Commentaar op het Hooglied

J Hoe dat God alle dinc maecte ende Lucifer viel

DOe god woude maken alle dinc
Ende creature wesen ontfinc
Doe maecte hi die enghele ende hair nature
In scoonheit ende in clare figure
Ende verchieretse mit reden
Ende gaf hem vrien core ter steden
Doe verhief hem een te hant
Want hi hem bouen dander vant
Sere voirbair ende scone
Dat quam hem ten groten hone
Want hi woude gode gheliken
Des moeste hi uan danen wiken
Ende wart lachterlike verstoten
Doir houairde mit sinen ghenoten
Ende wart ter hellen ghesant
Lucifer was dese ghenant

[fol. B1vb]

 

Ooc makede god hemel ende airde

 

Ende alle dinc na siinre wairde

 

Na sinen doene na sijnre figure

20

Ende ondersceide alle creature

 

Den hemel gaf hi ommerinc

 

Dat hi beluket alle airtsche dinc

 

Ende verchierden mitten sterren

 

Der zonnen gaf hi sonder merren

25

Hair clairheit dair si mede verlicht

 

Die lucht ende dat die airde dricht

 

Dat water sciet hi uander airden

 

Ende hiet elkerlijc ghewairden

 

Van creaturen ende van dieren

30

Wijslike in menigher manieren

 

Planeten ende elementen

 

Maecte hi onder den firmamenten

 

Die op ter airden nacht ende dach

 

Dienen als men sien mach

35

Dair om heeft god die lucht ghe[ghe]uen

 

Die men siet om dairde zweuen

 

Dat si den menschen ende dander dieren

 

Bequame si in hare manieren

 

Hi heuet die lucht ooc menic[hf]oude

40

Ghetempert mit hitten ende mit coude

 

Ende mit reghen ende mit winde

 

In al desen ic oirbair vinde

 

Want die airtsche creaturen

 

Mochten langher niet gheduren

45

Sonder dit ende uele mere

 

Dat noch ghemakede onse here

 

Dairde gheuet ons lijfnare

 

Van gods miltheit hair en tare

 

Hi ghebeit sonne ende mane

50

Dat si in eenpairliken ghane

 

Desen tijt ons ondersceiden

 

Dair wi in dit leuen leiden

 

Al sine gaue ende sine werken

 

Can niement sonderlinghe merken

55

Dair is so uele ende si ... [gr]oot

 

Datse niement can al bloot

[fol. B2ra]

 

Begripen of bekennen al

 

Want bi hem is groot ende smal

 

Dat was ende is ende noch sal siin

60

Dats uan al siinre doghet fiin

 

Bi aldus ghedanen werken

 

Moghen wi wel mit wairheit merken

 

Dat god groot is wijs ende goet

 

Die dit al gheuet ende do[et]

65

Wi sullen onse so keren

 

Te hem in loue ende in eren

 

Dat wine te rechte minnen

 

Ende anders ghenen god kinnen