Dagboek van Gent van 1447 tot 1470. Deel 1

Voorghebot.

Item, ende daer zynde, zoo leyde m'er terstont uute dit voorghebot aldus: ‘Men ghebiedt van ons gheduchts heeren 's graven halven, van 's rechters ende van scepenen halven, dat elc wie hy zy die hier nyet commen en es met zyner bannyere noch vry in neerrynghen of willen stappans vertrecken van der maerct, up de verbuerte van zynen uppersten cleede.

Item, dat nyement wie hy zy ne vertrecke onder zyne banyere, zonder 't consent van zynen dekin oft ghezwoornen; in 't ghevalle dat nyement en vervoordre in te commene onder eeneghe baniere daer hy nyet vry en es, het en zy dat hy daer toe gheordonneert zy oft commen metten ghezelscepe van der zelver banniere, ende voort dat nyement wie hy zy roupen noch andere onbehoorlichede en mach [doen], elc up de verbuerte van XX groten; maer wille yement yet zegghen, dat hy dat te kennen gheve zynen dekin oft zynen ghezwoornen, de welcke ghehauden zullen [zijn] dat woort te kennen te ghevene daer 't behoort, ende men zal elcken goet recht doen.

Item, alle de ghene die nyet commen en zyn ter maerct onder hare bannyere stappans daer onder commen, up grootelic ghecorrigiert te zyne ter ordonnantien van den rechtere ende van der wet.

Item, dat nyement wie hy zy hem en vervoordere in eeneghe huusen te ghane by foortsen oft ondancke van den goeden lieden, noch daer en nemen noch en weeren eenich goet⁺ oft andre ruuthede of quathede bedriven, up de verbuerte van zynen lyve; ende omme de meeste verzekerthede, zo zal elc vangher moghen wesen. Item, alle de ghene die woonen

+ f^o 49 v^o

[p. 185]

up ondert mannen na der poorten⁽¹⁾, dat die stappans t'huuswaert trecken omme de poorten te bewaerne alzoo 't behoort. Ende dese voorgheboden up dat yement de contrarie daden zal men neerrenstelic executeren, zonder yement daer inne te spaerne. Actum ut supra.’

Item, tsnavonts drouch m'er over een dat alle mannen zyn sauden 's donderdaeghs ten IX hueren onder zyne bannyere, up fugytyf gherekent te zyne.

(1) Die deel maken van eene opperconincstavelrij van honderd mannen, welke zich het dichtst bij eene stadspoort bevindt.