Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxvij. Capittel.

1. Seden Iacobs, ende liefde teghen synen sone Ioseph, 4. dootlicke haet syner anderen kinderen tegen den seluen, wt oorsake synes aengheuens ende droomens, 18. haer moorddadighe wreedtheyt ende boosheyt, 13. die haer oock tot op haren eygenen vader bestreckt, 28. Ioseph wert verkocht den Midianiteren, 36. die verkoopen hem voort in Egypten

A.1

IAcob woonde in den lande, daer zijn vader een vreemdelinck inne geweest was, naemlick in den lande Canaan.

2

Ende dat zijn de ^a† geslachten Iacobs: Ioseph was seuenthien iaer oudt: doe hy een herder des vees wert met synen broederen: ⁺ ende de ionghe was by den kinderen Bilha ende Silpa, synes vaders wijuen, ende bracht voor haren vader wanneer daer een boos gheruchte teghen hen was.

a† And. geboorte and. geschiedenissen.

+ Ioseph.

3

Israel hadde Ioseph lieuer, dan alle syne kinderen, daerom dat hy hem in zijn ouderdom gegenereert hadde, ende maeckte hem eenen ^b† bonten rock.

b† Anders veeluerwigen ofte gedeylden. De Rock Iosephs van menigerley verwen ende draden beduydt de menigerley genade ende gauen des eenigen Gheests in Christo ende synen Christenen. Act. 7.

4

Doe nu syne broeders saghen, dat hem haer vader lieuer hadde, dan alle syne broeders, waren sy hem viant, ende en konden hem geen vriendelick woort toespreken.

5

Daertoe hadde Ioseph eenmael eenen droom, ende seyde synen broederen daeruan: doe werden sy hem noch viandiger. ⁺

+ Iosephs twee droomen.

6

Want hy sprack tot hen: lieuer, hoort wat my doch ghedroomt heeft.

7

My dochte wy bonden ^c† schoouen op den velde, ende mynen schoof richtede hem op, ende stont, ende uwe schooue rontom, neychden hen teghen mynen schoof.

c† and. garuen.

8

Doe spraken syne broeders tot hem: Soudestu onse Koninck werden, ende ouer ons heerschen? ende worden hem noch viandiger om zijns drooms ende syner reden willen.

9

Ende hy hadde noch eenen anderen droom, dien vertelde hy synen broederen, ende sprack: Siet, ick hebbe noch eenen droom gehadt: My dochte, de sonne ende de mane, ende elf sterren neychden hen voor my.

B.10

Ende doe dat synen vader, ende synen broederen geseyt wert, strafte hem zijn vader, ende sprack tot hem: Wat is dat voor een droom, die dy ghedroomt heeft ? sal ick ende dijn moeder, ende dynen broeders komen, ende dy aenbidden ?

11

Ende zijn broeders benijdeden hem, doch zijn vader behielt dese woorden.

12

Doe nu syne broeders henen ghinghen, te weyden het vee haers vaders in Sichem, sprack Israel tot Ioseph:

13

Hoeden dyne broeders niet het vee in Sichem? koemt, ick wil dy tot hen senden: hy sprac: ^d Hier ben ick.

d 1.Sam. 3.b.16.

14

Ende hy seyde: Gaet henen, ende siet, of het wel staet met dyne broeders, ende met het vee, ende segget my wederom, hoe het daer met is: ende hy sandt hem wt den dale Hebron, dat hy na Sichem ginghe.

15

Doe vant hem een man, dat hy dwalen ginc op den velde, die vraechde hem ende sprack: Wien soeckstu?

16

Hy antwoordde: Ick soecke myne broeders: lieuer segghet my, waer sy hoeden.

17

De man sprack: Sy zijn van daer ghetoghen: want ick hoorde, dat sy seyden: Laet ons na Dothan gaen: doe volchde Ioseph synen broederen na, ende vandtse tot Dothan.

18

Als sy hem nu saghen van verre, ⁺ eer hy hart by hen quam, sloeghen sy eenen raedt aen, dat sy hem doodden,

+ Ioseph willen syne broeders dooden.

19

Ende spraken onder malkanderen: Siet, de droomer koemt daer.

C.20

So koemt nu, ende laet ons hem dooden, ende in een kuyle werpen, ende segghen: Een boose ghedierte hebbe hem verscheurt: so salmen sien, wat syne droomen zijn.

21

Doe dat Ruben hoorde, ⁺ wilde hy hem wt haren handen verlossen, ende sprack: ^e Latet ons hem niet dooden.

+ Ruben verlost Ioseph.

e Gene. 42.c.22.

22

Ende voorder sprack Ruben tot hen, Latet ons gheen bloet vergieten, maer werpt hem in de kuyle, die in der woestijne is, ende legghet de hant niet aen hem: hy wilde hem also wt haerder hant verlossen, dat hy hem synen vader weder brochte.

23

Als nu Ioseph tot synen broederen quam, toghen sy hem synen rock met den bonten rock wt, dien hy aen hadde,

24

Ende namen hem, ende worpen hem in een kuyle: doch de selue kuyle was ledich, ende gheen water daerinne:

25

Ende setteden hen neder te eten: onder dies hieuen sy hare ooghen op, ende saghen eenen hoop Ismaeliten komen van Gilead, met haren kemelen, die droegen kruyden, ^f† balssem ende mirre, ende toghen af na Egypten.

f† Anders, harst ende gummi.

26

Doe sprack Iuda tot synen broederen: Wat helpet ons, ⁺ dat wy onsen broeder dooden, ende zijn bloet vergieten?

+ Ioseph wordt van syne broeders verkocht.

27

Koemt, latet ons hem den Ismaeliten verkoopen,

[fol. 14r]

dat haer onse handen niet aen hem en vergrijpen: want hy is onse broeder, onse vleesch ende bloet: ende sy hoorden hem.

28

^g Ende doe de Midianiteren de koopluyden, daer voorby reysden, toghen sy hem wt der kuylen, ende verkochten hem den Ismaeliten, voor twintich siluerlinghen: die brachten hem in Egypten.

g Sapien. 10.b.13 Psalm. 105.b.17 Act. 7.a.9.

29

Als nu Ruben wederom totter kuylen quam, ende en vant Ioseph niet daerin, verscheurde hy zijn kleedt.

D.30

Ende quam weder tot synen broederen, ende sprack: De ionghe en is daer niet, waer sal ick nu henen?

31

Doe namen sy Iosephs rock, ende slachteden eenen gheytenbock, ende ^h† staken den rock int bloet, ende schickeden den bonten rock henen

h† andr. duckten

32

ⁱ Ende lieten hem haren vader brenghen, ende seggen: Desen hebben wy geuonden, siet of het dynes soons rock zy ofte niet.

i Gene. 44.c.28.

33

Hy kende hem, ende sprack: het is mijns soons rock, een ^k boos ghedierte heeft hem verslonden, een rijtende ghedierte heeft Ioseph verscheurt.

k Gene. 44.c.28.

34

Ende Iacob verscheurde syne kleederen, ende leyde eenen sack om syne lenden, ende droech leet om synen sone langhe tijt.

35

Ende alle syne sonen ende dochteren traden tot hem, dat sy hem troosteden, doch hy wilde hem niet laten troosten, ende sprack: ick sal met leet onder varen inde kuyle tot mynen sone, ende zijn vader beweende hem.

36

^l Ende de Midianiten verkochten hem in Egypten, Potiphar des Pharao Kamerlinc ende Hofmeester.

l Psalm. 105.b.17.