Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Het xiij. Capittel.

1. Abram ende Loth trecken wederom wt Egypten in Canaan, van daer sy te voren wtghetogen waren. 8 Hebben beyde veel vees, dat se het Landt niet wel by malcander verdraghen en konde, daerom sy hen scheyden. 13. Uan der Sodomiter boosheyt. 14. Abram ende synen zade wordt het Landt ende den seghen noch eens toegheseyt.

A.1

ALso tooch Abram op wt Egypten, met zijn wijf, ende met allen dat hy hadde, ende Loth oock met hem tegent Suyden.

2

Ende Abram was seer rijck van vee, siluer ende gout.

3

Ende hy tooch ymmer voort wt den Suyden tot BethEl, ^a aen de stede daer inden eersten zijn hutte was, tusschen BethEl ende Ai.

a Gene. 12.a.7.

4

Euen aen de stede daer hy te voren den altaer ghemaeckt hadde: ^b† ende predickte den name des Heeren.

b† and. Riep aen

5

Loth die met Abram tooch, ⁺ hadde oock Schapen ende Runders, ende hutten.

+ Loth.

6

Ende het Landt en kondes niet verdragen, dat sy by malcanderen woonden: ^c want haer haue was groot, ende en konden by malcanderen niet woonen.

c Gene. 36.a.7.

7

Ende daer was altijdts twist tusschen den herderen ouer Abrams vee, ende tusschen den herderen ouer Loths vee: ^d tot dier tijt so woonden oock de Cananiters ende Pheresiters in den Lande. ⁺

d Gene. 10.b.18. ende 12.a.6.

+ Cananiters. Pheresiters.

8

Doe sprack Abram tot Loth: Lieuer, Laet gheenen twist zijn tusschen my ende dy, ende tusschen mynen ende dynen herderen, ^e want wy zijn broeders.

e Syrac. 25.a.2.

9

^f Staet dy niet alle dat Lant open? Lieuer, scheydt dy van my: wiltu ter slincker handt, so wil ick ter rechter handt: ofte wiltu ter rechter handt, so wil ick ter slincker.

f Ierem. 40.a.4.

B.10

Doe hief Loth syne ooghen op, ende besach de gantsche Landtstreecke aen den ^g† Iordane: want eer de Heere Sodoma verderf, was sy rijck van water, tot datmen tot Zoar koemt, als eenen lusthoff des Heeren, ghelijck als Egypten Landt.

g† An. Iordane, dat het een gantsch vocht mestich lant was: want eer, etc. was het rontom Zoar als een lusthof des etc.

11

^h Doe koos hem Loth het gantsche vlacke aen de Iordane, ende tooch tegent Oosten: also scheydde den eenen broeder vanden anderen.

h Deute. 2.a.8.

12

Dat Abram woonde in den Lande Canaan, ende Loth in de steden der selue vlacke, ende ^i† sette zijn hutte tot Sodom.

i† an. bestreck etc. tot Sodoma toe.

13

Doch de lieden tot Sodom waren boos, ⁺ ende sondichden seer teghen den Heere.

+ Sodomiters.

14

Doe hem nu Loth van Abram ghescheyden hadde, sprack de Heere tot Abram: Heft dyne ooghen op, ende siet van der stede aen, daer du woonest, teghent Noorden, teghent Suyden, teghent Oosten ende teghent Westen.

15

^k Want alle dat Landt dat du siest, wil ick dy gheuen, ende dynen zade eewichlick.

k Gene. 12.a.7. ende 15.b.18 ende 26.a.3. Deut. 34.a.4. Act. 7.a.5

16

Ende wil dijn zaedt maken, als het stof op der aerden: kan een mensche het stof op aerden tellen? die sal oock dijn zaedt tellen.

17

Daerom so maket dy op, ende treckt door het Landt, in de lengde ende breedde, want dy wil ick het gheuen.

18

^l Also hief Abram syne hutten op, quam ende woonde in ^m† den haghen Mamre, die te Hebron is, ende bouwede aldaer den Heere eenen Altaer.

l Gene. 14.b.13.

m† and. By den Eycken woude, etce. dat