Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. b†10v]

VERMANINGHE TOT DER heyligher Schrift.

Deute. 12.a.8. d.32.

GHy en sult dier gheen doen, dat wy heden hier doen, een yeghelick wat hem recht duncket: maer alles wat ick v ghebiede, dat sult ghy houden, dat ghy daer na doet. Ghy en sult daer niet toe doen, noch daer van doen.

Deuter. 31.b.11.

DE Wet saltu wtroepen laten, voor den gantschen Israel, voor haren ooren. Namelicken, voor der versamelinghe des volcx, beyde der mannen ende vrouwen, kinderen, ende dijns vreemdelincx, die in dyner poorte is: op dat syse hooren ende leeren, op dat sy den Heere haren God vreesen, ende houden, dat sy doen alle woorden deses Wets.

Iosu. 1.a.8.

LAet het Boeck deses Wets van dynen monde niet komen, maer besinnet het dach ende nacht: op dat du houdest ende doest aller dinghen na dien, dat daer in gheschreuen staet. Als dan sal het dy wel ghelucken, in allen dat du doest. Wijckt daer niet van, noch ter rechter noch ter slincker handt: op dat du kloeckelicken handelen moghest, in allen dat du doen salt.

Prouer. 30.a.5.

ALle woorden Gods zijn doorloutert, ende zijn eenen schildt dien, die op hem vertrouwen. Doet niets tot synen woorden: dat hy dy niet en straffe, ende wordtst leughenachtich beuonden.

Roma. 15.a.4.

VVat voor henen gheschreuen is, dat is ons ter leere gheschreuen: op dat wy door ghedult ende troost der Schrift, een hope hebben.

2.Timoth. 3.b.14.

MAer du blijft int ghene, dat du gheleert hebst, ende dy toeuertrouwet is, na den male du weetst, van wien du het geleert hebst: Ende dewijle dat du van kindt op de heylige Schrift weetst, kan dy deselue onderwijsen ter salicheydt, door den ghelooue in Christum Iesum. Want alle Schrift van Gode inghegheuen, is nutte, ter leeringhe, ter straffinghe, ter beteringhe, ter tuchtinghe in gherechticheydt: dat een mensche Gods, zy volkomen, tot allen goeden wercken gheschicket.

1.Timoth. 4.b.13.

Doet vlijt met lesen, met vermanen, met leeren, tot dat ick kome.