Dagboek van Gent van 1447 tot 1470. Deel 1

Copie van der missive an de ghedeputeerde.

‘Eerweerdighe heere ende vaders in Gode, edele ende moghende heeren, eersame ende gheminde vrienden, alle jonstelicke groetenesse voorscreven, ghelieve ulieden te wetene dat sindert onsen lesten scrivene an hulieden, wy verstaen hebben dat de goede lieden van deser stede in meenynghen zyn ende wille hebben te procedeerne oft doen procedeerne by rygoruesen weghe up eeneghe van den ghevanghenen ligghende in Chastelet, niet jeghenstaende dat wy dat neerstelic met allen weghen ende middelen pynen te belettene ende uuterlic zauden gheerne de zaken in delaeye ghestelt hebben tot hulieden comste, 't welcke wy zeere duchten dat nyet en zal connen gheschien.

Dus dynct ons grootelic van noode dat ghylieden met alder neerste laboreert omme audientie ende expeditie te vercryghene, want ghy wel weet ende overdyncken muecht den dangier ende last diere an alle zyden ancleven mach bet voort⁽¹⁾.

Eerweerdeghe heere ende vaders in Gode, edele ende moghende heeren, eerzame gheminde vrienden, wy hauden wel in uwe verssche memorie hoe dat wy hulieden by den voornoemden onsen lettren beteekenende dat de inzetenen van de voorschrevene stede, die vernomen hebben de conclusie⁺ ende 't slot van der instructie, nyet en willen kennen eeneghe mesdaet breedre noch andersins dan hy in zulcker voormen als dezelve onse lettren begrypen, nopende daer toe diversche redenen die wy hulieden daerinne niet ghenopen en consten mits de corthede van den tyde.

Eerst 't ghuent dat zy ghedaen hebben, zy moeten doen by noode omme meerdere inconvenyenten te scuwene, want al

(1) Bet voort, verder.

+ f^o 44 v^o

[p. 173]

hadde de stede in zulcker dispocitien ghebleven, de insetene van diere hadden gheweest zonder ordene oft reghele ende elc hadde willen zyn meestre, daeromme dat vele inconvenients hadde moghen commen; dus dochte hemlieden oorbuerlic ende van node dat zy cosen eenen daer by dat 't volc mochte bestiert zyn tot dat de prince daerinne voorzien saude.

Ende anderwaerf, zo hebben zy ghelaten te zendene an den coninc van Vranckerycke, haren souveraynen heere, omme van 't ghuent dat voorschreven es provysie van hem te vercryghene, ten fijne dat gheen ghescil daer uute rysen noch spruten en soude tusschen den coninc ende onsen prince, welcke redenen ende motiven wy hulieden beteeckenen onder hulieder correcxie, te dien hende dat ghy die in 't proponeren ende beleeden van huwer materie allegieren ende nopen mueght up dat hulieden orbuer dynct, midsgaders meer andere die huwe voorzieneghe wysheyt bet consuleren mach dan wy zouden connen overdyncken. Eerweerdeghe. Actum, etc., XXIII^e novembris anno LI.’