Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Het ij. Capittel.

1. Mose gheboren, 3. werdt op het water gheleydt, 5. de dochter Pharaos treckt hem wt, ende voedt hem op, voor haren Sone, 11. groot gheworden, doet hy een monster synes toekoemstigen ampts aen syne broederen, 15. moet vluchten in Midian, 21. ende hem werdt Zipora ten wijue, 24. God hoordt der kinderen Israels gheschrey.

A.1

ENde ^a een man van den huyse Leui ginc henen ende nam een dochter Leui. ⁺

a Exod. 6.b.19. Num. 26.f.59. 1.Para. 23.b.13.

+ Moses wordt gheboren.

2

^b Ende de vrouwe wert ^c swangher, ende baerde eenen sone: ende doe sy sach, dat het een fijn kint was, verberch sy hem dry maenden.

b Act. 7.c.20 Heb. 11.c.23.

c Ofte, met kinde

3

Ende doe sy hem niet langher verborgen konde, maeckte sy een kiste van riete, ende bekleefdese met leem ende pec, ende leyde het kint daer in, ende leyde hem int ^d† riet aen den oeuer des waters.

d† anders, biessen ofte lis.

4

Doch zijn suster stont van verre, dat sy vernemen wilde, hoe het hem gaen soude.

5

^e Ende de dochter Pharaos ginck neder, ^f dat sy badede in den water, ende hare ionckfrouwen ginghen aen den kant des waters: ende doe sy de kist in het riet sach, sandt sy haer maecht henen, ende liet se halen.

e Act. 7.c.21 Heb. 11.c.23

f 2.Sam. 11.a.2. Susan. b.15.

6

Ende doe sy se opdede, sach sy het kint: ende siet, het knechtken weendde: doe iammerde het haer, ende sprack: Het is een der Hebreischen kinderkens.

7

Doe sprack syne suster tot der dochter Pharao: Sal ick henen gaen, ende eene der Hebreischer wijuen roepen, die daer soocht, dat sy dy dat kindeken sooghe?

8

De dochter Pharaos sprack tot haer: Gaet henen: de maecht ginck henen, ende riep des kints moeder.

9

Doe sprack Pharaos dochter tot haer: Neemt dat kindeken henen, ende soocht het my, ick wil dy loonen: het wijf nam het kindeken, ende soochde het.

B.10

Ende doe het kindeken was groot geworden, brachte sy het der dochter Pharao: ende het werdt haer sone, ende hiet hem ^g Mose: want sy sprack: Ick hebbe hem wt den water ghetoghen.

g Masa heet trecken: daeruan heet Mose ghetogen, namelick wt den water.

11

^h Te dien tijden, doe Moses was groot gheworden, ginck hy wt tot synen broederen, ende sach haren last: ende wert gewaer dat een Egyptenaer, ⁺ eenen syner broederen der Hebreischen sloech.

h Hebr. 11.c.24.

+ Mose ijuer.

12

Ende hy wende hem herwaert ende ginswaert: ende doe hy sach dat daer geen mensche en was, versloech hy den Egyptenaer, ende verberchden int zant.

13

Op eenen anderen dach ginck hy oock wt, ende sach twee Hebreische mannen te samen twisten: ende sprack tot den ongherechten: Waerom slaestu dynen naesten?

14

Hy daerenteghen sprack: ⁱ Wie heeft dy tot ouersten ofte richter ouer ons ghesettet? Wiltu my oock dooden, als du den Egyptenaer ghedoodet hebst? doe vreesde hem Mose, ende sprac: Hoe is dat luytbaer gheworden?

i Gene. 19. Matth. 21.c.23. Act. 4.a.7. ende 7.c.27.

15

Ende het quam voor Pharao, die ^k† stondt na Mose, dat hy hem doodde: ^l doch Mose vloot voor Pharao, ⁺ ende onthielt hem in den lande Midian, ende ^m† woonde by eenen waterputte.

k† and. trachtede

l Hebr. 11.c.27.

+ Mose vlucht voor Pharao in Midian.

m† anders, settede hem

16

Ende de priester in Midian hadde seuen dochteren, die quamen om water te halen, ende vulden de drenckgoten, om de schapen haers vaders te drencken.

17

Doe quamen de herders, ende stietense daer van: doch Mose maecte hem op, ende halp hen, ende drenckte hare schapen.

18

Ende doe sy tot haren vader Reguel quamen, sprac hy: Hoe zijt ghi heden so geringe gekomen?

19

Sy spraken: Een Egyptisch man ^n† verlossede ons van den herders, ende vulde ons water, ende drenckte de schapen.

n† Anders, Halp

C.20

Hy sprack tot synen dochteren: Waer is hy? Waerom lietet ghy den man v gaen, ^o† dat ghy hem niet noodichdet, met ons te eten?

o† anders, roept hem op dat hy broot ete, anders, met ons ete.

21

Ende Mose bewillichde by den manne te blijuen: ^{+ p} ende hy gaf Mose syne dochter Zipora.

+ Zipora Mose wijf.

p Num. 12.a.1.

22

Die baerde eenen sone, ^q ende hy hiet hem ^r Gersom: want hy sprack: Ick ben een vreemdelinck geworden in vreemden lande. ^s [Ende sy baerde noch eenen soon, dien hiet hy ^t Elieser, ende sprac: De God mynes vaders is mijn helper, ende heeft my van der hant Pharao verlosset.]

q Exod. 18.a.3 1.Para. 23.b.15.

r Gersom heet een vreemt man ofte wtlander.

s Dit is niet inden Hebreischen.

t Elieser heet God mijn helper.

23

Lange tijt daerna, sterf de Koninck in Egypten, ende de kinderen Israel suchteden ouer haren arbeydt ende schreyden, ende haer schreyen ouer haren arbeyt, quam voor God. ⁺

+ God verhoort het schreyen om zijns verbonts willen.

24

^u Ende God verhoorde hare weeklaghen, ende dachte aen ^x zijn verbont met Abraham, Isaac, ende Iacob.

u Iudic. 2.b.18.

x Gene. 17.a.2.

25

Ende hy sach daerin, ende nam hem haerder aen.