Declaratie van der triumphe bewezen den hooghe gheboren prince van Spaengien, Philips

[p. 5]

Epistel tot den Keiser biider welcker dit teghenwoordich boucxkin zijnder Maiesteit in Manilius Name ghepresenteert was.

Pays, Eere, Triumphe, duer God Victorie.
Een lichaem gezont, een herte vul vreden.
Een redelic verstant, een vaste memorie.
Een ziele duer Christus doctrine besneden.
Een blijde bien venue in allen steden.
Des waerelts trauwe, des hemels faueur
Moet bij hu bliuen, dat heist hy ghebeden.
Die dit screef den almoghende creatuer.
Maer of hu meshaechde mijns briefs tenuer.
Zo moet ic my wel schamen voor hu presentie.
God gheue mijn redenen zulc een coluer.
Dat ghy die lezen muecht met patientie.
Hu knecht was bedacht vut goeder intentie
Dijn Maiesteit te prijsene in die vlaemsche natie.
Want inestimabel es haer excellentie.
Dus eist gheauentuert bij protestatie.
Beuelende lijf en goed in hu gratie.
Hu gracelic wezen gheeft my corage.
Al doet my vreese wat in zuchten beuen.

[p. 6]

 

Een Prince (dat weet ik wel) es Gods image.

 

Oorconde leeraers die dit voor gheen cluchten screuen

 

Maer God die ons laet by zyn zoete vruchten leuen

 

Es ghaerne ons ghiftkins in dancke ontfaende.

 

Dus commic hu ook tusschen hopen en duchte gheuen

 

Een ghiftkin, ghy en zullet niet zijn versmaende

 

Een zeker bediet vijnd ghy daer in staende.

 

Van dat thuwer eeren, huwen zone bewezen es.

 

In die stad daer hu eerst natuere vermaende

 

Voetsel te nemene, zoot van my ghelezen es.

 

Ghy weit hoe die zonne, wanneerse gherezen es,

 

Haer claerheit vute strect tot elcx verblijden.

 

Dus doet een Prince die Gods beelde gheprezen es,

 

Zijn ionste beleffen an allen zijden.

 

Dit scriuic van hu, wie cans benijden?

 

 

 

Die dit benijdende es hem zeluen quelt hy.

 

Want door zijn afionste ben ic lettel bevreest.

 

Dus heb ic in vlaemsche dees triumphe ghestelt vrij

 

Tuwer eeren die ghebloyt zijt in t vlaemsche forreest

 

Nochtans veel teekenen my beroerden den gheest.

 

Tscheen my was nakende crancke auentuere.

 

Daer ik op reyse was der wijnden tempeest

 

Verkeerde mijn corage en grooten ghetruere.

 

Dat water verdreechde my, die aerde stuere

 

Werd onghewillich om my te draghene.

 

Die voghelen zeiden by haer natuere.

 

Hoe Iupiter bereid was om my te plaghene.

 

Maer oft hu Maiesteit beliefde te vraghene.

[p. 7]

 

Wie my zo staut van begrijpe kend.

 

Zo slecht een propoost voor hu te ghewaghene,

 

Oft wie my an hu edel persone zend.

 

Twas liefde van hu en van uwe stad van Ghend

 

Maer al dwanc my liefde om poetizeren,

 

Van der conste en wil ic my niet vermeten,

 

Die faulten wilt gracelic excuseren.

 

Heb ic my thuwer eeren niet wel ghequeten.

 

Ic meende te doene als ander poeten.

 

Die in haer moeders tale haer veersen telden.

 

Ten was noyt Virgilius noch Omerius verkweten

 

Dat zy, d'een in griecx, d'ander in latine stelden

 

Welc prince Victorieus quam vuter velden.

 

En wie verwonnen tveld moeste wijcken.

 

Wie can Manilium met rechte beschelden.

 

Die zyn tale by d'ander wilt ghelijcken.

 

By die vrucht zal de duecht des wijngaerts blijcken.

 

Nu zijt ghy een vrucht van vlaendren verheuen.

 

Huwen throon staet bouen alle conijncrijcken.

 

In swaerelts ronde es den cracht beseuen.

 

Met rechten es dit dan in vlaemsche bescreuen.

 

 

 

Elc poete bescreuen heift zijn materie.

 

Deene strijd dander pays na der waerelt sprekende

 

De derde verdoolt in d'amoreuse ferie

 

Es deerlic zijn hooft met Venus brekende.

 

Dus en ben ic niet al verdoolt diet rekende.

 

Als ic thuwer liefden wil registreren

 

Die reinste triumphe, gheen ander verstrekende.

[p. 8]

 

Doen Philippus te Ghend quam triumpheren.

 

Reinst mach ic wel zegghen, want int stofferen.

 

Was daer verstandelic ghespecifieert.

 

Hoe Princen die dees waerelt gouuerneren

 

Met die stole der glorie moghen zijn verciert.

 

Zeer constich, en costelic tusschen tween bestiert

 

Was dwerc, in soberheit wel haudende mate.

 

Hier heb ic mijnen tijd gheimployert.

 

Zonder respect van eenighe scade of bate.

 

Dan dat ict onder hu defensie late.

 

 

 

Onder hu defensie wilt dit ontfaen.

 

O Prince gheboren van edelen zade,

 

Hu name blijft eeuwelic by ons int vermaen.

 

Als Keyser ghecroont duer Gods ghenade.

 

Tot hu comt zelden yemand te spade.

 

Die bij manieren yet an hu beghaert.

 

Dus ben ic bedacht by voorzieneghen rade.

 

Te biddende dat ghy dit in dancke aenueert

 

En waert huwer Maiesteit de pyne weerd.

 

Dees triumphe te lezene alst past by moeten

 

Ghy vijnd daer in hoe noode dat Ghend ontbeert.

 

Hu lieue presentie niet om verzoeten.

 

Adieu edel Keiser God wil hu groeten.

 

God wil in voorspoed hu reijse verschoonen.

 

God laet hu weder keeren fraey op de voeten

 

God stelle huwen Scepter bouen alle throonen.

 

Verciert met dusent ghepeerrelde croonen.