Dit sijn de coren van der stad Antwerpen

Van den Vleeschouwers.

LXVIII. Item, vleeschouwers ten meesten en selen der maer twee ghesellen sijn, ende dat quic in twee partyen deelen, wie hier jeghen dade verboerde xx s.

LXIX. Item, vortane engheen vleeschouwere en mach vercopen op sijn banc meer vleeschs dan van enen runde, en ware ghezouten, ocht en ware quic dat x. lib. coste, ochte meer, dat 's te verstane, viii s. iiii d. ouder grote, op de peyne van xx s.

LXX. Item, vortane engheen vleeschouwere en sal negheenrehande quic, noch beesten, slaen, hi en saelt t' eersten ghetoent hebben levende den kormeester van den vleeschuyse; die hier jeghen dade verboerde xx s. ende der stad eene roede muers te maken op die veste.

LXXI. Item, so wie [vercochte] verzaeyt vleesch ocht gheytenvleesch, en ware wel ghezouten iii daghe eer men 't in 't vleeschuys brochte, verboerde xx s.

LXXII. Item, so wie zoghenvleesch vercoept, verbort xx s. ende en sal in 't vleeschuys niet staen binnen enen jare ende binnen enen daghe.

LXXIII. Item, vortane dat nyemen die in 't vleeschuys pleghet te stane, en mach lammere, kalvere, noch gheen ander vleesch, dat men buten Antwerpen haelt, eneghen vleeschouwere binnen Antwerpen vercopen, maer selve t' sijnre

[p. 24]

banc vercopen, op de peyne van xx s. Ende cocht een ander vleeschouwere, als hijt t' sijnre banc brocht heeft, dat vleesch, omme vort te vercopene, verborde xx s. Ende engheen kalfvleesch mach men vercopen beneden den xiiii nachten oud, op die selve peyne.

LXXIIII. Item, vortane dat vleesch dat men slaet tusschen meye ende Sinte Bamisse vor den etene, dat en mach men des andersdaghs in 't vleeschuys niet dragen, en sy wel ghesouten; die hier jeghen dade verboerde xx s. Ende dat vleesch dat men slaet na den etene, dat en mach men des derde daghs in 't vleeschuys niet brenghen, en sy wel ghezouten, op die selve peyne. In anderen tiden van den jare gheslaghen vleesch, en sy wel ghezouten binnen den derden daghe, dat en mach men na den derden dach niet bringhen in 't vleeschuys; ende dat op die selve peyne.

LXXV. Item, vortane so wie dat vleesch slaet in den weghe ochte in die strate, verboert v s.

LXXVI. Item, men sal gheene worsten maken anders dan van verkenenvleesche, so wie dat se anders makede verborde xx s. Ende die bodelinghe ende die pensen, die overbliven donderdaghs te vercopene, die en mach men niet vortane vercopen, op die selve peyne.

LXXVII. Item, vortane een verken dat niet gheringht en es, verboert binnen Antwerpen xii d. Ende buten Antwerpen, binnen vriheiden, xii d.

Item, vortane 's vridaghs, saterdaghs en 't sondaghs mach wie dat wille, vleesch vercopen op de marct op waghene, op dissche, op scraghe, op 't zant, ochte in scepe.

Die oec wille op ander daghe vleesch vercopen, hy brenght in der vleeschouwers huyse ende vercoept daer bi gheheelen

[p. 25]

stucke, ocht bi vierendeele. Ende wille hijt oec sniden ende ghesnede vercopen, so vercoept in 't vleeschuys.

Portere nochtan die heeft xl ocht, xx, ochte x scape, mach se vercopen in sijn eyghen huys, alse baken, gheheel.

Maer voer sijn huys, ochte vore sijn veinstre, en mach hi se niet legghen als te cope; die hier jeghen dade verborde xx s.

LXXX. Item, vortane wie dat voghele, ochte zuvel, dat 's te wetene: capoene, ganze, hoenre, duven, aentvoghelen ende alrehande wiltbraet, botre, eyere ende case, ende desghelike, sochte te cope ochte vore bezaghe, ochte voren cochte binnen der vriheit van Antwerpen, omme vort te vercopene, verborde xx s. Ende desghelike van duufhuysen ende van duven die daer in sijn. Ende engheen vercopere⁽¹⁾ mach copen, op engheenen dach binnen al der weken, vor der noenen, capoene, ganze, hoenre, botre, case, ochte diesghelike, op die peyne van xx s. Ende verboert dat si ghecocht hebben.

[Maer die cabret houden ende zieden ende braden, omme den goeden lieden van binnen ende vremden voert te vercoepene, selen moghen coepen alse bruytclocke verlaten es, sonder verboren, van dies zy behouven, maer dat en sullen si niet mogen rauw voirt vercopen, opte selve peyne.]

LXXXI. Item, engheen zuvelmanghere, ocht voercopere, en mach engheenen man ochte vrouwen, copen, ochte doen copen wiltbraet noch engheen vorghenoemt goet, en si dat die man, ochte vrouwe, ochte haere boden bi zijn, op de vorseide peyne, ende verloren dat daer ghecocht es.

LXXXII. Item, vortane wie dat wiltbraet ochte eeneghe-

(1) Later veranderd in: voercopere.

[p. 26]

rande vorghenoemt goet brochte in Antwerpen, in der zuvelmanghershuyse ochte vorcopershuyse, bi daghe ochte bi nachte, daer te vercoepene, ende hijt niet en brachte op die ghemeine marct, ende daer vercochte openbaerlijc, verboerde den vorseiden kore. Ende des moghen de koremeesters der vorcopers eet hebben.

LXXXIII. Item, vortane so wie dat 's vridaghs, alse men vast, zwijnensmout ocht roet smelt, verboert x s.

LXXXIIII. Item, vortane wat poertere dat staet bi enen vleeschouwere daer hi coept een verken, maeght nemen omme ½ grote vlems te wasdomme. Ende ene coe ochte enen osse omme i grote vlems te wasdomme, bi der peyne van x s. daer hijs weygherde, nochtan moeste hi den coep overgeven.

LXXXV. Item, soe wie dat cabret houd ochte voerveynstre, die sal copen sijn vleesch, dat hi ziedt oft braedt omme vort te vercopene, jeghen de vleeschouwers; wie hier jeghen dade soude verboren, alsoe menichwerf als 't ghesciede, xl s.

LXXXVI. Item, so wie die makelare ware ochte eeneghe comanscap holpe maken van vleesche, dat sijns selves ware, ochte daer hi zelve deel in hadde, soude verboren x s., op dat die comanscap i lib. grote droeghe, ochte min, ende van elken ponde groten, dat si meer ghecreghen, oec x s.

[Item, wat vleeschouwere die beesten, oft quic cochte buiten oft bynnen Antwerpen, dat hi borghde, ende deghene die se vercochte t' Antwerpen quame, ende dien vleeschouwere sijn ghelt maende, ende hem de vleeschouwere sijns ghelds loeghende, mochten dan die selve man betuighen met gueden lieden, al en waren se ghene poerteren, soe moeste hi dat ghelt terstont ghelden ende verboerde sijn ambacht een jaer.]