, nabuer

c† an. nabuerinne

3

Want de Heere sal den volcke genade geuen, voor den Egyptenaren: ^d ende Mose was een seer ^* groot man in Egyptenlant, voor den knechten Pharao, ende voor den volcke.

d Syrach. 45.a.1.

* Dat seydt hy daerom, dat het wonder is, dat hy niet gedoot is, vanden Egyptenaren, sy hebben hen moeten eenes ergeren ende oproers bevreesen.

4

Ende Mose sprack: So seyt de Heere: ^e Ick wil te middernacht wtgaen in Egyptenlant,

e Exod. 12.c.29.

5

Ende alle ^f† eerstgeboorte in Egyptenlant sal steruen, ^g vanden eersten sone Pharao aen, die op synen stoel sitt, tot aen den eersten sone der maghet die achter de meulen is, ende alle eerstgheboorte onder den vee. ⁺

f† anders, eerstgeboren

g Sapient. 18.a.5.

+ De tiende plaghe, de doot aller eerstgheboren.

6

Ende daer sal een groot gheschrey zijn in den gantschen Egyptenlande, desghelijcken noyt gheweest en is, noch zijn en sal.

7

Daerenteghen by allen kinderen Israel, en sal niet een hont zijn tonghe verrueren, vanden menschen aen tot aent vee: op dat ghy beuindet hoe de Heere Egypten ende Israel scheyde.

8

^h Dan sullen tot my af komen alle dese dyne knechten, ende my te voete vallen, ende seggen: Treckt wt, du ende alle het volck, dat onder dy is: daer na wil ick wttrecken: ende hy ginck van Pharao met grimmighen thoorne.

h Exod. 12.d.30.

[fol. 23r]

9

De Heere dan sprack tot Mose: Pharao en hoort v niet, op dat vele wonders geschieden in Egyptenlande.

10

Ende Mose ende Aaron hebben dese wonderen alle ghedaen voor Pharao: doch de Heere verstockte hem zijn herte, dat hy de kinderen Israel niet verlaten en woude wt synen lande.