Commentaar op het Hooglied

(1975)–Anoniem Commentaar op het Hooglied– rechtenstatus


CCXIIIJ Hier beghint dat vierde boec NV die sunamite rast Dat si is in gode vast Gecomen mit ganser minnen Wart si veruolt mit gracien binnen 5[regelnummer] Ende denct op die arme bruut Die uan noorden sal comen uut Die sal legghen sonder hooft Want als antekerst is verstooft Die hare hooft hadde gewesen 10[regelnummer] Des is si verlost uan desen Dair om is si sonder hooft Dat antekerst was des gelooft
[Folio W30ra]
Des coomt die scone sunamite Ende gaet uut mit gansen vlite 15[regelnummer] Prediken ouer al dat lant Dan so coomt si te hant Dair si vint mandragora Dat beduut als ict versta Sonder houet ene ioncfrouwe 20[regelnummer] Des heuet die sunamite rouwe Ende hair ontfarmt dat si leget Opten acker des niement pleget Des bidt si den brudegom Dat hi na vriendeliken rom 25[regelnummer] Mit hair ga dair si begaert Dair omme spreect si hier ter uairt ¶ Com miin vrient wel soete minne Ende gaen wi uut ten acker inne Ende laet ons inden dorpen wonen 30[regelnummer] veni dilecte mi egrediamur in agrum commoremur in villis Cxxvij ¶ Van deser letter moghen wi tonen Die glose als der uierder bruut Wel toe hoort aluut ende uut 35[regelnummer] Want die heilighe moeder kerke Vordren mach in ghenen werke Sine hebbe te helpe den brudegom Als hi selue spreect mit rom Sonder mi en moghedi niet 40[regelnummer] Volmaken wat ghi an v tiet Ende want si gairne bringen soude Die bruut uan noorden of hi woude Te hem ende si in sine minne Mit woirden mit werken van rechten zinne 45[regelnummer] Des bidt si. dat hi hair dair toe Helpe rade. hoe si dat doe Dair om spreect si thant mit mi Make dine lere in mi so vri Dat ic brenghe an di die gone 50[regelnummer] Die altoes noch siin ghewone Mit ongheloue omme te gaen Dat icse di uast bringhe aen
[Folio W30rb]
Mit prediken ende mit lere Dat si bliuen emmermere In di mit herten ende mit minnen Vast in ghestadighen zinnen ¶ Biden acker wi uerstaen Wel dat uolc dat heeft ontfaen Tgheloue ende is ghebouwet 60[regelnummer] Mit lere ende in gode ghetouwet Hier in wil die bruut beghinnen Prediken om dat si mit minnen An hair te bat die heiden tie Die noch an gode gheloefden nie 65[regelnummer] Dair om spreect si. laet ons wonen Inden dorpen dats sonder honen Inder heidenscap die noch Geuaen siin in des duuels droch Dair wil si in wonen ende bliue 70[regelnummer] So langhe dat si ooc becliue In gode ende in salicheit Des spreect si al hier na gereit

Vorige Volgende

CCXIIIJ Hier beghint dat vierde boec