De C.L. psalmen des conincklijcken propheten Davids
(1625)–Anoniem De C.L. psalmen des conincklijcken propheten Davids–
AuteursrechtvrijOp de Voys: Het syn doch Salich alle die.DEn HEEre Dancken is mijn Moet
End' uwen Naem ghy hoochste Goet
Loff singhen t'Allen Tijden,
Des Morghens dijn Ghenade wel,
En s'Nachs dijn Trou met snaren spel
Verconden end' Belijden.
Met dijne groote Wercken (HEER)
Verblijdt ghy my met allen seer,
Ick Roem en wil Voordraghen
Die Wercken uwer Handen fijn,
HEER dijne Wercken Heerlijck zijn
Seer diep syn dijn Aenslaghen.
2. Een Dwaeslijck Mensch dat niet verstaet,
Gheen Sotten sulcx ter Herten gaet,
Die Boose bloeyen seere,
| |
[Folio Cxij.v]
| |
De Godloos' als gras groeyen soet,
Tot dat sy worden wtgheroet,
Maer de Hoochst' blijft ghy HEERE)
Want siet HEER dijne Vyanden,
Hoe sy omcomen all' met een,
Die Boosdoeners verstroeyen.
Maer verhoocht wert met blijden moedt
Myn Hoorn, als een Eenhoorens goet,
Van vreuchden sal ick bloeyen.
3. Myn Oog' sal synen lust noch claer
Sien aen myn Vyanden all'gaer,
Die Godes woort beletten,
Myn Oor sal synen lust oock wel
Rasch hooren aen den boosen fel,
Die teghen my haer setten.
Maer de Rechtveerdighe sal vroom
End' even als een Palmenboom
Staen groen, end' bloeyen rustich,
Hy sal als eenen Ceder jent,
Op Libanon seer Excellent
Oock wassen schoon en lustich.
4. Salich dien, die daer zijn gheplant,
Int Huys des HEEren wel bekant,
Daer sy staen groen altijden.
Wanneer sy oock schoon worden Out,
Dan bloeyen sy noch menichfout,
Zijn vruchtbaer, versch en blijde,
Dat sy vercondighen wel reyn,
Hoe vroom de HEEre is alleyn,
| |
[Folio Cxiij.r]
| |
End' vol Gherechticheden,
Mijn Troost, aen hem geen Onrecht is
Van allen quaet is hy ghewis,
En Boosheyt aff ghesneden.
|
|