Dagboek van Gent van 1447 tot 1470. Deel 2

't Ontslaen van meester Baudin De Vos.

⁺ Item, 'ts woonsdaechs den VII^sten dach van wedemaent, mids den consente ghedaen by den conyncstavelen 's dysendaechs te vooren, was ghelesen openbaerlic voor al 't volc ten veynsteren van den Scepenhuuse de presentacie ghedaen by Mer Baudin De Vos, daer up dat hy by den ghemeenen volcke van deser stede ter maerct ontsleghen was uuter vanghenesse.

+ f^o 129 v^o

[p. 31]

Te wetene:

‘Eerst, dat hy vergheeft met goeder herten elcken al 't ghuendt dat up hem ghedaen ende gheschiet es, beede in 't vanghen ende andersins van allen voorledenen tyde, ende nemmermeer nyemende eeneghen wancost te wetene in eenegher manieren.

Item, hy heeft belooft ende hem verbonden goet vriendt ende ghetrauwe te blyvene deser stede zyn leven lanc, ende binnen deser stede te blyvene wonende zonder vertrecken⁽¹⁾, ende dit up de verbuerte van al zynen zekere dien hy ghedaen heeft, tot meer dan hondert ende vyftich ponden grooten 'ts jaers erflic, ende voort up de verbuerte van vyf ondert mudden coorens, dien hy ter stede prouffyte heeft doen uplegghen, ende by dien, alzo dat 's behouft, hy zal zekere stellen met V oft VI personen, poorters van der stede, boven den zekere die hy ghedaen heeft.

Item, hy wille ten huerbuere ende dienste van der stede coopen twalef peerden ende die der stede scyncken, of voor elc peert gheven drie ponden grooten, of zes peerden houden te zynen coste der stede behouf.

Item, up dese presentacie ende zekere, daer up dat hy ontsleghen es, M^er Janne Van der Moure ende beede de dekenen ontslaen willen.’ Dat ghedaen, de zelve Mer Baudin daer present wesende dede eedt, ter manynghen van eenen secretaris der stede van Ghendt, vrienden te zyne ende blyvende ende de zelve poynten te onderhoudene, vergaf elcken dat hem mesdaen was, ende bat elcker verghevenesse.

(1) Hij ging inwonen bij de Vrouwenbroeders in de Lange Steenstraat, waar nu het Oudheidkundig Museum is ingericht; zie Kronijk, D. II, blz. 147 en Chronique des Pays-Bas, blz. 479. Door de Gentsche bestuurders op 9 Februari 1453 bij den vorst te Brugge afgevaardigd, weigerde hij terug te keeren; hij stierf waarschijnlijk nog hetzelfde jaar.