Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Noah ende syne sonen worden ghesegent, ende ouer alle leuendighe op Aerden, ghesettet, 4. bloet eten ende bloetuergieten, verboden, 12. een verbont opgherichtet met een gegeuen teecken, geen Suntvloet meer komen te laten. 21. Noah droncken, wert van Ham beschimpt, van Sem ende Iapheth toeghedeckt

A.1

ENde God segende Noah ende syne sonen, ⁺ ende sprack, ^f Weest vruchtbaer, ende vermeeret v, ende veruult de Aerde.

+ God seghenet Noah.

f Gene. 1.c.22.26. ende 8.b.17.

2

Vwe vreese ende verschricken, zy ouer alle ghedierte op Aerden, ouer alle voghelen onder den Hemel, ende ouer alles wat op den Aerdbodem kruypt, ende alle visschen in der zee, zijn in uwe handen ghegheuen.

3

^g Al wat hem ruert ende leeft, dat zy uwe spijse: als het groen kruyt, hebbe ickt v ghegheuen.

g Gene. 1.c.29.

4

^h Alleen, etet het vleesch niet, dat noch leeft in synen bloede.

h Leuit. 3.b.17. ende 7.c.26. ende 17.b.10.14. ende 19.c.26.

5

ⁱ Want ick wil ooc ws lijfs bloet wreken, ende wilt aen allen ghedierten wreken: ende wil des menschen leuen wreken, aen eenen yegelicken mensche, als die zijn broeder is.

i Exod. 21.c.28.

6

^k Wie menschen bloet vergiet, diens bloet sal

k Thren. 4.b.13.

[fol. 3v]

oock ^l door menschen vergoten worden: ^m want God heeft den mensche tot zijn beelt ghemaect.

l Hier is het wereltlicke sweerdt inghesettet, datmen de Moorders dooden sal.

m Gene. 1.c.27.

7

ⁿ Weset vruchtbaer ende vermeeret v, ende genereert op Aerden, dat uwer vele daerop worden:

n Gene. 1.c.28. ende 8.b.17.

8

Voorder seyde God tot Noah, ende synen soons met hem,

9

Siet, ⁺ ick make met v een verbont, ende met uwen zade na v,

+ Godts verbont met Noah nae der Suntvloet.

B.10

Ende met allen leuendighen ghedierte by v, aen vogelen, aen vee, ende aen allen gedierten op Aerden by v, van allen dat wt der Arcken gegaen is, welckerley gedierten het zijn op Aerden.

11

^o Ende make mijn verbont also met v, Dat nu voortaen niet meer alle vleesch verdoruen worden sal, met het water der Sundtuloedt, ende daer sal nu voortaen geene Suntvloet meer kome, die de Aerde verderue.

o Iesai. 54.a.9. Syrach. 44.b.19.

12

Ende God sprack: ⁺ Dat is het teecken des verbonts, dat ick ghemaket hebbe, tusschen my ende v, ende allen leuendighen ghedierten by v, nu vortaen eewichlicken.

+ Reghenboghe teecken des verbondts.

13

Mynen boghe hebbe ick ghesettet in de wolcken, die sal het teecken zijn des verbondes tusschen my ende der Aerden.

14

Ende wanneert koemt, dat ick wolcken ouer de aerde brenghe, so sal men mynen boghe sien in den wolcken.

15

Ende dan wil ick gedencken aen mijn verbont tusschen my ende v, ende allen leuendigen gedierten, in allerley vleesche, Dat nu voortaen niet meer eene Suntvloet kome, die alle vleesch verderue.

16

Daeromme sal mynen boghe in den wolcken zijn, dat ick hem aensie, ende gedencke aen dat eeuwige verbondt, tusschen God ende allen leuendigen gedierten in allen vleesche, dat op Aerden is.

17

Dat selue seyde God oock tot Noah: Dit zy het teecken des verbondts, dat ick ghemaeckt hebbe, tusschen my, ende allen vleesche op Aerden.

18

De soons Noah, ⁺ die wt der Arcken gingen, zijn dese: Sem, Ham, Iaphet. Doch Ham is de vader Canaan.

+ Noah Soons.

19

Dat zijn de drye sonen Noah: van de welcke alle het lant besettet is.

C.20

Noah begonste ende werdt een ackerman, ende plantede wijnberghen.

21

Ende doe hy des wijns dranc, ⁺ wert hy droncken, ende lach in der hutten ontdeckt.

+ Noah droncken ende bespottet.

22

Doe nu Ham, Canaans vader, sach synes vaders schaemte, seyde hy het synen beyden broederen daerbuyten.

23

Doe namen Sem ende Iaphet een kleet, ende leyden dat op hare beyde schouderen, ende gingen ruggelincks daertoe, ende deckten haers vaders schaemte toe: ende hare aenghesichte was afgewendet, ⁺ dat sy haers vaders schaemte niet sagen.

+ De vloec ouer Canaan.

24

Als nu Noah opwaecte van synen wijne, ende beuant, wat hem zijn kleynste sone gedaen hadde.

25

Doe sprack hy: Veruloeckt zy Canaan, ende zy een knecht aller knechten, onder synen broederen.

26

Ende sprack voorder: Ghelouet zy de God de Heere des Sems, ende Canaan zy zijn knecht.

27

God breyde Iaphet wt, ende ^p† late hem woonen in den hutten des Sems, ende Canaan zy zijn knecht.

p† anders Woone in etcet.

28

Noah leuede na der Sundtuloet, dryhondert ende vijftich iaer: ⁺

+ Noah ouderdom 950. Iaer.

29

Dat zijn gantsche ouderdom werdt, neghenhondert ende vijftich iaer, ende starf.