Dagboek van Gent van 1447 tot 1470. Deel 1

⁺ De andwoorde ghesonden an de stede van Ludicke in faveure van den zelven Mer Baudin.

‘Harde, eerbare, voorzieneghe ende wyse heeren, lieve speciale ende groote vrienden, wy ghebieden ons an uwe

+ f^o 64 r^o

[p. 221]

eerbaerhede alzo jonstelic als wy connen ende moghen; ende up 't inhauden van uwer lettren in de narratie verclaersende van uwen andren bode, danof zo ghy scryft gheen tydynghe en hebt, voort dat ghy ter date van den zelven brieve compareerde voor mynen heere van Ludicke, huwen heere, de welcke, by zynder goedertierlic gratie, ter jongsten van weerden, edelen man, Willem Van Gavere, archidiakene van Campene in de kercke van Ludicke, ende edelen man, Gheeraert De Vos, synen neve, hulieden informeren van den persoon van Mer Bauwin De Vos, ruddre, dien grootelicx recommanderende met diversche redenen in huwe lettren begrepen, hier achterghelaten om de cortynghe; daer naer ons vriendelic biddende dat wy ter eeren, jonste ende liefden van huwen voorschreven heere ende van hu, die onse goede ende groote vrienden zyt, wy den voorschreven Mer Bauwin willen hebben over gherecommandeert ende hem handelen alzo vriendelic ende zoetelic als wy moghen, zonder up te procedeerne by ryguere, up dat wesen mach, ten fyne dat hu voorschreven heere, myn heere van Ludicke, ter jonsten van den welcken principalic ghy ons jeghenwoordelicxt scryft, beseffen moghen dat huwe bede an ons ghedaen, hebben gheweest van weerden ende profytelic den voorschreven Mer Baudyn; maer emmers ghy en wilde 't ons nyet verzoucken, eenich dynck wesende oft die zouden moghen wesen jeghen onse rechten ende vryheden, ende dat wy hier inne ter vrientscepe van hu doen wilden alzo wy begheeren zauden hu ghedaen t'hebbene, dwelcke ghy gheerne doen zoudt met goeder herten, achtervolghende de houde vrientscepe⁽¹⁾, jonsten, liefden ende hertelicheden, begheerten die van hauden tyden hebben gheweest tusschen hu ende ons, de welcke wy begheeren van onse voorschrevene zyde te onderhaudene met meer andre vriendelicke redenen daer in begrepen. Hu zy ghelievelic

(1) Gent weigerde inderdaad in 1431 zijne hulp aan hertog Philips om tegen de Luikenaars op te trekken die het graafschap Namen waren binnengevallen; Olivier van Dixmude, Merkwaerdige Gebeurtenissen, bz. 127.

[p. 222]

⁺ te wetene, dat uwe bode an ons onlancx ghesonden met anderen uwen brieven, van hier vertrack in onser Vrauwen daghe⁽¹⁾ tylic lestleden, by den welcken wy hu ghescreven ende ghesonden hebben al de ghestandichede van deser stede, die ghylieden begheerlic waert te wetene, ende daer uute en scriven wy nyet meer up desen tyt breedere; ende als van Mer Baudewyn De Vos, ruddere, dat wy huwe lettren danof voor 't ghemeen volck in grooter vergaderynghe gheweest ter maerct, hebben ghedaen openbaerlic lesen ende begheert daer up d'andwoorde van hemlieden, die zy overbrocht hebben, te wetene: al eys 't dat de voorschreven Mer Bauwin, naer 't inhauwen uwer lettren gherecommandeert es, dat men de zelve recommendatie, die, alzo te bemoedene es, ghedaen mach zyn by zynen vrienden om hem te helpene, nyet sculdich es up zulc anbrynghen gheloove te ghevene naer de waerheyt, de welcke es dat de zelve Mer Bauwin by ons nyet ghevanghen en es, maer by den wakers dien vonden buuten deser stede, wechrydende up eenen waghene om hem fugytyf te makene van der zelver stede, ende in de vanghenesse zynde, hy es openbaerlic belast gheweest by diverssche persoonen van tassemente, exactien ende andere overdaden by hem ghedaen up zyn laten, ondersaten ende andere persoonen; ende oock van zekere sommen van pennynghen, die hy ontfanghen heeft van der voorschrevene stedegoede, boven zynen pentioene ende eede, huwelicke ende paeyse ghemaect t'hebbene, ende oock danof sommen van pennynghen buten redene ende rechte ontfanghen, daer af partien menicfuldelicken beclaecht hebben, ende de zelve Mer Bauwin in quytenesse van zynder zielen, ter presentien van der commune, heeft gheleden omme te ontstane met wederkeerynghe⁽²⁾ te doene, ende heeft daer toe onder ons Hooftmannen ghedaen legghen eenen deel zelvers⁽³⁾ ende

+ f^o 64 v^o

(1) O.L. Vrouw Onbevlekte Ontvangenis, 8 December; zie hooger bz. 192.

(2) Wederkeerynghe, vergoeding.

(3) Eene som zilver.

[p. 223]

bovendien met eeneghen persoonen ghecomposeert⁽¹⁾ ende noch daghelicx doet van 't ghuent dies hy t'onrechte ontfanghen heeft. Niet min, om dat de goede lieden ghemeenlic van deser stede hulieden als hare ghetrauwe, vulmaecte vrienden gheerne naer huere vermoghene in allen zaken ghelieven willen, zo⁺ hebben zy ende wy met hemlieden ghewillichlic t'uwer begheerten ende liefden ghepresenteert een uutstel van den voornoemden Mer Bauwin tot in sondaghe ten tien hueren voor der noene, naestcommende, zonder binnen middelen tyden up hem te procedeerne, hulieden biddende harde hooghelic dat hulieden ghelieven wille dese andwoorde ende 't ghuent diesser inne ghedaen es te nemene over danckelick, ende onslieden voort te beteeckene huwe goede ghelieften, ten vulcommene van den welcken wy ons presenteren altyts bereet, als 't recht es. Dat kenne God die hu harde, enz., salichlic bewaren wille. Ghescreven den XII^en decembris anno een en vyftich.’

Superscriptie.	Subscriptie.
Harde, eerbare, voorzieneghe ende wyse heere, den meesters van der stede van Ludicke, onse lieve, speciale ende groote vrienden.	De drie Hooftmannen van der stede van Ghendt, t'huwer ghelieften altyts bereet.

(1) Composeren, eene vergoeding toekennen.

+ f^o 65 r^o