Commentaar op het Hooglied

(1975)–Anoniem Commentaar op het Hooglied– rechtenstatus


CLVIJ Noch ene glose Der sielen hare der bruut ons heren Siin ghedachte van rechter leren Die uter herten op wairt gaen Te gode ende vaste dair in staen 5[regelnummer] Die gaen als gheiten van galaat
[Folio B30va]
Want si dinken wel op dat Dat cristus doir ons allen leet Ende dat hem menich gereet Heuet gheuolghet inder doot 10[regelnummer] Ende mit bitter mertelien groot Die si al doechden verduldelike So wat si liden in gode rike Des gaen si op bi oirconde Dat cristus god is talre stonde 15[regelnummer] ¶ Dine tanden siin openbare Als scape die siin uander scare Ende uander wassche scoon op gaen Al siin si mit dracht ontfaen Die twielic is: geen is dair onder 20[regelnummer] Die ondrachtich is bi sonder dentes tui sicut grex tonsarum ouium que ascendunt de laua\chro omnes gemellis fetibus et sterilis non est inter eas. lvij 25[regelnummer] ¶ der heiligher kerken tanden siin Leerre die mit wairheit fijn Die scrift ontbinden ende kuwen Ende ter salicheit vernuwen Ende senden voort die rechte lere 30[regelnummer] Ter werelt door gods ere Onder tuolc dair een lijf is Der heiligher kerstenheit ghewis Ongheloue ende quaet diet Verbitense sonder verdriet 35[regelnummer] Ende si voeden in gods name Die kerstenheit al sonder blame ¶ Dese tanden mogen wel gheliken Den scapen die reine op striken Ende uter wassen scoen op gaen 40[regelnummer] Vander dope sonder waen Si voeden die kerstenheit gemene Want die dope maectse rene Mitten melke hairre lere Lauen si die lude sere 45[regelnummer] ¶ Ic mene die hier al begheuen
[Folio B30vb]
Hebben in dit airdsche leuen Dese siin uter wassche comen Vander dope tharen vromen Si siin wel tanden want si sliten 50[regelnummer] Onrechticheit ende verbiten Quaetheit: ende wat is tiegen gode Ende wat is tiegen sine ghebode Dese siin ooc al mit vrocht Die twielic is in saligher tocht 55[regelnummer] Want si twerande minne Altoes draghen in haren zinne Te gode enten euenkersten Dese twee hem nemmer bersten Onder dese scapen fijn 60[regelnummer] Die der kerken tanden sijn En is niement sonderlingen Ondrachtich in saligen dingen ¶ Der sielen tande siin ghewis Der heiligher scrift gehogenis 65[regelnummer] Dair si mede doorbiten scier Die hartheit der sonden hier Dese siin uan onreinen gedachte Bescoren mer si hebben achte Al dat gode toe behoort 70[regelnummer] Mit salicheit te bringen voort Si hebben twerande vrucht Leren ende salichs leuen tucht Onder hem is ouer wair Niet dat is onuruchtbair 75[regelnummer] ¶ Dine lippen sijn albloot Als ene huue uan uerwen root sicut mirra coccinea labia tua lviij ¶ Der kerken lippen sijn prelaten 80[regelnummer] Die dat uolc in een so saten Ghelike die huue dat hair bint Dat niet te spreit mit alle wint So sullen die prelaten voeghen Ende dat uolc te samen loeghen 85[regelnummer] In enen gheloue in enen leuen
[Folio B31ra]
Dat si in allen winde niet sneuen Dats dat si in allen stonden Verwaeiet niet en werden vonden Des liden si pine groot 90[regelnummer] Ende hebben menighen weder stoot Als si vergaderen die gods kinder Ende liden menigherande hinder Dair si nochtan verduldelike In leuen: ende ootmoedelike 95[regelnummer] ¶ Voort spreect die brudegom ter bruut Dine sprake is ouer luut Soete: want si werket mede Dat si leret talre stede et eloquium tuum dulce lix 100[regelnummer] ¶ Des predicairs woort is wel soet Die wel leert ende wel doet ¶ Dine wanghen siin ghelijc Den stucke des appels uan pennijc sicut fragmen mali 105[regelnummer] punici gene tue absque eo quod intrinsecus latet lx ¶ In affrica is een lant Dat punica is ghenant 110[regelnummer] Dair in wassen appel greine Die root buten siin gemeine Ende binnen siin altoes wit Si siin soete sonder smit ¶ Der kerken wangen ons beduden 115[regelnummer] Sameninge uan goeden luden Die siin root uan caritaten Want si in gods minne hem saten Mit penitencie ende mit liden Dair si hem dicken in uerbliden 120[regelnummer] Si siin uan binnen emmer wit Want si cuusscheit sonder smit Inder herten altoes draghen Dair si gode in behaghen Si siin ooc vol greinen binnen 125[regelnummer] Bi werken ende ghedachte van minnen
[Folio B31rb]
Ende bi exempel uan goeden leuen Die si den uolke ter doget gheuen Dese moghen sonder hone Der bruut wangen heten scone 130[regelnummer] Want si geuen scoon aensien Alle die dair an wel spien ¶ Diin hals is als dauids toren Dair ghemaket wel siin voren Vaste voerwerke ende weren 135[regelnummer] Te pointe uoirder vianden deren Dair dusent scilde hanghen an Wapen telken sterken man sicut turris dauid collum tuum que edi\ficata 140[regelnummer] est cum propug\naculis mille clipei pendent ex ea et omnis armatura fortium lxj ¶ Die kerstenheit heuet uele uiande 145[regelnummer] Diese mit quaetheit menigherande Aneuechten bi dage bi nachte Die duuel ende sine crachte Onghelouighe ioden heiden Quade kersten mit verleiden 150[regelnummer] Die werelt ooc mit groten nijt Elc op alle die goede strijt Des behoeft der bruut dan wake Als si wederstaen te mate Sal dese uiande: dat si winne 155[regelnummer] Vestinghe dair si vut mit sinne Striden mogen ende hair uerweren Dat hair die viande niet en deren Des heuet cristus wair dauijt Die is begheerlijc talre tijt 160[regelnummer] Enen toren hair ghemaket Die so vast is ende gheraket Datten niement mach ghewinnen Noch deren die dair siin binnen Dese toren is als ende als 165[regelnummer] Wel ghelike der bruut hals
[Folio B31va]
¶ Der bruut hals is twoort ons heren Dair si mede wel mach keren Al aneuechten ende al quaet Dat hair uan buten ane gaet 170[regelnummer] Hier mede cristus selue street Iegen sathan die op hem beet Mit coringhe inder woestinen Hi liet hem dat woort gods scinen Dair hine al mede uerwan 175[regelnummer] Doe die apostole namen an Gods woort doe uerwonnen si Wair si predicten verre ende bi Si uerwonnen ioden heiden Ende brochtense ter salicheiden 180[regelnummer] ¶ Dit hebben ooc alle die gedaen Die kerstenheit hebben ontfaen Ende waren ghekeert uander scricht Dair kerstenheit op is ghesticht Gregorius sinte augustijn 185[regelnummer] Ende menich ander lere fijn Die ongheloue hebben door vochten Mit godswoirde: ende wrochten Salicheit onder den volke Want sise uandes duuels dolke 190[regelnummer] Ende uan ongheloue bewairt Hebben wel onghespairt ¶ Van desen toirne die voerwerke Dair vut strijt die heilighe kerke Dat siin mirakel ende wonder 195[regelnummer] Die die heilighe al bi sonder Deden apostolen ende martelaren Confessoren ende predicaren Magheden ende ander vriende ons heren Die alle streden mit groter eren 200[regelnummer] Ende uerwonnen in salicheide Ende brochtent al ten kerstenheide Hoort kinder ende nemet ware Sonder hinder ende vare Moghen wi manlike alle striden 205[regelnummer] Mids gods woort tallen tiden
[Folio B31vb]
Ieghen al dat ons mach deren Willen wi selue ons uerweren Wi moghen die viande verdriuen Ende in gode vaste bliuen 210[regelnummer] An desen halse hanghen scilde Dat siin reines leuens bilde Die inder heiligher kerstenheit In desen leuen siin bereit Van onuertelliken goeden mensche 215[regelnummer] Die nader salicheden wensche Leuenden. dit mogen wel wesen Vaste scilden als wi lesen Dair siin dusent bi ghetale Dit beduut uolcomenheit wale 220[regelnummer] Der exempel uan goeden leuen Die ons die goede hebben ghegeuen Dair siin so uele dat niement mach Al ghespreken nacht of dach Dese draghen wi uoor ons te striden 225[regelnummer] Tieghen quade tallen tiden ¶ Ooc mogen wel die scilde sijn Die ghebode ons heren fijn Ende raet dat hi mede Ghelouet heeft ter salichede 230[regelnummer] Den ghenen die manlic uerwinnen Ende houden mit herten ende mit zinnen Sine gheboden ende sinen rade Volghen: ende bliuen sonder scade ¶ Hore mensche alstu striden wilt 235[regelnummer] Nem voir di der duechden scilt Mitten cruce tekene di Ende wes uan allen sorgen vri Ende nem gods woort in dinen mont So uerwintstu talre stont 240[regelnummer] ¶ Dine borsten sijn ghelijc Tween iongen zegen die siin twilijc Die inden lelien werden gheuoet Tot die dach mit goeder spoet Op gaet. ende als die deemsterhede 245[regelnummer] Verswint uander salichede
[Folio B32ra]
duo vbera tua sicut duo hinnuli capree ge\melli qui pascuntur in lilijs donec aspiret 250[regelnummer] dies et inclinentur vmbre lxij ¶ Dese twee borsten als wi lesen Moet wel twerande uolc wesen Ioden ende heiden mede Dese twee heuet die kerstenhede 255[regelnummer] Die bruut is an hair ghetogen Als twee borsten dair si mede sogen Altoes mach hair lieue kinder Mitter wairheit sonder hinder Dese siin ghelijc den zeghe iongen 260[regelnummer] Die siin an haren eersten sprongen ¶ Die zeghe stinket ende is versmaet Mer die vrucht die van hair gaet Siin nuttelijc ende bequame Dus siin die twe uan zegen name 265[regelnummer] Want si uten sonden comen Mer si hebben nv ghenomen Die doghet an ootmoedelike Dair om siin si wel ghelike Den iongen zegen den ouden niet 270[regelnummer] Als men uan haren werken siet Die gods vercoren wel mogen siin Clene ende ionghe zeghelijn Clene siin si openbair In ootmoedicheit voirwair 275[regelnummer] Ende want si vairdelike springen In gods dienst tallen dingen Des ziin si vairdich ende snel Ende altoes ionc verstaet dit wel Mer dat si siin uan seghen slacht 280[regelnummer] Dat comt bider zonden acht Die stinket als die zeghe doet Des denken si in groot oetmoet Vanden sonde bistu comen Sonden heuestu an di genomen 285[regelnummer] Piindi sonden emmer te scuwen
[Folio B32rb]
Ende in doechden emmer vernuwen ¶ Si siin ooc inder vrucht twilijc Want si altoes vlitelijc Houden twerande minne 290[regelnummer] Gods ende des naesten mit zinne Dese werden mit goeder spoet Inden lelien wel gheuoet Want si onder die goede leuen Die goede lere altoes geuen 295[regelnummer] Nair leuen ruket uoer alle mensche Si siin wit in gode te wensche Dese worden hier so lange gheuoet Als het gode dinket goet Dattie dach der ewicheit 300[regelnummer] Ten lesten comet al gereit Als die dach op gaet so verzwindet Die deemsterheit dat men niet vindet Mer dat iemen letten mach Te sien clairheit den langen dach 305[regelnummer] Die nemmer en criget ende Dair bringhe ons god sonder miswende

Vorige Volgende

CLVIJ Noch ene glose