Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxiij. Capittel.

1. Iacob trect synen broeder Esau met synen volcke teghen, 5. sy spreken vriendelicken met malcanderen, ende wordens eens, 13. Esau bewijst veel goets tegen synen broeder, 17. Iacob koemt tot Socoth ende Salem, daer woont hy.

A.1

IAcob hief zijn ooghen op, ende sach synen broeder Esau komen, met vierhondert mannen, ende deylde syne kinderen tot Lea, ende tot Rahel, ende tot beyden maechden.

2

Ende schicte de maechden met haren kinderen voor aen, ende Lea met haren kinderen daer na, ende Rahel met Ioseph ten lesten.

3

Ende hy ginck voor hen henen, ende neychde hem seuenmael op de Aerde, tot dat hy tot synen broeder quam.

4

Ende Esau liep hem teghen, ende nam hem inden arm, ende viel hem om den hals, ende kuste hem: ende sy weenden.

5

Ende hief zijn ooghen op, ende sach de wijuen met de kinderen, ende sprack: Wie zijn dese by dy? Hy antwoordde: Het zijn kinderen, die God dynen knechte verleent heeft.

6

Ende de maechden traden toe met den kinderen, ende neychden hen voor hem.

7

Lea tradt oock toe met haren kinderen, ende neychde haer voor hem: Daer na tradt Ioseph ende Rahel toe, ende neychden haer oock voor hem.

8

Ende hy sprack: Wat wiltu met allen den heyre dat ick ontmoet hebbe? Hy antwoordde: Dat ick ghenade vinde voor mynen heere.

9

Esau sprack: Ick hebbe ghenoech, mijn broeder, behoudt wat du hebst.

B.10

Iacob antwoordde: Och neen, hebbe ick ghenade gheuonden voor dy, so neemt mijn gheschenck van mijnder hant: want ick sach dijn aenghesichte, als saghe ick Godes aenghesichte, ende ^a† laet het dy wel beuallen van my.

a† anders weest met my versoent.

11

Neemt doch den seghen van my aen, dien ick dy toeghebracht hebbe: want God heeft het my verleent, ende ick hebbe alles ghenoech: also dwanck hy hem, dat hy het aennam.

12

Ende hy sprack: Laet ons voort trecken ende reysen, ick wil ^b† met dy trecken.

b† Anders neuen, anders, voor

13

Hy daerentegen sprack tot hem: Mijn heere, du bekennest, dat ick kleyne kinderen by my hebbe, daer toe vee ende kalfdraghende koeyen: wanneer sy eenen dach afghedreuen werden, so soude my de gantsche cudde steruen.

14

Mijn heere trecke voor synen knechte henen, ick wil ^c saechte na drijuen, daer na als het vee ende de kinderen gaen konnen, tot dat ick kome tot mynen heere in Seir.

c Merckt dat de rechtgeloouighen ende werckheyligen niet konnen met malkanderen wandelen: want de geloouige varen suyuerlic met stillen geeste, maer de werckheyligen varen sterck met vermetentheyt harer wercken in Godes Wetten.

15

Esau sprack: So wil ick doch by dy laten sommighe vanden volcke, dat met my is. Hy antwoordde: Wat is het van nooden? laet my slechs ghenade voor mynen heere vinden.

16

Also tooch Esau des daechs wederom zijns weechs na Seir.

17

Ende Iacob tooch na Suchoth, ende bouwede voor hem een huys, ende maecte synen vee hutten: daeruan heet de stede Suchoth. ⁺

+ Suchoth.

18

^d Daer na tooch Iacob ^e† tot Salem, tot der stadt Sichem, die inden lande Canaan leyt, na dien hy wt Mesopotamien ghecomen was, ⁺ ende maeckte synen legher voor der stadt.

d Gene. 28.c.20.

e† Anders met vreden

+ Salem Sichems stadt.

[fol. 12v]

19

^f Ende kocht een stuck ackers vanden kinderen Hemors des vaders Sichem, voor hondert ^g† siluerlinghen.

f Iosu. 24.d.32.

g† Grossen

20

Aldaer rechtede hy syne hutten op: ende rechtede aldaer eenen Altaer toe, ende riep aen den naem des stercken Gods Israels.