Dagboek van Gent van 1447 tot 1470. Deel 1

De lettren ghesonden an de ghedeputeerde van deser stede⁺ ter voorseyder daten ligghende te Brucele.

‘Eersame, gheminde vrienden, wy zenden hu hier inne besloten de copie van den brieve by ons ghesonden an onsen gheduchten heere ende prince den grave van Charloys,

+ f^o 90 v^o

[p. 284]

inhaudende de andworde ghemaect ende ghegheven by den ghemeenen ende insetenen van der stede, de welcke hulieden ghelieve te veryfierne ende neerstichede te doene als dat de heere ende d'officiers van myns gheduchts Heeren weghen hier ghesonden worden terstont, zonder delaey, om elcken wet ende recht te doene, enz., oft anders daer datte nyet geschien en mach, zo zyt zeker dat wy nyet langher ghescepen en zyn de goede lieden ende insetenen deser stede in paeyse ende ruste te haudene, anghezien dat zy nyet meer van nu voortan in meenynghen zyn eeneghe Colatie meer te haudene dan alleenlic zo verre te doene dat correcxie ende justicie gheschien zal up alle de ghuene die yet besculdich ende mesdadich bevonden zullen wesen, ende pynt oock te laboreerne met alder neerste dat ghy van der belofte ontsleghen zyn muecht, ten hende dat ghy stappans haerwaerts commen muecht. God zy met hu. Ghescreven den achtersten dach van octobre anno LI.’

Eersame ende wysen, den ghedeputeerden der stede van Ghendt, jeghenwordelicx wesende te Brucele, onsen lieven ende gheminden vrienden.