Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 14v]

Dat xxxix. Capittel.

1. Ioseph wert van synen heere ghelieuet. 7. van der vrouwen tot onordentlicker liefde ghetercht, 12. ende so hy haer niet verwilliget, valschelicken beschuldicht, 20. Ende gheuanghen, 21. van den Heere wordt hy vertroostet, ende oock in de gheuanckenisse verheuen.

A.1

IOseph wert af in Egypten gheuoert, ⁺ ende Potiphar een Egyptisch man, des Pharao Camerlinck ende hofmeester, kocht hem van den Ismaeliten, die hem af brachten.

+ Ioseph wordt in Egypten verkocht. Gen. 37.c.28.d.36 Psalm. 105.b.17.

2

Ende de Heere was met Ioseph, dat hy een ghelucksalich man werdt, ende was in synes heeren des Egypternaers huyse.

3

Ende zijn heere sach, dat de Heere met hem was: want alles wat hy dede, dat liet de Heere gelucklicken voort gaen door hem.

4

Also dat hy ghenade vant voor synen heere, ende zijn dienaer wert: die settede hem ouer zijn huys, ende alles wat hy hadde, dede hy onder syne handen.

5

^a Ende van dier tijdt aen, doe hy hem ouer zijn huys, ende alle syne goeden gesettet hadde, segende de Heere des Egypteneers huys om Iosephs willen: ende het was enckel seghen des Heeren, in alles wat hy hadde, te huys ende te velde.

a Gene. 30.c.27. Iesai. 45.a.3.4.

6

Daerom liet hy het al onder Iosephs handen, wat hy hadde: ende hy ^b† nam hem geens dings aen, dewijle hy hem hadde, dan dat hy att ende dranck: ^c ende Ioseph was schoon ende fijn van aenghesichte.

b† Anders wiste van gheenerleye niet, dan alleene Uan de spijse die hy att.

c 1.Sam. 16.b.12.19.

7

Ende het ghebeurde na ^d dese gheschiedenisse, dat synes heeren wijf hare oogen op Ioseph werp, ende sprack: Slaept by my.

d Ofte desen gheschichte,

8

Hy weygerde het haer, ende sprack tot haer: Siet, mijn heere neemt hem gheens dings aen voor my, wat in den huyse is, ende alles wat hy heeft, dat heeft hy onder myne handen gedaen,

9

Ende ^e heeft niet so groot in den huyse, dat hy voor my verhouden hebbe dan dy, ^f om dat du zijn wijf bist: hoe soude ick dan nu een sulck groot quaet doen, ende teghen God sondigen?

e niemandt is so groot in dynen huyse als ick, ende hy heeft niet verborghen voor my dan dy, want du bist zijn etc.

f anders so moeste hy oock de vrouwe versorgen also wel als het gantsche huys: behaluen dat hy niet by haer slapen soude.

B.10

Ende sy dreef sulcke woorden tegen Ioseph daghelicks: doch hy hoorde haer niet, dat hy na by haer sliepe, noch by haer ware.

11

Het ghebeurde op eenen dach, dat Ioseph in het huys ginck, zijn werck te doen, ende gheen mensche van den ghesinne des huyses was daerby:

12

Ende sy greep hem by synen kleede, ende sprack: ⁺ Slaept by my: doch hy liet het kleedt in harer hant, ende vloot, ende liep ten huyse wt.

+ Teghen het ouerspel ende oncuyscheydt een treflick exempel.

13

Doe sy nu sach, dat hy zijn kleet in haer hant liet, ende wt ontuloot,

14

Riep sy het ghesinne in den huyse, ende sprack tot hen: Siet, hy heeft ons den Hebreischen man hierin ghebracht, dat hy ons te ^g† schanden make: hy quam tot my hierin, ende wilde by my slapen: ^h† so riep ick met luyder stemmen.

g† Anders, spotte

h† an. ick riep

15

Ende doe hy hoorde dat ick een gheschrey maeckte ende riep: doe liet hy zijn kleet by my, ende vloot, ende liep wt.

16

Ende sy leyde zijn kleet by haer, tot dat zijn heere te huys quam,

17

Ende seyde tot hem euen de selue woorden, ende sprack: De Hebreische knecht, dien du ons hierin ghebracht hebst, quam tot my hierin, ende wilde my te schanden maken.

18

Doe ick nu een geschrey maeckte, ende riep: doe liet hy zijn kleedt by my, ende vloot.

19

Als zijn heere hoorde de reden synes wijfs, die sy hem seyde, ende sprack: Also heeft my de Hebreische knecht gedaen, wert hy seer toornich.

C.20

ⁱ Doe nam hem zijn heere, ende leyde hem in de gheuanckenisse, daer des Konincks gheuanghen inne laghen: ende hy lach daer in der gheuanckenisse.

i Psalm. 105.b.18.

21

^k Doch de Heere was met hem, ende neychde syne ^l hulde tot hem, ende liet hem ghenade vinden voor den amptman ouer de gheuanckenisse.

k Psalm. 105.b.19 Sapien. 10.b.13.

l Ofte barmherticheyt

22

Dat hy hem onder syne hant beual alle gheuanghenen in der gheuanckenisse: op dat alles wat daer gheschiedde, door hem gheschieden moeste.

23

Want de amptman ouer de gheuanckenisse ^m† nam hem geens dincks aen: want de Heere was met Ioseph, ende wat hy dede, daer gaf de Heere gheluck toe.

m† Anders, sach niet in syner hant