Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat l. Capittel.

1. Na den balsemen ende rouwe draghen ouer Iacob, 7. Treckt Ioseph met grooten state opwaert in het landt Canaan aldaer synen vader te begrauen, 15. Iosephs broederen besorghen hen van weghen harer misdaedt, ende bidden ootmoedichlick om ghenade, 19. Ioseph neemtse lieflicken aen, vertroostese met Godes voorsichticheydt, die haer boos voornemen ten besten veler ghewendt hebbe, ende scydt hen alle hulp ende bystandt toe, 24. Ende voorseydt hen haren wederkeeren in het landt Canaan, gheeft een ernstlick beuel syne ghebeente mede henen te voeren, ende ghestoruen, wordt in Egypten begrauen.

A.1

DOe viel Ioseph op zijns vaders aengesichte, ende weende ouer hem, ende kuste hem.

2

Ende Ioseph beual synen knechten den Medecijnen, dat sy synen vader salueden, ende de Medecijnen salfden Israel.

3

Tot dat de veertich daghen om waren, want so lange ^a† waren de salfdagen, ende de Egyptenaren beweenden hem tseuentich daghen.

a† anders, dueren

4

Doe nu de roudagen om waren, sprac Ioseph met Pharaos gesinde, ende seyde: hebbe ick genade voor v gheuonden, so spreeckt met Pharao ende segghet:

5

Mijn vader heeft eenen eedt van my genomen,

[fol. 19r]

ende gheseyt: ^b Siet, ick sterue, begraeft my in mynen graue, dat ick my in den lande Canaan ghegrauen hebbe: so wil ick nu op trecken, ende mynen vader begrauen, ende wederom komen.

b Gene. 47.c.29.

6

Pharao sprack: Treckt op, ende begraeft dynen vader, als du hem ghesworen hebst.

7

Also tooch Ioseph op, synen vader te begrauen, ende alle knechten Pharaos, de oudtsten synes huyses, ende alle oudtsten des landes Egypten toghen met hem.

8

Daertoe het gantsche gesinde Iosephs, ende syne broeders, ende het ghesinde synes vaders: alleen hare kinderen, schapen ende ossen, lieten sy in den lande Gosen.

9

Ende daer toghen oock met hen op, wagens ende reysighers, ende het was een seer groot heyr.

B.10

Doe sy nu in de plaen Atad quamen, die op geenzijdt den Iordane leyt, daer hielden sy een seer groote ende bittere klage: ^c ende hy droech ouer synen vader rouwe, seuen daghen.

c Syrach. 22.b.13.

11

Ende doe de lieden in den lande, de Cananiters, saghen, dat rouwe dragen in den plane Atad, spraken sy: De Egyptenaers houden daer groote klaghe: daerwt heetmen die plaetse, Der Egyptenaers klage, welck leyt op geen zijde der Iordane.

12

Ende syne kinders deden ^d als hy hen beuolen hadde.

d Gene. 49.c.29.

13

^e Ende voerden hem int lant Canaan, ⁺ ende begroeuen hem in der tweeuoudige speloncke des ackers, ^f die Abraham gekocht hadde, met den acker, ter erfbegrauenisse, van Ephron den Hethiter teghen Mamre.

e Act. 7.b.16.

+ Iacob wort begrauen in den lande Canaan.

f Gene. 23.b.16.

14

Als sy hem nu begrauen hadden, tooch Ioseph wederom in Egypten, met synen broederen, ende met allen, die met hem op ghetoghen waren, synen vader te begrauen.

15

Ende de broeders Iosephs vreesden hen, doe haer vader ghestoruen was, ende spraken: Ioseph mochte ons ^g gram zijn, ende betalen alle boosheyt die wy aen hem ghedaen hebben.

g Ofte hatisch, vyandt

16

Daerom lieten sy hem segghen: Dijn vader beual voor synen doot, ende sprack:

17

Also sult ghy Ioseph segghen: Lieuer, vergheeft dynen broederen de misdaedt ende hare sonden, dat sy so qualick by dy ghedaen hebben: lieuer, so vergheeft nu dese misdaet ons, den dienaren des Gods dynes vaders: ende Ioseph weende, doe sy sulcks met hem spraken.

18

Ende syne broeders ginghen henen, ende vielen voor hem neder, ende spraken: Siet, wy zijn dyne knechten.

19

^h Ioseph sprac tot hen: Vreest v niet: ^i† want ick ben onder Gode.

h Gene. 45.a.5.

i† Anders, ben ick dan aen Godes statt?

C.20

Ghy dachtet het boos met my te maken, daerenteghen God dacht het goet te maken, dat hy dede, als het nu aen den daghe is, ^k te behouden vele volckes.

k Of, op te houden Gene. 45.b.15. ende 49.c.25.

21

So vreeset v nu niet, ick wil v versorgen ende uwe kinders: ende hy troostedese, ende sprack vriendelicken met hen.

22

Also woonde Ioseph in Egypten met synes vaders huys, ⁺ ende leefde hondert ende thien iaer.

+ Iosephs ouderdom 110. Iaer.

23

^l Ende sach Ephraims kinderen tot in het derde lidt: desseluen gelijcken de kinderen Machir, Manasses soons, ^m† baerden ooc kinderen op Iosephs schoot.

l Num. 32.d.39. Iob 42.b.16. Psalm. 128.a.6.

m† anders, werden gheboren etcet.

24

Ende Ioseph sprack tot synen broederen: ⁿ Ick sterue, ende God sal v te huys soecken, ende wt desen lande voeren in het lant, dat hy Abraham, Isaac ende Iacob, ghesworen heeft.

n Hebr. 11.c.22.

25

^o Daerom nam hy eenen eedt van den kinderen Israel, ende sprack: Wanneer v God te huys soecken sal, so voert mijn ghebeente met v van hier.

o Exod. 13.b.19. Iosua. 24.d.32. Act. 7.b.16.

26

Also sterf Ioseph, doe hy was hondert ende thien iaer oudt: ende sy salfden hem, ende leyden hem in een ^p† schrijn in Egypten.

p† anders, kiste