Dit sijn de coren van der stad Antwerpen

Van den Broode ende van den Molnaers.

LIV. Item, alrehande broode sal men maken na de swaerheit van den ghewichte dat daer toe gheset es van denghenen die men 't beveild. Die niet en bact na dat ghewichte, dat

[p. 20]

daer toe gheset es, die verboert v s. Ende men sal dat brood in twee sniden ende gheven dor gode. Ende men sal verzien dat elc brood op sijn ghewichte ghestelt wordde ende ghehouden daer op.

LV. Item, vortane die brood vercoope wille ende en heift hi gheen ghelt ghereed, men sal sine pande houden xiii nacht, ende daerna mach men se vercopen, ende dat bi der peyne van iii s.

LVI. Item, vortane en mach gheen backere, noch nyemen anders, meer verkene houden dan xii. Ende die sal men uut driven [s' morgens], vor die sonne ende weder in driven vor die zonne. Ende oec uut driven ['s avons], na die zonne ende altehand weder inne, ende dat met eenen herde, op die peyne van xx s.

LVII. Item, vortane wat moelnaren die comt op de marct tsaterdaghs om coren te copene, ochte die ter selver stat coren laedt, verboert xx s.

Ende dat gheen heere van molnen en mach hueren noch molnere noch drivere, vor meye. Ende so wie se huerde, ochte wie hem verhuerde, verhoerde xx s. Ende noch heere, noch molenere, noch drivere en moghen leenen zacke, op die selve peyne van xx s.

LVIII. Item, vortane so wie dat mout droeghet ochte bi nachte bact, als men 't verbiedt metten hoorne, verboert xl s.

LIX. Item, d' aste daer men mout op droeght die en sal niet moghen staen op enen solre. Ende dien sal men decken boven met enen solre van leeme, so dat hi breeder sy aen elc zide dan die ast enen voet, op die peyne van xx s. Ende wanneer dat vier in d' aste, ochte in den oven es, sal men setten ene cupe, ocht een ander vat, met watre daer bi, op die

[p. 21]

peyne van x s. Ende elc backere ende elc smed sal sinen scoersteen wel ende loflec maken ende houden, op die peyne van xl s.

LX. Item, dat men alle borneputten die ter straten staen, wel ende loflec te ghereke houden sal met den ghebueren die daer omtrent wonen, of waer sijs niet en daden dat de stad soude doen doen op der ghebuere cost. Ware oec yemen rebel ende met sinen ghebueren niet ghelden en woude, die soude verboren xl s., nochtan soude hi ghelijc sinen ghebueren geven moeten na goetdunken der scepenen. Ende die selve borneputten hebben die men beseghen mach, selen te halven ghelde staen van coste.

LXI. Item, so wanneer dat bi nachte brant es, so sal elc huys ene lanterne uuthanghen vor sijn dore, ochte aen sinen solre ter straten waert, op die peyne van ii s.

LXII. Item, dat elc pijnre weten sal waer hi t' eens backers, ochte t' eens brouwers huyse, die tyne halen sal, op de peyne van vii s.

LXIII. Item, dat elc beckere ende elc brouwere hebben sal een thine, enen thijnboeme ende enen eemer water mede te sceppene. Ende elc van hen sal dese dinghen setten vor sijn dore al bereet wanneer dat die stormklocke slaet, op die peyne van xx s.

Ende wat pijndre men vonde gaende achter straten, na dat de stormclocke ten brande ghesclaghen hadde, sonder thine, ocht thijnboem, ochte eemer die si aldus ten backers ende ter brouwers huyse halen moghen, ocht die si oec ten huyse niet weder en brochten daer si se haelden, verborde xv s.⁽¹⁾

(1) Er stond v s. later veranderd in xv s.

[p. 22]

Daer toe soude hi leveren moeten dat hi ghehaelt hadde, tijnboem ochte eemer.

LXIV. Item, vortane molnaers ochte knapen die ten moelnen driven, ne moghen gheen brood backe te cope die portren sijn, ocht binnen Antwerpen wonen; die daer jeghen dade verborde xx s.

Ende nyemen die molnen houdt ocht te molenen drijft in Antwerpen, en mach gheenen knape houden, sonder 't saderdaghs, die hem helpen laden. Ende dien sal hi loenen van sijns selfs, ende niet van der lieder goede; op die selve peine, het en dade openbaer nootsake.

LXV. Item, dat men alle coren dat met scepen comt, in zacken op sal doen draghen ende setten 't op die marct tsaderdaghs, ende dat niet copen noch vercopen, het en sy eer gheclopt; ende wie des niet en dade, ocht oec in scepe ochte in huyse cochte ochte vercochte, verboerde v s. van elken zacke, half die copere ende half die vercopere, alsoe dicke als 't ghesciede.

LXVI. Item, so sal enyeghelijc die koren bringht, ochte heeft te cope op die marct, als hi begonnen heift te meten ochte te vercopene, dat vort meten enyegheliken die 's beghert, ende portere ochte portersse es, op den selven coep, dat begonnen waert te vercopene. Ende wie des eneghen portere ocht portersse weygherde, die ghereet ghelt bode, verboerde v s. also dicke als 't ghesciede. Ende waert dat yemen coren cochte dat in zacke stonde op de marct, ende die zacke toe daden slaen, dat coren sal enyeghelijc portere ende portersse nemen moghen en hem doen meten, op den selven coep. Ende wie des oec weygherde als men ghereet ghelt bode, waert copere ocht vercopere, verboerde den selven kore also dicke als 't ghesciede.

[p. 23]

LXVII. Item, vortane wie dat coren vercochte, dat so goet niet en ware onder als boven, waert in scepen, in hopen, ende in sacken, verborde xx s., eest dat die copere hem beclaeght.