Dagboek van Gent van 1447 tot 1470. Deel 1

Copie van den brieve.

Harde, hooghe ende moghende, gheduchte heere ende natuerlic prince, in alzo grooter ootmoedicheden ende onderdanicheden als wy connen ende moghen, ghebieden wy ons an huwen harden, edelen, princeliken persoon, de welcke zy ghelievelic te wetene hoe dat de goede lieden, ghemeenlic huwe zeere ootmoedeghe ende onderdaneghe onderzaten binnen deser uwer stede van Ghendt, langhe gheweest zyn in grooter kettivicheden ende tribulatien in diversche manieren, by ghebreke van justicien, by 't ghuendt dat zy te diere in gheender manieren hebben connen vulcommen om d'absentie

[p. 156]

van uwen baellius ende andere dienaren, ende dat ghebreck zo vele ghecontinueert es ghesyn dat claghelic es, ende en es oock nyet ghesien in eeneghe andere plaetsen binnen uwen lande van⁺ Vlaenderen, zo dat by dien nu onlancx binnen deser huwer stede ghesciet es uutnemende grote tribulatie ende bedructhede, sonderlynghe in 't ghuent dat zeker personen upstel ghemaect hebben in ende conclusie ghenomen omme de zelve huwe stede te scendene ende bedervene, by roupen ende wapenynghe, up dat zy hadden gheconnen ende hemlieden ghepresenteert hebbende hier binnen uwer stede te rechte ende te wette te stane naer de rechten, wetten ende prevylegien van der zelver huwer stede ende van allen zaken, die men hemlieden up zaude moghen zegghen oft vinden, zonder hemlieden te gehelpene met huwen brieven oft anderssins in eenegher manieren; ter contrarien de zelve huwe dienaers daer up in den name van hu brynghen ende leeden in vanghenessen, naer d'wysdom van scepenen, ende sint als men heeft willen daer up voort procederen by justicien, hebben hemlieden gheabsenteert.

Want anghesien dat huwe ghemeene volck dat sculdich es huwe stede ende hemlieden by natuerlicken rechte te bescuddene, te bescheermene, dat dochte belet van justicien, zo hebben wy mids dien ghemaect vergaderynghe in huerlieder huusen ende up de kennesse van den voorschrevenen persoonen openbaer daer af ghedaen doen ende vulcommen, van huws commuuns weghen justicie, alzo zy hopen in Gode, zonder nyt oft rancuer, hoe wel dat men daer in ghebreck zaude moghen allegieren by 't ghuent dat uwe officiers, in den name van hu, daer by noch over gheweest en hebben, noch oock vonnesse over hemlieden ghewyst es, welck ghebreck onder uwe princelicke correxie nyet en es by huerlieder sculden, maer by den gebreke ende absentien van huwen officiers. Ende al eys 't dat sy 't hadden moghen doen, by officiers ghestelt van den coninc van Vranckerycke⁽¹⁾, ende alzo achtervolghende by wette ende

+ f^o 38 r^o

(1) De opperleenheer van Vlaanderen.

[p. 157]

kennessen; nochtans om beters wille ende om hu te meer te obedierne zonder hemlieden elders te betreckene als goede ghetrauwe ondersaten. Ende dese executie ghedaen up de persoonen die 't wel verdient hadden, want de substancie up 't curte van haren verkennene ende verleiene in haer uuterste, es dat meester Pieter Baudins ende meester Joris De Bul, midsgaders Loy Coolbrant ende Lievin Wicke, haerlieder complycen, overeendroughen eene wapenynghe te makene binnen deser huwer stede en daer toe eenen roup gheordonneert, zo boven ghenoopt staet, de welcke zy belooft hadden te vulcommene up 't ghuent dat hem de zelve meesters toe seyden hulpe ende sercours te doen hebbene, binnen der zelver huwer stede, van diversche persoonen haren vrienden; verlydende voort dat de voorschrevene meesters zo quaet en zo valsch⁺ waren dat zy hu, harde gheduchte heere ende natuerlic prince, dese huwe stede ende hu ghemeen landt van Vlaendren verderven sauden up dat m'er nyet inne en versaghe haestelic.

Ende by alzo dat by der zelver huwer princelicker ghenade nyet haestelic voorsienigheyt gheschie van officiers binnen dese huwer stede, wy beduchten ons van noch meerder inconvenyenten ende dangieren, want hu voornoemde commuun ghenouch van der advyse es te haudene de voornoemde maniere van executien, ende dit t'achtervolghene up veel meer andere edele, notable mannen, poorters van deser uwer stede, die zy hebben doen legghen in achten van vanghenessen, daer zy noch ter tyt inne ligghen, ende waren up den dach van heden de zelve executie up hemlieden ghesciet ende dat by ghebreke van uwen dienaers, hen waren de gratie Gods ende de ghenade ons Heeren ende 't weerstaen van ons beede de dekenen ende andere huwe welwillende, die dat in grooten dangiere ende aventuere van huerlieder lyven tot noch toe beledt hebben.

Supplieren, mids desen, huwer princelicker ghenaden, alzo oodmoedelic ende onderdanichlic als wy connen ende moghen,

+ f^o 38 v^o

[p. 158]

dat hu wille believen alle dese zaken considererende, up huwe gheminde ondersaten van deser huwer stede compassie ende ontfaermenesse t'hebbene, hemlieden stappans zendende officiers, in zulcker manieren als hu edele voorders, graven van Vlaenderen, ende ghy van andren tyden ghedaen hebt, sonder exceptie oft provysien van personen oft anderssins, alsoo 't van Gods ende rechtsweghen sculdich es te gheschiene, ende by der zelver huwer princelicker ghenaden hemlieden te hebbene over gheexcuseert van 't ghuent dat by den ghebreke vooren ghenoopt ghesciet es, ende onslieden altyts te beveelne huwe princelicke gheliefte te vulcommene, van den welcken wy, als huwe ghetrauwe ondersaten ende dienaren, ons altyts presenteeren ghewillichlic ende met goeder herten bereet, naer aermen cleenen vermoghene; biddende voort Gode van hemelrycke dat hy den zelven huwen edelen persoon altyts wille bewaren in victorien, ghesonden ende zalicheden. Ghescreven den XV^en van novembre anno een en vychtich.

Superscriptie: Harde, hooghe, moghende ende excellente prince den hertoghe van Bourgoyngnen, van Brabant, grave van Vlaenderen, etc., onse harde, gheduchte heere ende natuerlic prince.

⁺ Subscriptie: Huwe onderdaneghe, ghewilleghe subgyten ende dienaren, scepenen van beede de bancken ende beede de dekenen van huwer stede van Ghendt, t'uwen princelicken beveelne altyts bereet.

+ f^o 39 r^o