Dagboek van Gent van 1447 tot 1470. Deel 1

Hier wert Lievin Willemets ghecoren rechter van der stede by den drie leden.

Item, tsachternoens omtrent den vier hueren, wart ghecoren by zekere ghedeputeerde van den drie leden, een rechter ende justicier, ende die uutgheroupen up 't Hoochuus, gheheeten Lievin Willemets, om daer mede te berechtene van allen zaken naer de prevylegien van deser stede, totter tyt dat myne gheduchte Heere gheliefde zijne baelius ende dienaer hier te zendene; ende om dat hy doe nyet en was present, so was belooft, conste men ne nyet vinden oft wilder hy nyet toe verstaen, dat men eenen andren nemen zaude. Ende mettien scieden alle de bannieren ende 't volc weder broederlic van der maerct, alzo zy daer commen waren; elc track in 't zyne, maer bleven de wake haudende in huerlieder huusen⁽¹⁾ als te vooren.

(1) De huizen der neringen.