Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Het vij. Capittel.

1. De Heere dreycht de Egyptenaers met swaren ende menigerley straffe, 6. met diens beuele gaen Mose ende Aaron wederom totten Coninck, 10.20. doen voor hem teeckenen, 11.22. ende dewijle hen oock de toouenaers het selue na doen met toouerie, 13.22. blijft hy ongehoorsaem ende verstockt.

A.1

DE Heere sprack tot Mose: Siet, ick hebbe dy eenen ^a God ghesettet ouer Pharao, ^b ende Aaron dijn broeder, sal dijn Propheet zijn.

a Ofte, Richter ouer etcet.

b Exod. 4.b.15.

2

Du salt spreken alles wat ick dy gebieden sal, ende Aaron dijn broeder, sal tot Pharao spreken: dat hy de kinderen Israel, wt synen lande verlate.

3

^c Doch ick wil Pharaos herte verharden, ⁺ dat ick myner teeckenen ende wonderen vele doe in Egypten lande.

c Exod. 4.c.21.

+ God verhardt Pharaos herte

4

Ende Pharao en sal v niet hooren, op dat ick myne hant in Egypten bewijse, ende leyde mijn heyr, mijn volck, de kinderen Israel, wt Egypten lant, door groote gherichten.

5

Ende de Egyptenaers sullen ghewaer worden, dat ick de Heere ben, wanneer ick myne hant ouer Egypten wtstrecken, ende de kinderen Israel, van hen wech leyden sal.

6

Mose ende Aaron deden, als hen de Heere gheboden hadde.

7

Ende Mose was tachtentich Iaer oudt, ⁺ ende Aaron dryentachtentich Iaer oudt, doe sy met Pharao spraken.

+ Mose ende Aarons ouderdom.

8

Ende de Heere sprack tot Mose ende Aaron: Wanneer Pharao tot v segghen sal: Bewijst uwe wonderen.

9

So saltu tot Aaron segghen: Neemt dynen staf, ende worpten voor Pharao, dat hy een slanghe worde.

B.10

Doe ginghen Mose ende Aaron henen tot Pharao, ⁺ ende deden also hen de Heere geboden hadde: ende Aaron werp synen staf voor Pharao, ende voor synen knechten, ende hy wert een slanghe.

+ Mose ende Aaron gaen tot Pharao.

11

Doe riep Pharao de wijsen ende toouenaers: ende de ^d Egyptische toouenaers deden oock also met haren besweeren.

d 1.Timot. 3.a.8.

12

Een yeghelick werp synen staf van hem, ende daer werden slanghen wt: doch Aarons staf verslont hare stauen.

13

Also wert dat herte Pharaos verstoct, ende en hoordese niet, ghelijck als de Heere gesproken hadde.

14

Ende de Heere sprack tot Mose: Het herte Pharaos is hardt, hy weygert hem het volck te verlaten.

15

Gaet henen tot Pharao morghen, siet, hy sal aent water gaen: so gaet hem onder de ooghen, aenden oeuer des waters, ende neemt den staf in dyne hant, die tot een slanghe wert,

16

Ende spreeckt tot hem: ⁺ De Heere der Ebreen God, heeft my tot dy ghesonden, ende dy laten segghen: ^e Verlaet mijn volck, dat het my diene inder woestijne: doch du hebst dus langhe niet willen hooren.

+ De eerste plage ouer Egypten lant. Water wort in bloedt verandert.

e Exod. 8.a.1. ende 9.b.13.

17

Daerom spreect de Heere also: Daeraen saltu beuinden, dat ick de Heere ben: Siet, ick wil met den staf, dien ick in myner hant hebbe het water slaen, dat in den stroom is, ende het sal in bloet verandert worden.

18

Dat de visschen inden vliet steruen sullen, ende de vliet stincken sal, ende den Egyptenaren sal walgen, te drincken vanden watere wt den vliete.

19

Ende de Heere sprac tot Mose: Segt Aaron:

[fol. 21v]

Neemt dynen staf, ende reckt dyne hant wt, ouer de wateren in Egypten, ouer hare beken, ende stroomen, ende ^f† stillen wateren, ende ouer alle waterputten, dat sy bloet werden, ende daer sy bloet inden gantschen Egypten lande, beyde in houten ende steenen vaten.

f† anders, zeen

C.20

Mose ende Aaron deden, als hen de Heere gheboden hadde: ^g ende hief den staf op, ende sloech int water, dat inden vliete was voor Pharao ende synen knechten, ^h ende alle het water inden vliete, wert in bloet verandert.

g Exod. 14.b.16. ende 17.a.5.

h Psalm. 78.e.44 ende 105.c.29.

21

Ende de visschen in den vliete storuen, ende de vliet wert stinckende, so dat de Egyptenaers niet drincken konden vanden watere wt den vliete: ende daer was bloet inden gantschen Egypten lande.

22

ⁱ Ende de Egyptische toouenaers deden oock also, met haren besweeren: also wert het herte Pharao verstockt, ende en hoordese niet, ^k ghelijck de Heere ghesproken hadde.

i Exod. 8.a.7. Sapient. 17.a.7.

k Exod. 4.c.21. ende 7.a.5.

23

Ende Pharao keerde hem, ende ginck na huys, ende en keerde zijn herte daer niet aen.

24

Doch alle Egyptenaers groeuen na water, omtrent alle riuieren, om te drincken.

25

Ende dat duerde seuen daghen lanck, dat de Heere het vliet ende water sloech.