Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Het xiiij. Capittel.

1. Loth wort in de bekrijghinghe ende plonderinge der Stadt Sodom, gheuanckelick wechgheuoert, 12. ende van Abram verlost. 18. Melchizedec gaet Abram ende synen krijchsvolcke teghen, sulcks doet oock de Coninck van Sodom. 22. teghen welcken hy weyghert yet syner hauen, voor hem te behouden.

A.1

ENde het gheschiedde tot der tijdt des Conincks Amraphel van Sinear, Arioch des Conincks van Elassar, KedorLaomor des Conincks van Elam, ende Thideal des Conincks der Heyden:

2

Dat sy krijchden met Bera den Coninck van Sodom, ende met Birsa, den Coninck van Gomorra, ende met Sineab den Coninck van Adama, ende met Semeber den Coninck van Zeboim, ende met den Coninck van Bela, die heet Zoar.

3

Dese quamen alle te samen in den dale Siddim, daer nu de Sandt Zee is.

4

Want sy waren twaelf Iaer onder den Coninck KedorLaomor geweest, ende in den derthienden Iare waren sy van hem afgeuallen.

5

Daerom quam KedorLaomor ende de Coninghen die met hem waren, in den veerthienden Iare, ende sloeghen de ^a† Reusen te AstarothKarnaim, ende de Susim tot Ham, ende de Emim in den velde Kyriathaim.

a† and. Rephaim te Astaroth, de Karnaim ende de etcet.

6

Ende de Heriters op [haren] geberchte Seir, ⁺ tot aen de euene Pharan, ⁺ welcke aen de woestijne stoot. ⁺

+ Susam.

+ Emim.

+ Horiter.

7

Daer na keerden sy omme, ende quamen aen den ^b† waterput Mispat, dat is Kades, ende sloeghen het gantsche landt der Amalekiters: daer toe de Amoriters die tot HazezonThamar woonden.

b† and. rechtborne.

8

Doe toghen wt de Coninck van Sodom, de Coninck van Gomorra, de Coninck van Adama, de Coninck van Zeboim, ende de Coninck Bela, die Zoar heet, ende rusteden hen te strijden in den dale Siddim.

9

Met KedorLaomor den Coninck van Elam, ende met Thideal den Coninck der Heyden, ende met Amraphel den Coninck van Sinear, ende met Arioch den Coninck van Elassar, vier Coningen ^† met vijuen.

† and. Teghen.

B.10

Ende in den dale Siddim waren vele beencuylen: ende de Coninck van Sodom ende Gomorra werden aldaer in de vlucht gheslaghen ende neder gheleyt: ende wat daer ouer bleef, vloodt op het gheberchte.

11

Doe namen sy alle haue tot Sodom ende tot Gomorra, ende alle spijse ende togen daeruan.

12

Ende sy namen oock met hen Loth Abrams broeders sone, ende syne haue (want hy woonde tot Sodom) ende toghen daer van.

13

Doe quam daer een die ontloopen was, ende seyde het Abram aen ^c† den vreemden ^d die daer woonde in den haghen Mamre des Amoriters, welcker een broeder was Escol ende Aner dese waren met Abram in een verbont.

c† and. Die daerouer komen was an. den Hebreer.

d Gene. 13.b.18.

14

^e Als nu Abram hoorde, ⁺ dat zijn broeder gheuanghen was, ⁺ wapende hy syne knechten, drye hondert en de achtien, in synen huyse geboren, ende iaechde hen na tot Dan.

e Ios. 10.a.6.7. 1.Sam. 30.a.9. Iere. 41.b.11.

+ Escol.

+ Aner.

15

Ende deylde se ende viel des nachts ouer hen met synen knechten, ende sloechse, ende iaechdese tot Hoba, die ter slincker handt der stadt Damascus leydt:

[fol. 5r]

16

^f Ende bracht alle haue weder, daertoe oock Loth synen broeder met syner haue, oock de wijuen ende het volck.

f Iob. 29.b.17.

17

Als hy nu weder quam, van der slachtinghe des KedorLaomor, ende der Coningen met hem, ^g doe ghinck hem teghen de Coninck van Sodom in het veldt, dat des Conincks dal heet.

g Nume. 31.b.13.

18

^h Doch Melchizedech de Coninck van Salem, ⁱ droech broot ende wijn hervoor, ende hy was een Priester Gods des Alderhoochsten.

h Heb. 7.a.1

i Niet dat hy het offerde, maer dat hy de gasten spijsede ende eerde: daer is Christus door beduydt, die de wereldt met den Euangelio spijset.

19

Ende seghende hem, ende sprack: Ghesegent systu Abram den hoochsten Gode, die Hemel ende Aerde besit:

C.20

Ende ghelouet zy God de hoochste, die dyne vyanden in dyne handt besloten heeft: ende den seluen gaf [Abram] de thiende van allerley.

21

Doe sprack de Coninck van Sodom tot Abram: Gheeft my de ^k lieden, de goeden behoudt dy.

k Heb. zielen.

22

Ende Abram sprack tot den Coninc van Sodom: Ick heffe myne handen op tot den Heere den hoochsten Gode, die Hemel ende Aerde besit.

23

Dat ick van allen dat dijn is, niet eenen draet, noch eenen schoenriem nemen en wil, dat du niet en seggest, ^l† du hebbest Abram rijck ghemaect.

l† and. Ick hebbe

24

Wtgenomen, wat de Ionghelingen verteert hebben, ende de ^m† mannen Aner ende Escol, die met my ghetoghen zijn, die laet haer deel nemen.

m† and. Het deel der