Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xl. Capittel.

1. Ioseph leyt den tween geuangenen hare droomen wt, ende seyt wat hen beieghenen soude, 29. de daedt maket de wtlegginghe waer, 23. de schencker blijft ondanckbaer.

A.1

ENde het ghebeurde daerna, ⁺ dat hen versondichden, de schencker des Konincks in Egypten, ende de backer, aen haren heere, den Koninck in Egypten.

+ Oorsaecke Iosephs verlossinghe.

2

Ende Pharao wert toornich ouer syne beyde Kamerlinghen, ouer den ^a† amptman ouer de schenckers, ende ouer den amptman ouer de backers:

a† Anders, ouersten schencker ende den ouersten backer.

3

Ende liet se setten in des hofmeesters huys in de gheuanckenisse, daer Ioseph gheuanghen lach.

4

Ende de hofmeester settede Ioseph ouer hen dat hy hen diende: ende sy saten ^b† sommighe daghen in de gheuanckenisse.

b† anders, een tijt lanck. anders, een iaer lanck.

5

Ende hen droomde beyde, den schencker ende backer des Konincks in Egypten, ⁺ in eener nacht, eenen yegelicken eenen eygenen droom, ende eenes yeghelicken droom hadde syne beduydinghe.

+ Des Ouersten Schenckers ende Backers droomen.

6

Doe nu des morghens Ioseph tot hen daerin quam, ende sach dat sy truerich waren,

7

Vraechde hy se ende sprack: Waerom zijt ghy heden so bedroeft?

8

Sy antwoordden: Ons heeft gedroomt, ende en hebben nimant die het ons wtlegghe. Ioseph sprack: Wtleggen behoort Gode toe: doch vertelt het my.

9

Doe vertelde de ouerste schencker synen droom Ioseph, ende sprack tot hem: My heeft gedroomt, dat een wijnstock voor my was,

B.10

Die hadde dry rancken, ende hy groende, wies ende bloeyde, ende syne druyuen werden rijp.

11

Ende ick hadde den beker Pharaos in mijnder hant, ende nam de ^c† besien, ende ^d drucktese wt in den beker, ende gaf den beker Pharao in de hant.

c† And. druyuen

d drucktese gantsch in tween.

12

Ioseph sprack tot hem: ⁺ Dat is syne beduydinghe: Dry rancken, zijn dry daghen.

+ Ioseph beduydet den ouersten Schencker ende Backer des Pharao, hare droomen.

13

Na dryen daghen sal Pharao dijn hooft verheffen, ende dy wederom aen dijn ampt setten, dat du hem den beker in de hant gheuest, na der vorigher wijse, doe du zijn schencker warest.

14

Doch ghedenckt myner, wanneer het dy wel gaet, ende doet barmherticheydt aen my, dat du het Pharao vermanest, dat hy my wt desen huyse brenghe.

15

Want ick ben wt den lande der Hebreen heymelick ghestolen: daertoe en hebbe ick oock hier niet ghedaen, dat sy my souden hier inghesettet hebben.

16

Doe de ouerste backer sach, dat de beduydinghe goet was, sprack hy tot Ioseph: My heeft oock eenen droom gedroomt: dat ick droech dry ^e† witte koruen op mijn hooft,

e† Anders, gheulochtene.

[fol. 15r]

17

Ende in den ouersten korf allerley gebacken spijse voor Pharao, ende de vogels aten wt den korf op mijn hooft.

18

Ioseph antwoordde ende sprac: Dat is syne beduydinghe: Dry koruen, zijn dry daghen.

19

Ende na drye daghen sal dy Pharao dynen kop verheffen, ende dy aen de galghe hangen, ende de vogelen sullen dijn vleesch van dy eten.

C.20

Ende het geschiedde des derden daechs, ^f doe hielt Pharao synen ^g† iaersdach: ende hy maeckte een maeltijt allen synen knechten, ende verhief het hooft des ouersten schenckers, ende het hooft des ouersten backers onder synen knechten.

f Matth. 14.a.6.

g† And. geboorten dach

21

Ende settede den ouersten schencker wederom tot synen schenckampte, dat hy den beker gheue in Pharaos hant.

22

Daerenteghen den ouersten backer liet hy hanghen, als hem Ioseph beduydet hadde.

23

Doch de ouerste schencker ghedachte niet aen Ioseph, maer vergat syner.