Dagboek van Gent van 1447 tot 1470. Deel 1

Hier naer werdt anderwaerf een missive gheordonneert ende die ghesonden an den prince.

Item, tsnavens screef men ende zandt men weder te mynen gheducht Heere waert aldus:

Superscriptie: ‘Harde, hoghe moghende ende excellente prince, den hertoghe van Bourgoyngnen ende van Brabant, grave van Vlaenderen, etc., onsen harden, gheduchten heere ende natuerlicken prince.

[p. 160]

⁺ Harde, hooghe ende moghende, gheduchte heere ende natuerlick prince, alzo ootmoedelic ende onderdanichlic als ghetrauwe subgyten vermoghen ende zyn sculdich van doene, ghebieden wy ons in huwer princelicker correxie, dat sint den scrivene dat wy hu ghisteren screven, de ghestandicheyt van deser uwer stede, die ghy boven alle andre sculdich zyt te wetene als 't recht es, up den dach van heden, binnen derzelver huwer stede, huwe goeden lieden ghemeenlic van dien hebben gheweest ter maercte met huwer bannyeren, eendrachtelic omme de cause van den ghebreke van justicien dat zy met ghemeenen voyse langhe gheclaecht ende daer omme ghedoolt hebben mids der absentien van uwen baellius en andere officiers, die ten diversschen stonden ende so dicwille dat men 't costumelic zaude moghen, hemlieden vervremt hebben van hier ende als men begheerte ghehadt heeft te procedeerne by wette up de ghone die grootelic berucht ende belast hebben ghezyn, 't welc in God ende in de weerelt claghelic es ende onder huwe princelicke correcxie grootelicx in bejeghentheden van hu ende hu aerm ondersaten, die by dusdaneghen weghen zo lanc zo meer commen mochte in dolynghen.

Niet min, aldus metten bannieren vergadert wesende, zy en hebben nyement foortsche, noch overlast, noch eerch ghedaen, in woorden noch in faeyten, Gode lof, maer alleenlic ghepooght omme t'hebbene [recht], by den ghebreke van huwen voornoemden baellius ende officiers, welc ghebreck zy zeere beclaghen beede in rechte ende in justicie, ten fyne dat zy by ghebreke van dien nyet en werden in toecommenden tyden doende eeneghe zaken van foortchen, ghewelden oft andere onbehoorlichede, die principalic huwer princelicker ghenaden ende huwer goeder stede zoude moghen bejeghenen ende hemlieden met allen verdeerven ende destrueren, dat emmer zo uwe edele princelicke discretie wel beseffen mach, mids ghebreke van dien, by lancheden van tyden ghescepen zoude wesen te gheschiene.

+ f^o 39 v^o

[p. 161]

Ende om dminste grief in dit te kiesene by den ghebreke vooren ghenoumt, zo hebben zy ghecoren eenen persoon by hemlieden ghenoumt Rechtere, de welcke zynen eed doen zal huwe rechten ende heerlicheden ende vryheden te bewaerne, huwe exploten ende vervallen te ontfane, rekenynghe ende bewys daer af te doene in tyden ende wylen, ghelyck uwe hoochbaelliu dat ghecostumeert es van doene, de rechten, vryheden, costumen, prevylegien ende usagien van deser uwer⁺ voornoemde stede t'onderhaudene, omme met hem recht ende wet te doen in alle zaken, alzoo 't behooren zal ende alzo men van hauden tyden ghecostumeert heeft te doene, zonder uutnemynghen van personen oft yement te spaerne, ghelyck dat van rechtsweghen sculdich es te gheschiene.

Hebben oock dien in dese zake belooft bystandichede te doene met persoonen ende andersins, omme 't vulcommen van dien, emmer totter tyt dat huwe princelicke ghenade ghelieven zal hemlieden te voorsiene van uwen baellius oft dienaers, zonder limitacie ofte provysie, alzo uwe edele voorders, graven en de graefnedinnen van Vlaenderen, zaligher memorien, oyt ghedaen hebben ende ghy, een harde gheduchte heere ende prince, tot zekeren tyden haerwaerts dat zy ghestelt hebben gheweest by conditien, daer omme dese ghebreken ende dolynghen toecommen zyn, ghelyc vooren verhaelt ende ghenouch es, ende nyet by partielichede, al moghen eeneghe huwe princelicken persoon gheadverteert hebben, zo wel te bemoedene es, dat alzo wesen saude.

Want voorwaer ende alzo, harde gheduchte heere ende prince, zuldy 't vinden dat de wortele van alder trybulatien van deser stede binnen huwen tyt ghesciet, toecommen ende ghesciet es huut grooter scalcheden, listen ende bedechteden by eeneghe gheoorbuert, om haerlieder ghesynghulierde profyt, daer mede zy haestelic ende onbehoorlic rycke worden zyn, ten indere ende quetse van hu al vooren, die heere, meestre en prince zyt van dese voorschrevene stede, ende inghelycke van huwer justicien, die daer by in diversche manieren

+ f^o 40 r^o

[p. 162]

grotelicx ghecorrompeert es ghesyn, ende oock van huwen aermen ghemeenen insetene, die daer inne ongheregheldelic ende abuselic mesleet hebben ghezyn. Harde, hooghe, moghende heere ende prince, wy huwe harde, ootmoedelicke dienare ende ondersaten.

Supplieren alzo ootmoedelicken ende onderdanichlic als wy connen ende moghen, huwer princelicker ghenaden, dat die wille ghelieven ons waerachticleyc beteekenen⁽¹⁾, 't welcke wy doen om beters wille ende alzo wij sculdich zyn van doene, al eyst aldus ghesciet, daer inne dat wy bedrouft zyn, te hebbene over danckelic ende om Gods wille compassie up ons, ende up alle huwe ondersaten van deser stede, in zulcker wys dat wy uwer ghenaden voortan moghen beleedt syn in⁺ rechte ende in justicien, sonder dissimulatie, ende ons en twyfelt nyet, ghy en zult altoes ghetrauwe volc vinden huwen princelicken persoon beminnende, boven, dat es naest God, die den zelven huwen princelieken persoon altoos verleene victorie, lanc leven met ghesonden ende zalicheden. Ghescreven den XVI^en novembre anno een en vyftich.

Huwe onderdaneghe subgite ende ghewillighe dienare, scepenen van beede de bancken, beede de dekenen van huwer stede van Ghendt, t' huwen princelicken beveelne altyts bereet.’

(1) Beteekenen, berichten, melden.

+ f^o 40 v^o