Commentaar op het Hooglied
(1975)–Anoniem Commentaar op het Hooglied–
Auteursrechtelijk beschermd
[Folio W20va]
| |
Dat si mit werke talre tijt
5[regelnummer]
In hair liefs minne wil bliuen
Ende so lanc so meer becliuen
Des keert si tharen ghespelen
Ende spreectse toe al sonder helen
¶ Volt mi mit blomen ende onderset
10[regelnummer]
Mi mit appel mi is te bet
fulcite me floribus et
stipate me malis quia
amore langueo xxxj
¶ Dese woorden siin bedecket
15[regelnummer]
Inder lettren. mer wiese trecket
Inden gheeste die mach sien saen
Wat si menen. ende wel verstaen
Die bruut en is niet verdult
Dat si wesen wille veruult
20[regelnummer]
Mit blomen dats mit stucken
Die men mach mit wairheit plucken
Vten rechten gheloue uan gode
Ende vter salicheit ghebode
Dat si dan spreect vult mi mit blomen
25[regelnummer]
Dats leert mi al die pointen nomen
Die ten rechten gheloue horen
Dit siin blomen uutuercoren
Het is ene blome scone
Dat men ghelouet in drie persone
30[regelnummer]
Enen almachtighen waren god
Diet al heeft in siin ghebod
Ende dat hi is sonder miswende
Sonder beghin ende sonder ende
Der ghelouen bloemen al
35[regelnummer]
Is te nomen geen ghetal
Mer sonderlinghe moetic nomen
Der gheloue drie beste blomen
¶ Deerste is hier al nv gheseit
Vander hogher drieuoudicheit
40[regelnummer]
Dair vele blomen vte wassen
¶ Dander blome dair wi op passen
Is uan cristus menschelicheit
Die menige blome vte spreit
| |
[Folio W20vb]
| |
¶ Die derde is datmen altoes
45[regelnummer]
Sal ghelouen sonder loos
Alle wairheit ende doghet
Hier mede wart die bruut verhoghet
Van desen blomen bidt die bruut
Dat si veruullet si al uut
50[regelnummer]
Mer dat si onder set wil siin
Mit appel. dats der werke scijn
Die uten gheloue sullen comen
Ghelike dat appel hebben ghenomen
Van blomen dat si siin vrucht
55[regelnummer]
Van soeter smake van soeter lucht
Also heuet die moeder kerke
Ontfaen uan gheloue werke
|
|