Commentaar op het Hooglied

CLXXXIIJ Hoe die bruut die dochtren besweert

Ghi dochtren van iherusalem
Ic beswere v sie di hem
Dien ic minne secht hem dat
Dat ic bin uan minnen mat
Ende verquolen ende verswinde
Dit seit die bruut tharen gesinde
Die dochtren uan iherusalem
Siin die sielen die so hem
Saten so dat si in gode leuen
Entie werelt al begheuen
¶ Ene andre glose spreect wel dat
Iherusalem die heilige stat
Dair die salighe sielen siin
Ewelijc sonder termijn
Dat si voir gode die kerke bewaren
Mit ghebede sonder sparen
Die noch hier in dogen leuet
Ende doch an gode in minnen cleuet
Dat si bidden. want sine sien
Dat si cortelike wil tien
Them om die grote minne
Die si them heuet mit sinne
¶ Die bruut heuet ghelopen omme
Te soeken bi rechte bi cromme

[fol. B41ra]

25

Hair lief ende hi was uerborghen

 

Des was si in groten sorghen

 

Ende beswoer hair lieue kinder

 

Of sine uonden sonder hinder

 

Dat si hem te weten daden

30

Datsi mit minnen was verladen

 

Des siin die dochtren te ghemake

 

Ende uraechden hair om welke sake

 

Si so aernstelike soeket

 

Haren urient des si wel roeket