Commentaar op het Hooglied

XXXIIJ Vanden kelren wat si sijn

HIer sulwi proeuen ende merken
Wat dese kelren pleghen werken
Ende wie si siin ende wat men dair
Vint. des nemet al wel wair
Vier kelren mogen wi beduden
Vter scrift den kerstinen luden
¶ Deerste is die verholentheit
Der heiligher drieuoudicheit
Die is die rijcste entie meeste
Want hi gheeft wiin uan hogher feeste
Hier in wart die bruut gheleit
Want hair uan gode wart bereit
Dat si proeuet ende merket
Wat god is ende wat hi werket
Hoe die almachtighe godheit
In personen heeft ondersceit
Ende hoir nochtan een wesen is
Een god ende een nature ghewis
Die alle dinge in siin ghewout
Mit ruste ende mit ureden hout
Ende dair hi is sonder beghin
Ende sonder einde meer noch min
In drien personen ene nature
Ende meester alre creature
In desen riken kelre steden
Drinct die bruut wiin uan ureden
Dair si in gode mede wart ghesterket
So dat si altoes in hem werket
¶ Dander kelre is ghereit
Een ouerscone verholentheit
Der menscheit die cristus ontfinc
Dair hi tot ons mede ginc
Om dat hi ons verlossen woude
Hier is sueticheit menichuoude
Hier is wijn die der bruut zinnen
So verblijt in rechter minnen

[fol. B10va]

 

Dat si der werelt al uerghet

 

Ende hair te male in gode set

 

Hier moghen wi of die wairheit merken

40

Die wi recht in cristus werken

 

Doe hi nam die iongher wairde

 

Opten berch tabor in vairde

 

Ende hi uerwandelt want al dair

 

Voir hem in clairheit openbair

45

Dair helias ende moyses

 

Mit hem spraken al ghewes

 

Dair wart sinte pieter saen

 

Van sueticheit also beuaen

 

Dair hi der werelt al vergat

50

Ende onsen here aldus bat

 

Here ons is hier goet wesen

 

Maken wi woninghe in desen

 

Drie: dene sal wesen dine

 

Dander moyses die sine

55

Helien sal die derde sijn

 

Merc hoe wel smaket die wijn

 

Die so grote innicheit

 

Geuet altoes in gode gereit

 

¶ Die derde kelre is ghedranc

60

Van groter passie ende stranc

 

Die cristus om den mensche leet

 

Vut desen kelre vliet ghereet

 

Oueruloiende suete wijn

 

Dat mach wel suete minne siin

65

¶ Origenes die goede clerc

 

Spreket dus o siele merc

 

Gans inden wonden ende sichse open

 

Drinke uanden wijn al sonder copen

 

Hi oueruloeit ende drupet niet

70

Hi maecten droncken dies gheniet

 

Drinke dattu ghene pine lides

 

Wart dronken dattu die werelt vermides

 

Wassche di dair in sone stincstu niet

 

Als di dat leste ordel besiet

75

¶ Die vierde kelre dat is leuen

 

In ordene gheestelike begeuen

[fol. B10vb]

 

Hier in drinct men uanden wijn

 

Die scinket die heilighe discipliin

 

Hier of heeft ozee gheseit

80

Ic sal di leden in enicheit

 

Ende sal spreken te dire herten

 

Dese is uan sonden smerten

 

Die wijn die men hier in drenct

 

Is sÜete ende sÜer beide ghemenct

85

In dese vier kelre rike

 

Wart gheleet wairdelike

 

Van haren brudegom die bruut

 

Die god ende kerstenheit beduut