Dagboek van Gent van 1447 tot 1470. Deel 2

[1491]

⁺ Up den XII^en dach van wedemaent anno XCI, quamen eeneghe ghezellen van oorloghen, by laste van Mer Philips van Cleven, binnen deser stede te Sente Baefs inne, ende by onderstande van Sente Lievens sotten, die doe den heleghen sant⁽⁴⁾ verwecten⁽⁵⁾, rees roere ende verghaederynghe van volck by clopslaeghe, ende was voor de baelge van 's baellius huusseken versleghen Lievin Goeris, overdeken, en in zyn stede was deken ghecoren Jan Van Coppenhole⁽⁶⁾.

+ 1491. f^o 222 r^o

(4) Den helegen sant, den heiligen patroon.

(5) Verwecten, wekken wilden.

(6) Despars, D. IV, blz. 498 en volgende.

[p. 267]

Den XXIX^en dach van wedemaent anno XCI. naer dat tSente Lievin, by die van der stede ghepurrent⁽¹⁾ was van up 't Sant, [werd] by eender menichte van ghezellen van oorloghen, die ten versoucke van Mer Philips van Ravestain 's daechts te voorren inne ghelaeten waerren, zoe zyn ghedeputeerde verclaersden, eene wapenynghe ghemaect up de Vriendach Maert, den helegen sant daer ghehauden, de clock ghesleghen ende de wapenynghe ghedaen vulcommen met bannieren ter maert, daer men stont tot up den anderen dach van julio, daer corts naer der noene, doe men lichte; binnen welcken tyt onthooft waeren Willem Pype⁽²⁾, drye scepenen van der Kuerre, omme dat hy met Jacob De Cooman, twee scepenen van der zelver camere, ende Lievin Goeris, overdeken, hadden achterghehauden diverssche collatien, ende zonderlynghe de collacie up de assistencie van die van Brugghe in de oorloghe die dezelve van Brugghe, in den zomere XC, annomen met Mer Philips van Cleven, jeghens mynen heere van Nassau. Waeren oock onthooft Jacop De Brune, conynck van Moorkinderen, ende Hynghel De Cleerk, cleerck, van hoochbaelliu; de cause en was niet gheseit.

Up Sente Amelberghen dach in 't jaer XCI, wesende sondach, 's morghens omtrent den tween hueren voor den daghe, was by Meeukin Bollaert, met omtrent C ende L gezellen van oorloghen, inne ghenomen de stede van Hulst, ten behouf van Mer Philips van Cleven, uuter naeme van onsen harden gheduchten Heere.

Up den XXIX^en dach van septembre anno XCI, up de noene, was versleghen voor 't Scepenhuus van der kuerre, Hubeert van Luerbrouck, deken van der weverye, by Fransoeis Van Coppenhole ende zyne medepleghers, waer uute beroerte rees onder 't volck, zoe dat by clopslach de inzetenen verghaeder-

(1) Ghepurrent, vervoerd.

(2) Zie Jan van den Vivere, Chronycke, blz. 46; Piot, Chroniques de Brabant et de Flandre, blz. 271; vgl. Despars, D. IV, blz. 337 en 499.

[p. 268]

den ter Vriendachmaert, onder de standaerden van Vlaenderen ende der stede, zonder meer, ende schieden binnen avonde. Binnen den tyde van dezer beroerte, track Remeeus Hubeert, met eeneghen van den zynen, tot Sente Baefs, daer sy versloughen Ghyselbrecht De Leeu, den jonghen, ende Willem Van der Schaghe⁽¹⁾. God ghedyncke alle zielen.

Den IX^en octobris anno ut supra, wesende sondach, tusschen den dryen ende vier huerren van den morgenstont, was ghenomen de stede van Hulst. De capitain van Mer Philips van Ravestain liet⁽²⁾ de stede; maer Willem Uuten Hove, baelliu van Sente Baefs, die 'r inne ghestelt was by scepenen van Ghendt, stelde hem ter weerre met eeneghe zyne ghezellen, daer een groot capitain bleef van Salazaerts volcke; Willem, ghequets, starf van der quetse ende de stede bleef verloren. Omtrent L gezellen van Salazaerts volcke, mids der hulpe van die van der stede, daden 't innemen, ende al zyts meester waren, quam Salezaert inne met zynen volcke⁽³⁾.

Ten XXI^en daeghe van novembre anno XCI, wesende maendach, was ghehauden eene processie generale in de kercke van Sente Jans, daer omme ghedreghen was 't helich Sacrament ende de heleghe reliquie van Sente Bertolf, die in II^c jaeren niet verdreghen en waeren van der plecke daer sy stonden.

Ten zelven daeghe naer der noene, tusschen den drye ende vier hueren, quam by scepenen de wedewen van Hubeert Van⁺ Luerbrouck ende Van Gillis De Ghursseme, die versleghen waeren up Sente Michiels dach daer te voorren, ende met hemlieden joncheer Jan Van Poucke, hoochbaelliu deser stede, versouckende recht ende justicie up de ghone diese versleghen hadden; waer uut zulcke beroerte rees tusscen den zelven baelliu met zynen volcke, an d'een syde, ende Janne Van Coppenhole,

(1) Over dien Willem van der Schaghe verbannen na het Oproer te Gent in Maart 1479, zie de Excellente Cronike, f^iis ccxix v^o en cclxxij r^o; Despars, Cronyke, D. IV, blz. 182, 203, 271 en 506.

(2) Liet, verliet.

(3) Excellente Cronike, f^o cclxxij r^o.

+ f^o 222 v^o

[p. 269]

deken van den neerrynghen, an d'ander syde, datter groot gherief⁽¹⁾ hadde moghen rysen, ne hadde ghedaen datter die van der wet, metten zelven deken ende de deken van der weverye, tusschen wandelden datter geen gherief af en ghebuerde. 's Anderdaechts daer naer, was de baelliu ghevanghen, informacie up zyn stick ghenomen, hy gheexamineert by woorden ende pynen ende naerderhand by collacien gheconsenteert den zelven te leverenne Mer Philips van Cleven met zynen tichte, volghende den versoucke van den zelven Mer Philips⁽²⁾.

(1) Gherief, grief, onheil, twist.

(2) Despars, D. IV, blz. 508.