Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

Oorsake der Sundvloet, 14. beuel ende mate de Arcke te bouwen, 19. ende wat alles daerin te nemen.

A.1

DOe hem nu de menschen begonden te vermeeren op Aerden, ende genereerden hen dochteren.

2

Doe sagen de kinderen Gods, na den dochteren der menschen, dat sy schoon waren, ende namen tot wijuen, welcker sy wilden.

3

Doe sprack de Heere, ^a De menschen willen hen [door] mynen gheest niet meer straffen laten, want sy zijn vleesch: ick wil hen noch ^b tijdt gheuen, hondert ende twintich iaren.

a Dat is, het is te vergheefs wat ick door mynen Geest hen prediken, segghen ende straffen late. Sy zijn veel te seer vleeschelick gheworden, verachten ende lasteren mynes Gheestes woordt: daerom sal hy ophouden, ende ick wilse laten varen, ende met hen niet meer twijsten ende straffen. Gene. 8.c.21 Iere. 17.a.9 Prou. 6.b.14. Matth. 15.b.19.

b respijdt 1.Pet. 3.b.19

4

Te dien tijden waren oock tyrannen, op Aerden: want doe de ^c kinderen Gods, de dochteren der menschen besliepen, ende hen kinderen baerden, werden daerwt geweldighe ende beroemde lieden in de werelt.

c Dat waren der heyligher vaders kinderen, die inder vreese Gods opghetogen, daerna erger dan de anderen werden, onder den name Godes: als alle tijt der heylighen nakomelinghen de erchste tyrannen ende verkeertste gheworden zijn.

5

Doe nu de Heere sach, dat der menschen boosheyt groot was op Aerden, ende alle het dichten ende poogen haers herten, lancks so booser was.

6

^d Doe roude het hem, dat hy de menschen gemaect hadde op Aerden, ende het bekummerde hem in synen herte.

d 1.Sam. 15.b.11.

7

Ende sprack: Ick wil de menschen, die ick gheschapen hebbe, verdelgen van der Aerden, van den menschen aen, tot op het vee, ende tot opt gewormte, ende tot op de vogelen onder den Hemel: ^e want het rouwet my, dat ickse gemaect hebbe.

e Iesai. 42.a.1. Matth. 3.b.17. ende 17.a.5.

8

Doch Noah vant genade voor den Heere.

9

Dit is het gheslachte Noah: Noah ^f was een oprecht man ende sonder veranderinge, ende leydde een Godlick leuen tot synen tijden.

f Syr. 44.b.17. Exod. 7.a.1.

B.10

Ende genereerde dry sonen: Sem, Ham, Iaphet,

11

Doch de Aerde was verdoruen voor Gods ooghen, ende vol moetwillens.

12

Doe sach God op Aerden, ende siet, sy was verdoruen: want alle vleesch hadde synen wech verdoruen op Aerden.

13

Doe sprack God tot Noah: Alles vleesches eynde, is voor my ghekomen: want de Aerde is vol boosheyts van hen: ende siet daer, Ick wil se verderuen met der Aerden.

14

Maeckt dy een Arcke van dennen houte, ende maeckt kameren daerin, ende bepecktse met peck, binnen ende buyten.

15

Ende maectse also: Dry hondert ellen zy de lengde, ⁺ vijftich ellen de wijdde, ende dertich ellen de hoochde.

+ Noah Arcke.

16

Een venster saltu daerin maken bouen aen, eener ellen groot: de deure saltu midden in haer zijde setten, ende sal dry solders hebben, eenen onder, den anderen in midden, de derde in der hoochde.

17

Want siet, ick wil een ^g Sundvloet met water laten komen op Aerden, te verderuen alle het vleesch, daer een leuendige adem inne is, onder den Hemel: alles wat op Aerden is sal ondergaen:

g Ouerwateringhe.

18

Doch met dy wil ick een verbont maken: ende du salt in de Arcke gaen, met dynen sonen, met dynen wijue, ende met dyne soons wijuen.

19

Ende du salt met dy in de Arcke nemen, allerley gedierte van allen vleesche, elcx een paer, een manneken ende een wijfken, dat sy leuendich blijuen by dy.

C.20

Van den voghelen na harer aert, van den vee na syner aert, ende van allerley gewormte op Aerden, na syner aert: van dien allen, sal een paer tot dy in gaen, dat sy leuendich blijuen.

21

Ende du salt allerley spijse tot dy nemen, die men eet, ende salt se by dy versamelen, dat sy dy ende hen, ter onderhoudinghe daer zy. ^h Ende Noah dede, alles wat hem God gheboodt.

h Hebr. 11.a.7. Gene. 7.a.5.