Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxviij. Capittel.

1. Uerhouwelickinghe Iuda ende syne kinderen. 7. sonde ende straffe der beyder Oudesten. 11. Thamar weduwe. 18. Wert beslapen van Iuda haren Sweer. 27. Darewt komen Pherez ende Serah.

A.1

HEt ghebeurde omtrent de selue tijdt, ⁺ dat Iuda af tooch van synen broederen, ende gaf hem tot eenen manne te Odollam, die heet Hira.

+ De linie Christi van Iacob door Iudam.

2

^a Ende Iuda sach aldaer eenes Cananiters mans dochter, die hiet Suha, die nam hy, ende besliepse.

a 1.Para. 2.a.3.

3

Doe wert sy met kinde, ende baerde eenen sone, die hiet hy ^b† Ger. ⁺

b† anders Er Num. 26.b.19.

+ Iudas Soons.

4

Ende sy werdt daerenbouen met kinde, ende baerde eenen sone, die hiet sy Onam.

5

Sy baerde noch eenmael eenen sone dien hietse Sela: ende ^c† sy was te Chesib, doe sy hem baerde.

c† And. hy, and. sy hielt op te baren doe etcet.

6

Ende Iuda gaf synen eersten sone Ger een wijf die hiet Thamar.

7

Doch hy was boos voor den Heere, ⁺ daerom doodde hem de Heere.

+ Thamar.

8

Doe sprack Iuda tot synen sone Onam: ^d legghet dy tot dynes broeders wijf, ende neemtse ten houwelicke, dat du dynen broeder zaedt verweckest.

d Deut. 25.a.5. Matth. 22.c.24.

9

Doch doe Onam wiste, ⁺ dat het zaet niet zijn eygen zijn soude, als hy hem tot synes broeders wijf leyde, liet hy het op de aerde vallen, ende verdarf het, op dat hy synen broeder gheen zaet en gheue.

+ Merckt dese grouwelicke straffe teghen de onnatuerlicke sonde.

B.10

Doe beuiel het den Heere qualic dat hy dede, ende doodde hem oock.

11

Doe sprack Iuda tot zijns soons wijf Thamar: blijft een weduwe in dynes vaders huyse tot dat mijn sone Sela groot wordt, want hy dachte misschien mochte hy oock steruen, als syne broeders: also ghinck Thamar henen, ende bleef in haers vaders huyse.

12

Doe nu vele daghen verloopen waren, sterf des Suha dochter, Iudas wijf, ende als Iudas wtgetreurt hadde, ginck hy opwaert om ^e syne schapen te bescheeren na Thimnath, met synen ^f herder Hira van Odollam.

e Gene. 31.b.19. 2.Sam. 13.c.23.

f Het mach oock heeten (vriendt) daerna als de puncten in den Hebreeuschen hen laten setten: want Iudas heeft ymmers moeten weyde hebben, mischien oock eens vrients niet onbeeren konnen. De puncten konnen also wel feylen als treffen. Ut Iesaias 7. et sepe alias.

13

Doe werdt der Thamer gheseydt: Siet, dijn sweer gaet op na Thimnath, syne schapen te bescheeren.

14

Doe leyde sy de weduwen kleeders van haer, die sy droech, ^g† bedecte haer met eenen mantel, ende vermaeckte haer, ende settede haer buyten ^h† voor de poorte, aen den wech na Thimnath: want sy sach dat Sela was groot gheworden, ende sy en was hem niet ten wijue ghegheuen.

g† Anders. verhulde

h† Anders poorte der fonteyne, etce.

15

Doe se nu Iuda sach, meynde hy, het waer een hoere: want sy hadde haer aenghesichte bedeckt.

16

Ende maeckte hem tot haer aen den wech, ende sprack: Lieue, laet my by dy ligghen: want hy en wiste niet dat het synes soons wijf was: sy antwoordde: Wat wiltu my gheuen, dat du by my ligghest?

17

Hy sprack: Ick wil dy eenen geytenbock van der cudde senden: sy antwoordde: So gheeft my een pant tot dat du het my sendest.

18

Hy sprack: Wat wiltu voor een pant, dat ick dy geue? sy antwoordde: Dynen rinck, ende dijn snoer, ende dynen staf, dien du in dyne handen hebst: doe gaf hy het haer, ende ⁱ lach by haer, ende sy wert van hem met kinde.

i Leuit. 18.b.15.

19

Ende sy maecte haer op, ende ghinck henen, ende leyde den mantel af, ende tooch hare weduwenkleeders wederom aen.

C.20

Doch Iuda sandt den geytenbock, door synen herder van Odollam, op dat hy het pant wederom haelde van den wijue, ende hy en vantse niet.

21

Doe vraechde hy den lieden der seluer plaetse, ende sprack: Waer is die hoere, die daer buyten aen den wech sat? Sy antwoordden: Daer en is gheen hoere gheweest.

22

Ende hy quam weder tot Iuda, ende sprack: Ick en hebse niet gheuonden: daertoe seggen de lieden derseluer plaetse, dat daer geen hoere geweest en zy.

23

Iuda sprac: ^k† Sy hebbet henen: ^l† sy kan ons doch gheen schande na segghen: want ick hebbe den bock gesonden, so hebstuse niet gheuonden.

k† And. sy houde het pant tot haer etcet.

l† Anders dat wy niet misschien te schande worden.

24

Na dryen maenden werdt Iuda aengheseyt: Dijns soons wijf Thamar, heeft hoererie bedreuen, daertoe siet, sy is van hoererie met kinde geworden. Iuda sprack: Brengt se hiervoor, dat sy verbrant worde.

25

Ende doe men se voordt bracht, schicktede sy tot haren sweer, ende sprack: Van dien man ben ick met kinde, diens dit is: ende sprac: Kenstu oock, wiens desen rinck, ende dit snoer, ende desen staf is?

26

Iuda bekende het, ende sprack: Sy is rechtueerdigher dan ick: want ick hebse niet ghegheuen mynen sone Sela: doch en besliep hy se niet meer.

27

^m Ende doe sy baren soude, werden tweelinghen in haeren lijue gheuonden.

m 1.Para. 2.a.4. Matt. 1.a.3.

28

Ende als sy nu baerde, gaf haer een hant wt: doe nam de vroeyvrouwe, ende bant eenen rooden draet daeromme, ende sprack: Die sal de eerste wt komen.

29

Doe die nu syne hant weder in tooch, quam zijn broeder wt: ende sy sprack: Waerom hebstu om dynent willen sulcke rete ghereten? Ende men hieten ⁿ Perez.

n Parez heet een verrijter, oft verscheurder. 1.Para. 2.a.4. ende 4.a.1.

30

Daerna quam zijn broeder wt, die den rooden draet om zijnder hant hadde, ende men hiet hem ^o Serah.

o Serah heet opganck.