Dit sijn de coren van der stad Antwerpen

't Vordeel tusschen man ende wijf.

Ene tafle gherecht met den besten ammelakene dat men pleght te beseghene, ende met den besten potte, tennen oft houten, die men pleght te beseghene, ende met den besten zilveren nappe tote ere marc, es hi beter dat sal men deelen. Die beste scotele die men pleght te beseghene. Ende den besten lepel, tote v s. toe, die men pleght te beseghene. Ende die beste scrine, ochte kiste. Item, enen stoel ende een cussen daer op van den besten dat men plegt te beseghene. Een handvat ende een becken met eenre handdwale van den besten dat men pleght te beseghene. Item, een bedde gherecht met alle dien datter toe behoert dat men gheorbord heeft. Den besten metalinen pot. Den besten ketel, zonder bruketel ende badeketel, die beste panne, roester, treeft, crauwel, brandyser, hanghele, ende [elcs] alaems een, dat men pleght te beseghene, al en eys maer een.

Item, die vrouwe sal hebben hare beste cleeder ende haer

[p. 52]

gordel, [tot eenre merc toe, op dadt daer es, eist beter dat sal men deilen], also als si paeschsdaghs, sinxendaghs, ende kerstdaghs ter kerken mede gheet. Item, die man sal hebben sine cleedere die hi t' eenen male an draght, sinen riem oft gordel, [tot eenre merc toe, alsoe vors. es], ende sine wapene daer hi hem t' eenen male mede wapent, ende sijn beste perd dat hi pleght te ridene.

[Ende soe wat manne die sterft soe sal sijn oudste sone behouden sijn ride-pert, op dadt daer es, ende wapene t' enen man, op dat s' er es, vore uut, uutghenomen labore-perde ende huere-perde.]

CLXXXVII. Item, so wie onverjaerde kindere vermontboren wille, die sal vore de stat seker setten van dier kindergoede. Ende ten ende van den jare altoes vore de stat daer af rekeninghe doen.

CLXXXVIII. Item, van eyghene erve ocht dat verandert wordt, daer af sal men gheven van voerlieve ocht verdierne eene jaer-rente.

[Item, wat goede dat verandert ofte vercocht wordt dat chijs gheeft die ter stat rechte staet, daer af sal men gheven van voerlieve alsoe vele als 't op enen dach te chise gheeft.]

CLXXXIX. Item, waert dat sake dat man ende wijf wouden maken manlecanderen hoerhuys, daer sy in woenden, met dien dat daer toebehoerde, tot elcs live, dat moghen sy doen, op dat sy willen, alse zy gaen ende staen ende ter kerken moghen gaen. Ende dat en moghen hare erfghenamen niet wedersegghen, en soude ghestade bliven. Ende wien dat huys blijft die en saelt niet moghen vercoepen noch onderslaen. Ende waert dat zake dat hijt dade, soe souden de erfghenamen haer ghedeel ane vaen ende haren wille mede doen.

[p. 53]

CXC. Item, dat een yeghelijc ghebuer den anderen moet hulpen bevreden met enen tuyne, binnen den utersten vesten, daer men 's beghert. Ende waert dadt d' een ghebuer, op't sine huyse ghetoenten oft muere maecte vordere ende langhere dan sijn ghebuer, die neffens hem laghe, dat hem dat altoes stade doen soude ende af corten van sier helft van den tuyne te houdene.

CXCI. Item, dat men alle ghenachten die ter vierscaren ingheset worden ende ghenomen, ter vierscaren bedinghen ende einden sal; ende alle ghenachten die ter straten oft ter scepenhuis ingheset oft ghenomen worden, bedinghen ende einden sal ter scepenhuis oft ter straten, uutghenomen erve ende eyghe, ende dat naerscap heeft, dat sal ter vierscaren comen.

CXCII. Item, dat gheen portere oft die binnen Antwerpen buycvast sitten, rocke, wambeyse, stoupen, hoyken noch captoene gheven en mach noch nemen dan denghenen die in sinen ate oft dranke sijn, oft die hen soe na sijn van maeghscepen dat hi se bevreden mach, uutghenomen alle ambachtsliede met horen ambachte; wie hier jeghen dade soude verboren xx lib. swerte 's heeren behouf ende ii roeden muers der stat te makene, altoes uutghenomen goede eersame porteren ende wel gheloefde, ten verclaerne ende goetdunckene van scoutet ende van scepenen.

CXCIII. Item, soe wanneer twist ghevalt in woerden oft in werken, ende dat soe verre comt dadt in vreden gheset wordt, dies en sal hem niemen onderwinden alse partie te wesene, aen d' ene side oft aen d' ander side, hi enware soe na maegh dat hi den baersculdeghen bevreden mochte; wie hier jeghen dade, waer hi groet oft cleene, soude verboren, alsoe menichwerf als 't ghesciede, xx lib. swerte toet ons heeren

[p. 54]

behouf ende ii roeden muers der stat te makene, daer se de rentmeesteren bewisen souden. Ende wie hier af ghecalengiert wordt sal sine maeghscap betoenen moeten vore den scoutet ende voer scepenen, altoes uutghenomen die met yemen in sinen huyse buycvast wonen, ende in sinen ate ende dranke sijn, ende dadinghe oft perlement omme hoers meesters wille hebben.

CXCIIII. Item, soe wie binnen Antwerpen gheseten es ende van yemene ghequetst wordt, die sal selve sine erfsaterie af doen ende sinen meester selve loenen van dies hi aen hem verdient heeft , ende waert dat de misdadeghe die de quetsuere den anderen ghedaen hadde den meester loende oft dade loenen die soude verboren 's heeren behouf x pont swerte.

CXCV. Item, waer eenich vermet oft twist geviele buten der stat, ende yement uuter stat daer omme trocke, dat hi dat doen op sijns selfs avontuere, ende wes hem daer af gheviele dat en soude de stat ane haer niet trecken. Ende waert dat deghene die alsoe uuttrocken, in dien vermete ofte twiste yet te handen trocken, daer der stat mide oft scade af comen mochte, dat men dat houden soude ane haer lijf ende ane haer goed. Ende dat ghene dekene van ambachten, omme gheens vermeets ofte gaderinghen wille, die buten valt, met gheselscape van haren ambachten uuter stat trecken en selen oft hen dies onderwinden; wie 't dade dat die daer af staen souden ter correctien van den heere ende vander stat.