Dagboek van Gent van 1447 tot 1470. Deel 1

Andwoorde an den bisscop van Ludicke, up den brief die hy sandt an de Hooftmannen van der stede, in voorderynghen van Mer Baudin De Vos, ruddere.

‘Eerweerdich vader in Gode ende harde, hoghe ende moghende prince, wy ghebieden ons an huwe eerweerdicheyt ende hoocheyt alzo jonstelic ende begheerlic als wy meest moghen; ende up d'inhauden van uwer vriendelicker lettren, an ons ghesonden by den bryngher van desen, by den inhaudene van den welcken ghy by advertissemente van eerweerdeghen heere, huwen lieven neve ende medebroedere archidiakene van den Campene⁽³⁾, in huwe kercke ende van den

(3) Willem van Gavere, heer van Liedekerke, aartsdiaken der Kempen (Chronique de Jean de Stavelot, uitg. door Borgnet, 1861, bz. 529), en Geeraard de Vos, zijnen neef, waren twee bloedverwanten van Boudewijn de Vos; zij hadden bij den graaf d'Etampes, den bisschop van Luik en de stad Luik aangedrongen, om ten voordeele van Boudewijn de Vos te Gent tusschen te komen.

[p. 218]

edelen man, huwen ghetrauwen sciltcnape ende dienaer Gheeraert De Vos, synen neve, ons beteekent hu te kennen ghegheven zynde dat onlancx leden up eeneghe informatie oft lastynghe, huwen lieven ende welgheminden Mer Baudin De Vos, ruddere, heeft by onslieden gheweest ghevangen ende gheleyt in ghesloten vanghenessen, ende daer zynde, by ons stranghelic ghequestioneert van eender materien, die men hem anlegghen ende betyen mochte, by eeneghe zyne adversarissen ende quaetwillende, by quaetwillicheden ende nyde, zonder verdiente, alzo ghy haut ende vastelic ghelooft, want ghy hebten altyts ghekent ende gheweten eenen heere, eenen man van grooter eeren, van oodmoedeghen ende zoeten beleede ende van eersamer conversatien ende es met hu over zulc gherekent, ende insghelycx dat hy over zulc ghehauden ende gherekent es onder huwe andre dienaren, ende om dat ghy meent dat by slyncker⁽¹⁾ informatien dicwille by hitten, zaken verhaest werden, daer men naermaels onghenouchte ende berauwenesse af neempt, ende oock dat van te zeere te haestene⁺ lettel ducchden ende profyts toecommen; mids welcken ende meer andre redenen in de zelve huwe lettre begrepen, ghy ons bidt ende verzouct zeer hertelic, zeer vriendelic ende zeer begheerlic, dat wy t'huwer contemplacie den zelven Mer Bauwin willen tracteren ende beleeden alzo vriendelic ende zoetelicx als wy goelicx zullen moghen, sonder up hem te procedeerne by hitten oft haesticheden up ghelycke sinistre informatie, hopende dat die anders bevonden zyn zullen ende zulc als dat wy by rechte schuldich zyn ghepaeyt te zyne, ende dat wy hier in t'huwer neerster bede zo vele doen willen, als dat de zelve Mer Bauwin beseffen moghen, de zelve huwe bede hem te baten commen zynde, enz.

Hu zy ghelievelic te wetene dat wy de zelve lettre stappans als wy se ontfanghen hadden, deden openbaren ende lesen voor 't ghemeen volc van deser stede ende versochten an hemlieden

(1) Slyncker, slechte, kwaadwillige; het zelfde als eenige regels verder sinistre informatie.

+ f^o 63 r^o

[p. 219]

huerlieder advys ende goede antwoorde, de welcke zy ons overbrocht hebben, volghende der costumen, ende es dusdanich: Eerst, ten poynte daer dezelve huwe lettre mentioen maken van groter recommendatien die ghy doet van den zelven Mer Baudin, zoo mach wel wesen, zo ghy zeght, dat dezelve Mer Bauwin met hu grootelicx gherecommendeert es ende dat zyn faulte, excessen ende ghebreken, by hem ghedaen ende gheperpetreert, hu verzweghen zyn, ende mids dien, zo es te bemoedene dat ghy uwe voorschrevene lettren alzo hebt doen causeren⁽¹⁾.

Ende ten ghoonen daer ghy noopt van dat hy by ons ghevanghen ende ghequestionneert heeft ghezyn by slyncker informatien, zo es waer dat dezelve Mer Bauwin by ons nyet ghevanghen en was, maer by den wakers, die ter poorten waecten buten deser stede, ligghende secretelic up eenen waghene om hem fugytyf te makene van hier⁽²⁾; ende hem ghevanghen zynde, zo zyn up hem ghedaen diverssche clachten ende up de clachten, by ons ghehoort oorconscip ende informatie, by welcken hy bevonden es van vele foortchen, tassemente ende executie by hem ghedaen binnen ende buuten Ghendt up zyns zelfs laten⁽³⁾ ende ondersaten, ende andersins.

Ende dat meer es, dat hy zekere somme van pennynghen⁺ ontfaen heeft van der stede-goede boven zynen pentioene⁽⁴⁾, contrarie zynen eedt, ende heeft al nu dezelve Mer Baudin van eeneghen zaken onder ons ghenantiseert ende jeghen vele personen van diverschen excessen ende tassementen ende noch van daghe te daghe composeert. Dus blyckt dat gheen hitte up hem ghehuerbuert, noch by slyncker informatien up hem gheprocedeert es.

Niet min, t'huwer neerster bede ende contemplacien van uwen eerwerdeghen ende hooghen persoon, de goede lieden

(1) Causeren, spreken, luiden.

(2) Zie de Kronijk, D. II, bz. 113, op 3^en November.

(3) Laten, hoorige landsgebruiker; Verwijs-Verdam, Middelnederlandsch Woordenboek, D. IV, kol. 44.

+ f^o 63 v^o

(4) Jaar wedde als baljuw in 1444-48.

[p. 220]

ghemeenlic, om hu te ghelievene naer huerlieder vermueghen, hebben vriendelic gheconsenteert een uutset van acht daghen, te wetene, tot in sondaghe den XIX^en van deser maent, ter tienster huere voor der noene; binnen welcken termyne men up den zelven Mer Baudewyne nyet procederen en zal, up aventuere ofte hy⁽¹⁾ zyne belofte ons den volcke ghedaen, binnen den zelven tyde vulcommen mochte⁽²⁾. Ende bidden hu mids desen, eerweerdich, enz., alzo vriendelic ende begheerlic als wy meest moghen, dat hu ghelieve 't voorschreven uutset in dancke te nemene, ende voort dese voorschrevene stede ende d'insetenen van diere te hebbene over specialic gherecommandeert ende die voort te recommandeerne an onsen harden zeere gheduchten heere ende prince ende eldere daer 't van node wert, in tyden ende wylen, als wy in uwe eerweerdicheyt ende hoocheyt hebben vulmaect betrauwen, ende ghelieven hu eeneghe zaken die wy vermoghen, weet ons daer toe bereet met goeder herten. Dat kenne God die hu beware in ziele ende lyve. Ghescreven met haesten den XII^en decembris anno een en vyftich.’

Superscriptie.	Subscriptie.
Eerweerdeghe vadre in Gode, hoghe ende moghende prince, mynen heere den bisscop van Ludicke, hertoge van Buyllon ende grave van Looz, onsen harden, weerden ende welgheminden heere.	Huwe onderdaneghe dienare, de drie Hooftmannen van der stede van Ghendt, t'huwen goeden gheliefte altyts bereet.

(1) Up aventuere ofte hy, voor 't geval dat hij.

(2) Vulcommen mochte, volbrengen mocht. - Zijne belofte van 5^en December, zie bz. 188.