Dagboek van Gent van 1447 tot 1470. Deel 1

't Verkennen van Lodin den Hamere.

Lodewyc D'Hamere zeeght dat meester Pieter Boudins hemlieden veerghde omme Daneel Sersanders doot te slane, ende men zoudere een roomsche dachvaert anghedaen hebben, alzo hy seide. Zeyde voort dat den roup gheseit was voor mynen gheduchten Heere, ende ooc zy baden dat zy mochten bescheeremt zyn van faite; daer omme zo was daer eenen roup ghemaect van:

Neerynghe, paeis ende vrede,
Ende onsen gheduchten Heere in de stede.

Maer niet en weet hy ander bescheet van eeneghen wapeninghen. Zeeght voort dat meester Pieter Boudins zeide, consten zy Daneel doot gheslaen, zy zouden werden verheven santen, ende zy zouden vele bloetsturtinghe beletten; ende Jan Van der Hoyen leedde se eerstwaerf in myns Heeren hof. De zelve zeeght dat meester Pieter Boudins ende M^er Joris De Bul hem gaven den raet om de wapeninghe te makene, ende meester Pieter ende meester Joorys zouden hemlieden bistandichede doen met haren vrienden ende seiden dat zy vele vrienden hadden binnen der stede. Voort seght hy dat den roup was gheordineert te Berghen in Henegauwe, by M^er Pieter Boudins, meester Joorys Den Bul ende by Pieter Tincken, ende daer beloofden zy M^er Pieter haer vermoghen te doene van eenre wapeninghe. Voort desen roup was verhaelt voor mynen gheduchten Heere, ende doe seide myn gheduchte Heere: ‘Het es goet, kinderen.’