Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Inganck in de Arcke na des Heeren beuel. 10. aenkoemste ende dueringe der Suntvloet. 21. onderganck alles vleeschs tot op Noah ende de zyne.

A.1

ENde de Heere sprack tot Noah: ^{+ a} Gaet in de Arcke, du ende dijn gantsche huys, want dy hebbe ick rechtueerdich gesien voor my, tot deser tijdt.

+ Suntuloet.

a 2.Pet. 2.a.5.

2

Wt allerley reynen vee neemt tot dy, telcken seuen ende seuen, het manneken ende zijn wijfken: maer van den onreynen, van elcx een paer, het manneken ende zijn wijfken.

3

Desseluen gelijcken van den vogelen onder den Hemel, van elcx seuen ende seuen, het manneken ende zijn wijfken, op dat daer zaedt leuendich blijue op den gantschen Aerdbodem.

4

Want noch ouer seuen daghen, wil ick laten regenen op Aerden, veertich dagen ende veertich nachten, ende verdelgen van den Aerdbodem, alles wat het wesen heeft, dat ick gemaect hebbe.

5

^b Ende Noah dede al wat hem de Heere geboot.

b Gene. 6.c.22.

6

Hy was sesshondert iaer oudt, doe het water der ^c Suntvloet op Aerden quam.

c Ouerwateringhe.

7

^d Ende hy ginck in de Arcke met syne sonen, synen wijue, ende syne soons wijuen voor den wateren der Suntvloet.

d Matth. 14.b.38. Luc. 17.c.26 1.Pet. 3.c.20

8

Van den reynen vee, ende van den onreynen, van den vogelen, ende van allen gewormten op Aerde,

9

Gingen tot hem in de Arcke by paren, een

[fol. 3r]

manneken ende een wijfken als hem de Heere gheboden hadde.

B.10

Ende doe de seuen dagen vergaen waren, quamen de wateren der Sundtvloet op Aerden.

11

In den sesshondersten iare des ouderdoms Noah, ⁺ aen den seuenthienden dach der tweeder maent, dat is den dach, doe alle Fonteynen des grooten afgronts opbraken, ende de vensteren des Hemels hen opdeden.

+ Noah gaet inde Arcke.

12

Ende daer quam een regen op Aerden, veertich daghen ende veertich nachten.

13

^e Euen aen den seluen dage, ginc Noah in de Arke, met Sem, Ham, ende Iapheth syne sonen, ende met synen wijue, ende met syne soons dryen wijuen.

e 1.Pet. 3.c.20.

14

Daertoe allerley gedierte na syner aert, allerley vee na syner aert, allerley gewormte dat op Aerden kruypt, na syner aert, ende allerley geuoghelte na syner aert: al wat vlieghen konde, ende al wat vloghelen hadde.

15

Dat ginck alle tot Noah in de Arcke by paren, van allen vleesch, daer een leuendige geest in was.

16

Ende dat waren mannekens ende wijfkens van allerley vleesch, ende ghinghen in, als dan God hem geboden hadde: ende de Heere slootse achter hem toe.

17

^f Doe quam de Suntvloet veertich dagen op Aerden, ⁺ ende de wateren wiessen, ende hieuen de Arcke op, ende droegen se hooghe bouen der Aerden.

f Syrach. 39.c.27

+ Suntvloedt koemt.

18

Also namen de wateren ouerhant, ende wiessen seer op Aerden, dat de Arcke op den wateren voer.

19

Ende de wateren namen ouerhant, ende wiessen so seer op Aerden, dat alle hooge bergen onder den gantschen Hemel, bedeckt werden.

C.20

Vijftien ellen hooch, ginck het water bouen de berghen, die bedeckt werden.

21

Doe ginck alle het vleesch onder, dat op Aerden cruypt, aen voghelen, aen vee, aen gedierten, ⁺ ende aen allen dat hen ruert op Aerden, ende aen allen menschen.

+ Alles wat leuede, is in der Suntvloet verdelghet. Sapient. 10.a.4. Syrach. 39.c.21.

22

Alles wat eenen leuendighen adem hadde in het drooghen, dat starf.

23

Also wert verdelget, alles wat op den Aerdbodem was, van den mensche aen tot op het vee, ende op het gewormte, ende vogelen onder den Hemel, dat wert alle van der Aerden verdelghet: Noah bleef alleene ouer, ⁺ ende wat met hem in der Arcken was.

+ Noah wort behouden. Sapient. 14.a.6. 1.Pet. 3.c.20

24

Ende de wateren stonden op Aerden, hondert ende vijftich daghen.