Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxix. Capittel.

1.Iacob koemt aenden borne by Haran, 10. drenckt Labans schapen, 12. gheeft hemseluen Rahel te kennen, 13. wort van Laban ontfangen, 18. dien dient hy seuen Iaer om Rahel, 23. hem wort Lea by geleyt, 27. dient weder seuen Iaer om Rahel, 31. Lea baert hem vier sonen, Rahel is onuruchtbaer.

A.1

DOe hief Iacob zijn voeten op, ende ginck in het lant dat teghent Oosten leyt.

2

Ende sach om hem, ende siet, daer was eenen waterput op den velde, ende siet, dry kudden schapen lagen daerby: want van dien waterput pleghen sy de kudden te drencken, ende eenen grooten steen lach voor den hole des waterputs.

3

Ende sy pleghen de kudden alle aldaer te versamelen, ende den steen van des waterputs hole te wentelen, ende de schapen de drencken, ende leyden dan den steen weder voor het hol in zijn stede.

4

Ende Iacob sprack tot hen: Lieue broeders, van waer zijt ghy? Sy antwoordden: Wy zijn van Haran.

5

Hy sprac tot hen: Kent ghy oock Laban, den sone Nahor? Sy antwoordden: Wy kennen hem wel.

[fol. 10v]

6

Hy sprack: Gaet het hem oock wel? Sy antwoordden: Het gaet hem wel: ende siet, daer coemt zijn dochter Rahel met den schapen.

7

Hy sprack: Het is noch hooch dach, ende het en is noch gheen tijt het vee in te drijuen: drenct de schapen, ende gaet henen ende weydtse.

8

Sy antwoordden: Wy en konnen niet, so langhe tot dat alle kudden te samen ghebracht worden, ende wy den steen vanden hole des puts wentelen, ende also de schapen drencken.

9

Als hy noch met hen sprac: doe quam Rahel met den schapen haers vaders, want sy hoedde de schapen.

B.10

Doe nu Iacob sach Rahel de dochter Labans, syner moeder broeder, tradt hy daertoe, ende wentelde den steen vanden hole des puts, ende drencte de schapen Labans, syner moeder broeder.

11

Ende kussede Rahel, ^a† hief op zijn stemme, ende weende.

a† And. de selue hief op hare stemme etcet. maer hy etcet.

12

Ende seyde haer, dat hy haers vaders broeder was, ende Rebeca sone: doe liep sy henen, ende seyde dat haren vader aen. ⁺

+ Susters kinderen worden broeders genoemt na der aert der Hebreischer sprake.

13

Doe nu Laban hoorde, van Iacob syner suster sone, liep hy hem tegen, ende helsde ende kussede hem, ende bracht hem in zijn huys: doe vertelde hy Laban alle dese gheschiedenissen.

14

Doe sprack Laban tot hem: Wel aen, du bist mijn been ende mijn vleesch: ⁺ ende hy bleef by hem een maendt lanck.

+ Daban.

15

Daer na sprack Laban tot Iacob: Hoewel du mijn broeder bist, soudestu my daerom om niet dienen? Segt, wat sal dijn loon zijn?

16

Laban hadde twee dochteren, de oudtste hiet Lea, ⁺ ende de ionckste Rahel.

+ Lea ende Rahel Labans dochters.

17

Doch Lea hadde een teer gesichte, Rahel was schoon van ghedaente, ende schoon van aensichte.

18

Ende Iacob kreech Rahel lief, ende sprac: Ick wil dy seuen Iaer om Rahel dijn ioncste dochter dienen.

19

Laban antwoordde: Het is beter dat ickse dy gheue, dan eenen anderen, blijft by my.

C.20

Also diende Iacob om Rahel, seuen Iaer, ende sy dochten hem, als warent ^b† sommige dagen, so lief hadde hyse.

b† anders, eenighe.

21

Ende Iacob sprack tot Laban: Gheeft my mijn wijf, want de tijt is hier, dat ick byligghe.

22

Doe noodde Laban alle de lieden dier vlecke, ende maecte een weertschap.

23

Des auonts nam hy zijn dochter Lea, ⁺ ende brachtse tot hem, ende hy besliepse.

+ Lea Iacobs wijf.

24

Ende Laban gaf Lea syner dochter, zijn maecht Silpa ter maecht.

25

Des morghens, siet, doe was het Lea, ende sprack tot Laban: Waerom hebstu my dat ghedaen? hebbe ick dy niet om Rahel gedient, waerom hebstu my dan bedroghen?

26

Laban antwoordde: Het is niet ghewoonlick in onsen lande datmen de ionckste wtgeue voor der oudtster.

27

Houdt met deser dese weke wt, so wil ick dy dese oock gheuen, om den dienst die du my noch ander seuen Iaer dienen salt.

28

Iacob dede also, ende hielt de weke wt.

29

Doe gaf hem Laban Rahel zijn dochter ten wijue: ⁺ ende gaf Rahel syner dochter zijn maecht Bilha ter maecht.

+ Rahel Iacobs wijf.

D.30

Also lach hy oock by met Rahel, ende hadde Rahel lieuer dan Lea: ende diende by hem voortaen de ander seuen Iaer.

31

Doe nu de Heere sach, dat Lea onweert was, maecte hyse vruchtbaer, ende Rahel onuruchtbaer.

32

Ende Lea wert ^c swangher, ende baerde eenen sone, ^d dien hiet sy ^e Ruben, ende sprac: De Heere heeft aengesien mijn ellende: nu sal my mijn man lief hebben.

c Oft met kinde.

d 1.Para. 2.a.1.

e Ruben heet een schouw kindt.

33

Ende Lea wert noch eenmael met kinde, ende baerde eenen sone, ende sprack: De Heere heeft ghehoort, dat ick onweert ben, ende heeft my desen oock ghegheuen, ende hieten ^f Simeon.

f Simeon heet een hoorer kindt.

34

Noch eenmael wert sy met kinde, ende baerde eenen sone, ende sprac: Nu sal hem mijn man weder tot my doen, want ick hebbe hem drye sonen ghebaert: daerom hiet sy hem ^g Leui.

g Leui heet toegedaen.

35

Ten vierden wert sy met kinde, ende baerde eenen sone, ende sprack: Nu wil ick den Heere dancken: ^h daerom hiet sy hem ⁱ Iuda: ende hielt op kinderen te baren.

h Matth. 1.a.2.

i Iuda heet een bekenner ofte danckseggher.