Dagboek van Gent van 1447 tot 1470. Deel 2

[p. 1]

Dagboek van Gent van 1447 tot 1515.

[1452]

Eenen brief ghesonden an de stede van Ghendt by die van Brugghe⁽¹⁾.

‘Eersamen, wysen, onsen lieven ende ghemeenen vrienden, de Hooftmannen, scepenen ende dekenen van der stede van Ghendt, burchmeesters, scepenen ende raedt van der stede van Brugghe ende 's lands van den Vryen, saluut, jonste ende alle vrientscepe. Lieve ende gheminde vrienden, eeneghe groote ende edele heeren, gheestelic ende weerdelic, vrienden van desen lande ende zonderlynghe van der stede van Ghendt, hebben an ons gheschreven zekere advertissementen omme middele te vindene by den welcken de zware onghenouchten ende ghescillen, verstaende tusschen onsen gheduchten Heere ende prince ende der stede van Ghent, zouden moghen commen t'eenen duechdelicken hende, ter welvaert, paeyse ende ruste van den ghemeenen lande, ende zonderlynghe dat men met neernstegher ende oodmoedegher bede van eeneghen heeren van ons ende van Ypre an den zelven onsen gheduchten Heere

(1) Deze brief van 11 Maart 1452, moet geplaatst worden voor dien op blz. 319, D. I; natuurlijk ook de volgende.

[p. 2]

verweerven zouden moghen, dat hem danckelic gheliefde te zyne dat harde, hooghe ende moghende prince de grave van Stampes, de grave van Saint-Pol, de twee oft d'een van hemlieden zouden moghen moeyen ende middelaers zyn om goede expedienten te vindene, omme alle onghenouchten afgheleyt te zyne, hopende⁺ dat de voorscreve heeren die zulc zyn, zo ghy wel weet, de welcke dit landt ende stede van Ghendt beminnen, daer toe hem gheerne voughen zullen by alzo dat u gheliefde dat an hemlieden te verzouckene. Van welcken zaken, lieve ende gheminde vrienden, wy hu adverteeren ende bidden zeere jonstelic ende met herten dat ghy alle zaken wel voor ooghen hebben wilt ende ulieden met ootmoedicheden voughen, omme te vercryghene de gracie van onser voorschreve gheduchten Heere, by den middelen van den voorscreven heeren of eeneghen van hemlieden die ulieden oorbuerlic dyncken zullen ende die daer toe doen bidden ende verzoucken ende ons af te latene wetene by desen bode uwe goede andwoorde; ende als van ons, wy zullen gheerne met alder neerrenste, metgaders den voorscreven van Ypre, ter voorscrevene zaken aerbeyden zonder cost oft moeyenesse te sparene. Waer 't ooc zo dat hu gheliefde dat de ghedeputeerde van ons ende van Ypre voorscreve omme de voorseyder zaken willen by hu quamen omme met ulieden te sprekene ende adverteerne van diesser ancleven mach, ende hu gheliefde, by goeder ghetractierlicken persoonen, met hemlieden in vriendelicken te communikierne, wy zullen stappans onse voorscreve ghedeputeerde by hulieden zenden, biddende hu zeere jonstelic dat ghy hier up rypelic letten wilt ende ons stappans laten weten by desen onsen bode uwe goede andwoorde, zonder dies te willen blyvene in ghebreke, ten dien hende dat wy by middelen van den voorscreven goeden heeren stappans ons voughen moghen omme de voorscreve zake te vervoorderne heer dat eeneghe inconvenyenten meer gheschien. Lieve ende gheminde vrienden, God de Heere zy met hu. Ghescreven den XI^en dach van maerte, onder 't syngnet van ons van Brugghe over ons beeden, enz.’

+ f^o 117 v^o