Commentaar op het Hooglied


CLXXVIIJ Hoe node die bruut hair beslet mitter werelt. DIe uan desen text den sin Wil na der glosen nemen in Die sal mit wairheit weten Wanneer die goede sielen vergheten 5[regelnummer] Heeft die werelt ende hair ghenoecht Ende hem temale in gode uoecht Ist hem uan ganser herten leet Sal hi weder siin bereet Ter werelt ende hem beulecken 10[regelnummer] Ende uan enicheit hem trecken Ende uan gode mit innicheit Die hem in gode was bereit ¶ Dair om spreect die salige bruut Die hair der werelt had al uut 15[regelnummer] Gedaen. dat mense weder brengt Dair si mit sonden wart ghemengt Want wie alter werelt is Die moet sondigen sonder mis Si claghet dat si an nemet 20[regelnummer] Der werelt cleet dair si gheuremet Of was ende dat si weder sal Hair begheerte beulecken al Der sielen uoeten in waren dingen Siin altoes hair begheringhen 25[regelnummer] Dair si mede in gode gaet Ofter werelt alst hair staet ¶ Dair om spreect die lieue bruut Ic heb minen roc nv uut Gedaen: dats dit ic heb gebloot 30[regelnummer] Mi uan alder werelt noot Hoe sal ic mi nv dair toe setten
[Folio B39rb]
Dat ic mi weder sal besmetten Dat is mi wel groot dogen Mine uoeten siin gedwogen 35[regelnummer] Dats mine begheerte dair ic mede ga Te gode dat ic hem come na Heb ic mit penitencie fijn Scone ghemaket hoe sal dat sijn Dat ic die weder sal ontreinen 40[regelnummer] Mit vuulre wereltliker meinen Want wie in die werelt is Is in groten anxt gewis