Commentaar op het Hooglied
(1975)–Anoniem Commentaar op het Hooglied–
Auteursrechtelijk beschermd
[Folio B36ra]
| |
// Alle den gonen die dair siin
Hi is ooc goet iegen uenijn
Ende hi uerdriuet lazarie
Dese boom als ic hier lie
5[regelnummer]
Beduut wel die oetmoedich siin
Die uerdriuen des duuels venijn
Der houairdie ende hare kinder
Ende uan oetmoede comt oec hinder
Der onreine lazarien
10[regelnummer]
Dat siin die sonden die niet vertien
Den mensche tot in sine doot
Dat is goet dunken al bloot
Dese siin in hem seluen clene
Mer hare name is ghemene
15[regelnummer]
Voir die werelt ende bequame
Dats den duuel grote scame
¶ Dander boom die nardus heet
Inden paradise ook steet
Die uan stamme niet is groot
20[regelnummer]
Nochtan gheuet hi ter noot
Soete salue ende duerbair
Van roke is hi openbair
Hi is heet in sine nature
Men maecter salue of goet ter cure
25[regelnummer]
Soete reine ende bequame
Is hi ende beduut sonder blame
Die in rechter caritaten
Hair leuen in gode saten
Entie niet dan gode minnen
30[regelnummer]
Ende hare naeste in allen sinnen
Dese siin in goede name
Enter kerstenheit bequame
Clene om ootmoedicheit
Te helpen te troesten al bereit
35[regelnummer]
Siin si ende gheuen goet gebilde
Altoes mitter dogeden scilde
¶ Int paradijs vintmen ooc staen
Ene blome heet soffraen
In hare uerwe is si root
40[regelnummer]
Mer als mense wriuet of stoot
| |
[Folio B36rb]
| |
... ghet mit enigen dingen
So neemt si uerwe sonderlingen
Naden goude. hier bi beduut
Ons uele kinder. die die bruut
45[regelnummer]
Heuet: ende hair leuen saten
Mit verduldicheit ter baten
Hare sielen tallen tiden
Ende mitter wijsheit altoes striden
Ende uechten mit onnoselheit
50[regelnummer]
Iegen die sonden ende quaetheit
Dit cruut int paradijs wel wast
Dat den duuel is een groot last
¶ Fistula is ooc een boom
Betamelic nemen wijs wel goom
55[regelnummer]
In sine stamme so ist cleen
Mer siin oirbair is ghemeen
Als purpur is sine ghedane
Ende heeft grote doget ane
Van roke fiin: ter medicinen
60[regelnummer]
Is si goet in menigher pinen
¶ Dese betekent. die onsculdich
Siin uan quade ende doch verduldich
In allen dingen die si dogen
Want si om gode allene pogen
65[regelnummer]
Dese siin der purpur ghenoot
Want si siin uan duechden groot
Ende voir gode martelare
Hairs namen roke is openbare
Exempel gheuen si te liden
70[regelnummer]
Ende verduldelike te striden
¶ Dair in wasset ooc caneel
Die uan duechden heeft groot deel
Teersten is hi starc int smaken
Ende na smaect hi mit ghemake
75[regelnummer]
Dit betekent die om zonden
Mit penitencie siin ghebonden
Eerst hebben si hardicheit
Ende troest thant mit soeticheit
Dese bomen wassen dare
80[regelnummer]
Mit allen bomen ouerware
| |
[Folio B36va]
| |
Die opten libaen wassen ...
Die glose die hier is gheleghen
Beduut dat alle dese bome
Betekentlijc ende mit vrome
85[regelnummer]
Wassen inden paradise
Der kerstenheit in sulker wise
Dat si beduden aldie goede
Die gode ontsien mit reinen moede
¶ Noch siin uele meer bome
90[regelnummer]
Die niet en noomt die brudegome
Mer hi spreect alhier ter stede
Mit allen libaens houte mede
Dats mit alle die noch siin
Int gheloue mit werke fijn
|
|