Commentaar op het Hooglied


IJ Hoe die mensche viel Na dat lucifer was verstoten Vanden hemel mit sinen roten Makede god dair om den mensche Dat hi besitten sal den wensche 5[regelnummer] Siins hemelrijcs vair of die quade Gheuallen waren mit onghenade Hi makede adam den eersten man Ende sende hem enen slaep dair an Ende nam een ribbe wt sinen liue 10[regelnummer] Die hi makede tenen wiue Ende gafse hem tere ghesellinnen Dair stichte hi rechte echtscap in minnen Hi setten inden paradijs Ende uerboot hem vanden rijs 15[regelnummer] Der cunst des goeden entes quaden Teten bi enigher staden Des hi alte scier vergat Want hi uanden appel at Ouermits des duuels rade 20[regelnummer] Diene brocht in groten scade Die hem toonde in ere slangen vorm Dus bedroech die felle worm Hem dat hi gods ghebod brac Dat god swairlijc an hem wrac 25[regelnummer] Ende an allen menschen kint Als men noch die wairheit vint Hi stacken vten paradise
[Folio B2rb]
In droefheit menigher wise Die wi noch in allen daghen 30[regelnummer] Liden moeten ende bedaghen Dair ginc die mensche vier kennisse Gods. ter uerghetenisse Want hi ontfinc drie zware vloeken Die wi alle daghe besoeken 35[regelnummer] Verghetenheit ende ooc den doot Ende in naturen crancheit Dus wart die mensche bedreuen Ten doden uanden leuen Ende uanden paradise ter hellen 40[regelnummer] Dair niet ende is dan quellen