Commentaar op het Hooglied

(1975)–Anoniem Commentaar op het Hooglied– rechtenstatus


CLI Een ander glose NOch mogen wel die gods kinder Beide meerre ende minder Verwonderen wair om dese bruut So utermaten scone comt uut 5[regelnummer] ¶ Dair om antwoort si te staden Wat mach v wonder hier verladen Dat ic come totien ic minne Want an hem staet al mine sinne Dair om sone wondert v niet 10[regelnummer] Dat ghi mi dus climmen siet Te hem mit so groten gare Want ic ghairne in rusten ware Tot hem clim ic als ic ter rusten Dat allen sielen wel mach lusten 15[regelnummer] ¶ Siet dat beddekiin salomoens Des begheerlics dauids soens Dair hair tsestich ommegaen Die alre stercste sonder waen Van israel die alle zwairde 20[regelnummer] Houden scarp van groter wairde Die alre beste siin gheleert Te stride hoe ieghelic heeft ghekeert //
[Folio B28ra]
// Van deser wittinge wast cederboom Dair of maect die brudegoom Huus bedde ende tafel mede Dat merket vlitelijc hier ter stede 5[regelnummer] Cedar mach niet te varen Van rotten noch uan lange iaren Gheen vier mach hem ooc scaden Hi heuet bider gods genaden Dat serpente uan sinen rooc 10[regelnummer] Vlien: dit siin die goede ooc Die heilige lude die ontfaen Hebben salicheit op den libaen Dats uander dope dair si op wassen Ende in gode hair leuen passen 15[regelnummer] Dese siin uast ende hart Want si om ghene vart Vervuulden of te broken wairden Van enighen dingen op ter airden Diese uan gode iet mochten sceiden 20[regelnummer] Noch bi lieue noch bi leiden Der sonden serpenten verdriuen si Mit hare lere verre ende bi Ende mit haren heiligen name Die alder werelt is bequame 25[regelnummer] Vanden luden uandesen blomen Heuet god bi siins selues gomen Gemaket bedde huus ende tafle Dese spiset mit gods wafle Al die heilighe kerstenheit 30[regelnummer] Die lettre seghet voort ghereit Dat dese tafle was ghemaket Op vier colommen wel geraket Van finen seluer ende clair Die leene was guldiin gair 35[regelnummer] Die opganc dair men bi op ginc Was purpuren in alre dinc Midden was die dele wel bespreit Mit caritaten wel ghecleit ¶ Die colommen die onderstaen 40[regelnummer] Die tafle: dat siin sonder waen
[Folio B28rb]
Die vier ewangelisten rechte Dair gods tafle op staet slechte Want mitter ewangelien lere Is kerstenheit ghespiset sere 45[regelnummer] Dese colommen siin seluerijn Want si uan gods woorden sijn fijn Seluer beduut gods woort Als ons dauid bringhet voort Die lene is ghemaect uan goude 50[regelnummer] Dats uan duechden menichfoude Ende uander heiligher kerken ghebet Die wel is biden goude gheset Want gout en verteert niet In viere in airde in geen verdriet ¶ Dus en is tghebet niet minder In pinen in dogen ende in hinder Ghebet in doechden ende in hope Dits al gout in gods cope Dit siin uan cederbome die aste 60[regelnummer] Dair men op mach lenen vaste Die heilighe hope is ene lone Der saligher sielen ene vaste stone Dese hope is van goude clair Mit alre doget ouer wair 65[regelnummer] Ende als hope tghebet verchiert So ist al wel gheuisiert Bi den goude dat vaste is Dits der sielen lene ghewis Die op ganc dair men bi op gaet 70[regelnummer] Tot deser taflen dat verstaet Is uan purpur root ende scone Die heuet gheuerwet die gods sone Mit sinen bloede doe hi hinc Anden cruce dair hi ontfinc 75[regelnummer] Den doot: doe maecte hi voer wair Onsen op ganc openbair Dair wi bi op sullen gaen Tsire taflen sonder waen Dat is bider hoghenisse 80[regelnummer] Sire mertelien sonder wisse
[Folio B28va]
Als hi leert hier ons allen Wanneer v mach gheuallen Dat ghi mijn uleesch ende mijn bloet Nemet so ghedinket ende doet 85[regelnummer] Dats in die hoghenisse miin Dits een op ganc te gode fijn ¶ Die dele is midden ghepaueiet Mit caritaten ende bescreiet Die scone dele der heiliger kerken 90[regelnummer] Dats uolcomenheit uan werken Die sullen alle mit caritaten Siin uerchiert tonser baten Want wat werke datmen werket En heuet voer gode genen merket 95[regelnummer] Comt uan caritaten niet Dats uan minnen wats gesciet ¶ Die caritate sal midden siin Tusschen gode entie werke fiin Want goede werke sullen comen 100[regelnummer] Vte gods minne sulsi vromen Om die dochtren uan iherusalem Die noch leuen al bi hem ¶ Die dochtren siin die siele alle Die bider salicheit gheualle 105[regelnummer] Ende bi werken uan gheloue Comen siin indes hemels houe Dair si in rusten ende in vreden Ewelike siin mit salicheden Om dat si gode mogen louen 110[regelnummer] Dat si alles dinghes siin bouen

Vorige Volgende

CLI Een ander glose