Commentaar op het Hooglied

.C. Van drien berghen

DRierhande berghen sijn
Die ic v wille maken scijn
Vander scrift na mire macht
Die god selue heuet bedacht
¶ Dene siin dair bouen scone
Die enghele in gods trone
Die siin verheuen in salicheit
In kennen ende in wairdicheit
Dese siin berghe wel gheheten
Van ysaien den prophete
Berghen ende houelen sullen singhen
Lof uan gode sonderlinghen
Die minste gheeste siin ghenoemt
Houel dat hem wel becoomt
In dien sprinct die goedertieren
God: in godliker manieren
In ygheliken na sire wairde
¶ Dandre berghe siin opter airde
Dit siin die menschen die verheuen
Siin uan salichliken leuen
Hier of sprac als ic las
Die prophete ysayas
Die berghe moeten vrede ontfaen
Entie heuele nemen aen
Gherechticheit dit sijn dan lude
Dair cristus in mit waren dude
Springhet so verholentlike
Ende soect den mensche so minnentlike
Dat tonge geen en can uol seggen
Hoe sire spronge wege leggen